Kimsa punchaw asamblea kallpanchasqa kanapaq

1. ¿Imatam suyachwan kay watapi kimsa punchaw asambleamanta?

¹ Allpantinpi runakunam Satanaspa munaychakusqanpiqa yakunayasqa hina kachkanku, Jehová Diosmi ichaqa serviqninkunaman achkanpi yakuta qochkan (Isa. 58:11). Chaytaqa qowanchik kimsa punchaw asambleapim (Ayacucho lawpiqa iskay punchawllam asamblea kanqa). Kay watapi chay asamblea hichpaykamusqanman hinam, preparakunanchik iñiqmasinchikwan kallpanchanakunapaq. ¿Imaynatam rurachwan? (Pro. 21:5.)

2. ¿Imakunamantam tanteanaykiña?

² Manaraq chayta ruraspaqa, tanteayña chay asambleapi kimsantin punchaw kanaykipaq llamkaynikiwan imata ruranaykipaq. ¿Ñachu tantearunkiña sapa punchaw hayka tiempopi chayanaykita hinaspa chayman hina asamblea manaraq qallarichkaptin asientota tarinaykipaq? Kallpanchakusunyá chay asambleapi Jehová Diospa yachachiwasqanchikta llapanta uyarinapaq (Isa. 65:13, 14). ¿Yaqañachu tantearunkiña maypi samanaykipaq hinaspa hayka qollqewan rinaykipaq?

3. ¿Imakunatam rurananchik asambleapi uyarisqanchik sapakamata chaynataq familianchikta yanapananpaq?

³ ¿Imatam rurachwan asambleapi atencionwan uyarinapaq? Allinmi kanman: tuta allinta puñuy, discurso qoqta qaway, Bibliapi textokunata maskay hinaspa pisillapi qellqaypas. Tayta-mamakunaqa wawa-churinkuwanmi kuska tiyananku chaynapi llapanku allinta uyarinankupaq (Pro. 29:15). Asambleamanta kutimuspankupas aylluntinmi tutapi rimanmanku imapas yachamusqankumanta. Asamblea pasaytapas chaypi yachamusqanku hinalla yanapananpaqmi, familiawan Diosta yupaychasqankupi yuyarinanku paykunapaq allin kaqkunata.

4. ¿Imatam rurachwan hukkunapas asambleapi kallpanchasqa kanankupaq?

⁴ ¿Imaynatam hukkunata yanapachwan? Munanchikmi hukkunapas kallpanchasqa kananta. ¿Piensarqankichu yuyaq iñiqmasinchikkunapi hinaspa rinankupaq sasachakuqkunapi? ¿Kanchu congregacionnikipi pipas yanapanaykipaq? (1 Juan 3:17, 18.) Sapa grupopi encargakuq ancianokunam chayna sasachakuqkuna yanapasqa kanankupaq astawanqa qawananku.

5. ¿Imaynatam invitacionkunata aypuna kanqa? (Qaway recuadrota.)

⁵ Punta watakunapi hinam, asamblea rurakunanpaq kimsa semana faltachkaptin runakunata invitana kanqa. Congregacionkunaqa sapakamam tanteananku lliw invitacionkunata aypunankupaq hinaspa predicananku lawkunaman chayanankupaqpas. Invitacionta qonapaq tiempo tukuruptin familiaykipa hinallaraq invitacionnin kaptinqa, apaychik asamblea rurakusqan llaqtapi pitapas invitanaykichikpaq. Asamblea qallarisqan punchawpim niwasun imayna ruranamanta. Invitacion aypuyta mana tukunaykita piensaspaqa asambleapi chaskiqkunamanmi qonayki. Ichaqa domingota huk invitacionta apay, chaytam tukuyninpi kaq discursopi servichikunqa.

6. Hukkunata respetaspaqa, ¿imaynatam mana sasachasunchu?

⁶ Hukkunata respetasun. Kunan tiempopi ‘kikillanpaq munaq’ runakuna hukkunata mana llakipayaq kaptinkupas, ¡mayna allinmi hukkunata respetaq iñiqmasinchikkunawan kuska tarikuyqa! (2 Tim. 3:2.) ¿Imaynatam qawachinchik hukkunata respetasqanchikta? Asamblea rurakunan sitio 8 hora tutamanta punku kichakuptin: hukkunawan mana llallinakuspa, hawkalla yaykuspa, asientotapas wasinchikpi kaqkunallapaq hinaspa carropi ñoqanchikwan riqkunallapaq chaynataq Biblia estudiachisqallanchikpaq rakispa. Chaymantapas, takita uyarinapaq asamblea qallarichiqpa nisqanta kasukuspam tiyananchikpiña kana; chaynataq asambleapi allin uyarinankuta celularninchikwan mana sasachaspapas. Hukkunata respetaspaqa asamblea rurakuchkaptinmi mana rimanachu, mikunachu, yanqaqa purinachu hinaspa celularpi mensajetapas qellqanachu.

7. ¿Imaynatam iñiqmasinchikkunawan asambleapi kallpanchanakuchwan?

⁷ Kallpanchaq amistadkuna. Asambleakunapiqa atinchikmi iñiqmasinchikkunawan reqsinakuspa huñulla tarikuyta (Sal. 133:1-3). ¿Imanasqataq mana kallpanchakunkichu huk congregacionkunapi kaq iñiqmasinchikkunawan reqsinakunaykipaq? (2 Cor. 6:13.) Sapa punchawmi reqsiyta atiwaq huk iñiqmasinchikta otaq huk familiatapas. Chawpi punchawpi samasqanchikmi chaypaq allin kanman. Mikunaykipaq pisillata apaspaqa, iñiqmasinchikkunawanmi amistad rurayta atinki restauranteman rispam ichaqa chay rurayta mana atinkichu. Atiwaqmi iñiqmasinchikkunata reqsispa wiñaypaq amistadkuna rurayta.

8. ¿Imanasqataq kikinchikmanta yanapanapaq asuykunanchik hinaspa imapim yanapakuchwan?

⁸ Ancha allinmi Jehová Diosta servisqanchikpi iñiqmasinchikkunawan llamkayqa. Ejemplopaq, atiwaqmi imapipas yanapakuyta otaq congregacionnikiwan pichaypi yanapakuytapas (Sal. 110:3). Imapipas yanapanaykipaq tiempoyki kaptinqa asuykuy Departamento de Servicio Voluntario nisqaman. Achka yanapakuqkuna kaptinqa kusisqam utqayman imatapas llapallanchik rurarunchik.

9. ¿Imanasqataq asamblea rurakusqan punchawkunapi cuidananchik portakuyninchiktawan imayna allichakusqanchikta?

⁹ ¿Imanasqataq allinta portakunanchik? Chay kimsantin punchaw asamblea tukunankamam sutilla kananchik, manam discursokuna rurakusqan horakunallapichu. Asamblea rurakusqan llaqtapi pipas rikuwaqninchikqa cuentatam qokunanku hukkunawan mana chaynalla kasqanchikta (1 Ped. 2:12). Chaymi pachakusqanchikwan imayna allichakusqanchikqa Jehová Diosta hatunchanan asambleapi, samapakusqanchikpi otaq restaurantepi kaptinchikpas (1 Tim. 2:9, 10). Qasqonchikpi churakusqanchik tarjetata runakuna qawaspankum cuentata qokunqaku Jehová Diospa testigon kasqanchikta hinaspa allin kanqa asambleamanta willanapaq chaynataq predicanapaqpas.

10. ¿Imakuna pasasqantaq hukkunaman sutillata willan cristiano kasqanchikmanta?

¹⁰ ¿Imatataq ñoqanchikmanta qawachichwan asambleapi imayna portakusqanchikwan? Asamblea rurakusqan sitiomanta cuentallikuq runapa nisqanmantam huk periodico kaynata nirqa: “Allin portakuq runakunam paykunaqa. Sapa watam kusikuniku kaypi huñunakusqankumanta”, nispa. Qayna watam iñiqmasinchikkunapa samapakusqanku hotelpi huk runa billeteranta wischukurusqa. Chay billeterata tarikuq Testigo, hina qollqentinta hotelmanta cuentallikuqman qoykuptinmi billeterapa dueñonta hotelmanta cuentallikuq kaynata nirqa: “Allinmi karqa kay hichpallapi Jehová Diospa testigonkunapa asamblea rurasqankuqa, chaynapi kay hotelpi paykunallaña samapakusqankupas. Mana chayqa manachá tariwaqchu karqa billeteraykitaqa”, nispa.

11. Asambleapa hichpamusqanman hina, ¿imatataq tanteananchikña, hinaspa imanasqa?

¹¹ Kimsa punchaw sutiyoq asambleanchikqa asuykamuchkanñam. Asambleapi yachachikuykuna kallpanchaqninchik kananpaqmi achka tiempowan hinaspa ancha allin rurasqa kachkan. Chay asambleapi kanaykipaq kallpanchakuy hinaspa listoña tarikuy llaqtanwan Jehová Diospa qowasqanchikta chaskinaykipaq. Kunanpuni tanteayña: asambleapi hukkunata respetaspa, amistadkunata ruraspa chaynataq allinta portakuspa kallpanchanaykipaq. Chayta ruraspaqa qayna wata asambleanchikman riqkuna hinachá tarikusun, chaypi tarikuq huknin iñiqmasinchikmi kaynata qellqarqa: “¡Manam yuyanichu maypipas chayna kusisqa kasqaytaqa!”, nispa.

[4 kaq paginapi suti rikuylla kaq willakuy]

Punta watakunapi hinam, asambleapaq kimsa semana faltachkaptin runakunata invitana kanqa

[6 kaq paginapi suti rikuylla kaq willakuy]

Pachakusqanchikwan imayna allichakusqanchikqa Jehová Diostam hatunchanan asambleapi, samapakusqanchikpi otaq restaurantepi kaptinchikpas

[7 kaq paginapi suti rikuylla kaq willakuy]

Kunanpuni tanteayña: asambleapi hukkunata respetaspa, amistadkunata ruraspa chaynataq allinta portakuspa kallpanchanaykipaq

[4-7 kaq paginakunapi recuadro]

2011 watapi kimsa punchaw asambleapaq yuyarichiykuna

◼ Imay horam qallarinqa. Asambleapi yachachikuykunaqa kimsantin punchawmi qallarinqa 9.20 tempranomanta. Punkukunam kichasqaña kanqa 8.00 a.m. Asambleanchik sumaqta qallarinanpaqmi uyarinallapaq taki qallaykuptinqa maymi tiyananchikpiña llapallanchik kananchik. Viernes hinaspa sabadotaqa tukunqa 4.55 tardeta, domingotañataq 3.40 tardeta (Ayacucho lawpiqa iskay punchawllam asamblea kanqa, chaymantañam asamblea imay hora qallarinanmantaqa congregacionpi willakuy kanqa).

◼ Carrokuna maypi saqenapaq. Kikinchikpa localninchikpi otaq alquilasqanchik localpi carro saqenapaq sitio kaptinqa manam pagasunchu, chayasqanchikman hinam ordenninpi saqesun. Chaymantapas, mana puriy atiqkunapaq sapaqchasqa sitiopiqa carronkutam saqenmanku paykunata apamuq kasqanmanta letreroyoq kaq carrokunallata. Chay sitiokuna taksalla kasqanraykum kallpanchaykiku carroykichikta sapakama mana apanaykichikpaq.

◼ Tiyanapaq. Tiyananchikpaqmi sapaqchachwan carronchikpi ñoqanchikwan riqkunallapaq, wasinchikmanta riqkunallapaq chaynataq ñoqanchikwan Biblia estudiaqkunallapaq (1Cor. 13:5).

◼ Mikuy apanapaq. Chawpi punchawpi mikuyta rantiq lloqsinanchikmantaqa sapakamam mikuyninchikta apakunanchik. Imapipas taksallapim apananchik asientonchikpa ukunpi churananchikpaq kamaqllata, manam imapipas llumpay hatun kaqkunapiqa apanachu. Manataqmi servichikunapaq imatapas apanachu vidriomanta kaptinqa.

◼ Qollqewan yanapakunapaq. Asambleamanta agradecekusqanchiktam qawachichwan asambleapi sonqonchikmanta qollqenchikta churaspa, chaywanmi enteron pachapi predicacionta yanapasun. Chequepi qoyta munaspaqa kay sutita qellqana “Asociación de los Testigos de Jehová”.

◼ Ima accidente kaptin otaq qonqaymanta onqoruspaqa. Asambleapi ima accidentepas qonqayllamanta pasaptinqa otaq pipas mana allinta sientekuptinqa chaylla willay hichpaykipi kaq chaskiqman (acomodador), payñam Primeros Auxilios nisqaman willanan paykunaña atiendenankupaq.

◼ Hampita tomaspaqa. Imawanpas onqosqaykirayku doctorpa nisusqayki hampita tomanayki kaptinqa ama hina kaspam tomanaykipaq hampitaqa asamblea rurakusqan punchawkunapi haypaqta apanayki, asambleapiqa chay hampikunataqa manam qonqakuchu.

◼ Zapatomanta. Asambleapim sapa wata urmanku zapatonku mana allin kasqanrayku. Chaymi zapatonchikta rantispaqa allinta akllananchik gradaspipas otaq maypiña kaptinchikpas mana urmachiwananchikpaq hina.

◼ Karu uyariqkunapaq. Asambleakunapim discursokuna uyarikunqa radiopi (FM), chayqa kanqa local ukullapim. Chayta allinta servichikunaykipaq rinrillaykipi uyarinaykipaq audifonoyoq radiochata apay.

◼ Wawata apanapaq kaqkunamanta. Wawata tanqanapaq coche nisqankutaqa manam apanachu asambleamanqa. Wawata tiyachinapaq sillachata apaspaqa tiyasqanchik waqtanpi kaq tiyanapi kamaqllatam apana.

◼ Perfume. Yaqa llapan asambleakunam rurakun mana ancha wayrapa yaykunan localkunapi. Chaymi llumpay olorniyoq perfumekunawan churakuyta munaspaqa ichapas pisillata churakuna, chaypa olorninwan sasachakuqkunapi piensaspa (1 Cor. 10:24).

◼ Sírvase visitar nisqa papelmanta (S-43). Allinmi kanman hukta otaq iskayta Sírvase visitar nisqa papelta apayninchik, chaynapi pimanpas predicaptinchik astawan yachay munaqkunapa sutintawan maypi yachasqanta qellqananchikpaq. Hinaspam Departamento de Publicaciones nisqaman otaq congregacionpi secretarioman asambleamanta kutimuspa qonanchik (qawariy km09 11 pág. 4).

◼ Restaurantekuna. Jehová Diospa sutinmi hatunchasqa kanqa restaurantekunapi allinta portakuptinchikqa. Propina qonapaq costumbre kaptinqa qonaykim.

◼ Hotelkuna.

1) Ama sapaqchaychu mana servichikunayki cuartokunataqa hinaspa cuartopi haykata samachinapaq nisqankuman hinalla samachiy.

2) Imapas mana urgente atiendenayki kaptinqa ama yanqaqa hotelmanta pasakuychu, imapas pasakuptinqa hotelpi cuentallikuqmanmi chaylla willanayki (Mat. 5:37).

3) Samapakusqayki hotelpi llamkaqkunawan rimaspaykiqa allin portakuq kasqaykita qawachiy. Paykunaqa achka runakunata atiendesqankuraykum munanku entiendeq, pacienciakuq hinaspa kuyapayakuq kananchikta.

4) Lista de hoteles recomendados nisqa papelpi rikuriq preciokunaqa huk punchawllapaqmi. Sapaqmi impuesto cobrasqankuqa. Cuartomanta astawan cobrayta munasuptikiqa otaq mana servichikusqayki kaqkunamanta cobrasuptikiqa ama pagaychu, aswanqa chaylla willay asambleapi Departamento de Alojamiento nisqa cuentallikuqkunaman.

5) Samapakusqayki cuartopi ima sasachakuypas rikuriptinqa Departamento de Alojamiento nisqamanmi willanayki, chaytaqa ama qonqaychu.

◼ Yanapakunapaq. Asamblea allin rurakunanpaq ima ruraypipas yanapakuspaqa aswan kusisqam tarikusunchik (Hech. 20:35). Yanapakuy munaqkunaqa rinanmi Servicio Voluntario nisqaman. Manaraq 16 watanpi kaq warmakunapas yanapakunmankum, ichaqa tayta-mamanwan kuska otaq tayta-maman permisaptin piwanpas yuyayniyoq kaqwan.

[5 kaq paginapi recuadro]

¿Imaynatam invitacionta qosunchik?

Pisillatam rimana enteron predicananchik lawman chayanapaqqa. Yaqapaschá kaynata nichwan: “Buenos dias. Enteron Pachapim kay invitacionta aypuchkaniku. Kaymi qampaq, kaypim tarinki imamanta kasqanta”, nispa. Invitacionpa qallariqnin paginapim leeyta munanapaq hina kachkan, chaymi chayta qawanankupaqqa kusisqa chay invitacionta qonayki. Semana tukuyta aypuspaqa revistakunatapas qochwanmi atikuptinqa.