¡Allinpunim qarikunaman predicayqa!
1. ¿Imam necesitakun Diospa llaqtanpi?
1 Kay tukupay punchawkunapiqa hinallam Diospa llaqtanqa wiñachkan, chaymi congregacionpi punta apaq qarikunata necesitakun (Mar. 4:30-32; Hech. 20:28; 1 Tim. 3:1-13). Predicaptinchikqa yaqa llapallanpim warmikuna Diosmanta astawan yachayta munanku. Chaynataq wakin llaqtakunapi runakunaqa, warmikunatam encarganku familiankuta Diosmanta yachachinankupaq. ¿Imatam rurachwan qarikuna Diosmanta yachayta munanankupaq, hinaspa ñoqanchikwan kuska Diosta yupaychanankupaq?
2. Pablo hinaspa Pedro qarikunata predicaptinku, ¿imapim tukurqa?
2 Maskananchikmi: Familiapi qosa kaqkuna Dios yupaychayta qallariptinqa, familianpas yaqa llapallanpim qatinku. Pablo hinaspa Silas presochasqa kachkaptinkum carcelerota predicarqaku. Hinaptinmi chay runaqa wasinpi llapallan kaqkunapiwan bautizakururqa (Hech. 16:25-34). Chaynataq Corinto llaqtapi Pablo predicasqanraykum, judiokunapa huñunakunanku wasipi kamachikuq ‘Crispo sutiyoq runapas wasinpi llapallan kaqkunapiwan Jesucristoman iñikurqaku’ (Hech. 18:8). Chaymantapas ‘Diosta manchakuspa serviq’ Cornelio runata predicananpaqmi, Jehová Diosqa Pedrota kamachirqa. Hinaptinmi Cornelioqa ayllunwan hinaspa amistadninkunawanpas bautizakururqa (Hech. 10:1-48).
3. Felipe hina, ¿atiwaqchu pi kamachikuq runatapas predicayta?
3 Kamachiq qarikunata predicaypas allinpipunim tukunman (1 Tim. 2:1, 2). Angelta kasukuspanmi, elipe cristianopas ‘kamachikuq runata’ predicarqa, “payqa karqa Etiopia nacionpi Candace sutiyoq reinapa qollqen waqaychaqmi”. Felipem uyarirurqa chay runa “Diosmanta willakuq Isaiaspa qellqasqan librota” leesqanta. Chay runapas cristianom rikurirurqa, yaqapaschá llaqtanman kutispanqa Diosmanta willakurqa. Chaymantapas yaqapaschá reinatawan cortepi kaqkunatapas predicarqa, paykunata predicayqa sasamá karqa (Hech. 8:26-39).
4. ¿Imatam rurachwan qari kaqkuna Diosmanta uyarinankupaq?
4 Maypitaq hinaspa imaynatam tarichwan: Qarikuna yaqa llapallanpi tukuy punchaw llamkasqankurayku, ¿tiempochakuwaqchu chisinkuyta otaq samana punchawkunapi predicanapaq? Qarikunapa llamkasqanku lawkunapi predicanapaq kallpanchakuspaykiqa, tarinkimá wasinkupi mana tarikuq qarikunataqa. Qari iñiqmasinchikkunapas kallpanchakunmankum llamkaqmasinkunata predicanankupaq. Chaynataq sapa kuti predicasqayki lawpi wasin-wasin rispaykiqa, niwaqmi qosa kaqwan rimay munasqaykita.
5. Pi paninchikpas predicasqanpi Diosmanta yachay munaq runata tariruspanqa, ¿imatam ruranan?
5 Pi paninchikpas predicasqanpi Diosmanta yachay munaq runata tariruspanqa, manam sapallanchu watukunan. Qosanwanmi kutinan otaq pi iñiqmasinchikwanpas. Chay runa yachasqanpi ñawpariptinqa, allinmi kanman preparasqa qari iñiqmasinchikman saqeykuyninqa.
6. ‘Achka runakunata Cristopaq gananarayku’, ¿imaynatam apostol Pablota qatipakuchwan?
6 Yachayta astawan munananpaq: Apostol Pablom ‘achka runakunata Cristopaq ganananrayku’ paykunapi piensarqa hinaspa necesitasqankuman hina predicarqa (1 Cor. 9:19-23). Ñoqanchikpas piensananchikmi, qarikunapa ima yachay munasqankumanta, hinaspa preparakunanchikmi chaykunamanta rimanapaqpas. Paykunataqa llakichinmi qollqemanta sasachakuykuna, gobiernokuna hinaspa familiankuta imayna mantieneytapas. Yaqapaschá tapukunkupas imapaq kawsasqankumanta, kay pachata ima pasananmanta hinaspa imanasqa ñakariykunata Dios saqesqanmantapas. Chaykunamanta rimapayaptinchikqa, uyarinqakum predicasqanchiktaqa (Pro. 16:23).
7. Huñunakuyman hamuq mana iñiq qosakunata, ¿imaynatam congregacionpi kaqkuna yanapachwan?
7 Imaynatam mana iñiq qosakunata yanapachwan: Casarasqa paninchikkunapa sumaq kawsakuyninkuqa, allintamá yanapan mana iñiq qosankuta, chaywanpas congregacionpi kaqkunaqa atichwantaqmi yanapakuytaqa (1 Ped. 3:1-4). Salonman hamuptinku allinta chaskiykuptinchikqa, allinpunim kanqa. Yuyariy, Salonman hamuspankuqa qawachichkankum Diosmanta yachay munasqankuta, hinaspa yaqapaschá munanmanku Biblia estudiaytapas.
8. Huñunakuyman hamuq mana iñiq qosakunata yanapanankupaq, ¿imatam congregacionpi qarikuna rurayta atinmanku?
8 Mana iñiq qosakunamanta wakinkum qallariypiqa Diosmanta mana yachayta munankuchu, ichaqa yaqapaschá pisi-pisimanta munanmanku. Huk congregacionpim karqa chayna, hinaspam iñiqmasinchikkuna wasinman watukunankupaq rimapayarqaku, chaynapi yachay munasqanmanta rimanankupaq. Tiempopa risqanman hinam Bibliapa yachachisqanmantaña rimarqaku, kunanqa bautizakurunñam. Hukpiñataq huk iñiqmasinchik mana iñiq qosata yanapaykurqa wasinpa murallanta ruraysispan. Chayna yanapaykusqanwanmi Biblia estudiayta qallaykurqa (Gal. 6:10; Fili. 2:4). Congregacionpi qarikuna, ¿atiwaqchikchu yanapayta mana iñiq qosakunata?
9. Congregacionpi qarikunata ñawparinankupaq yanapaspaqa, ¿imam kanmanku?
9 Ñawparinankupaq yanapasun: Congregacionpi qarikunata ñawparinankupaq yanapaspaqa, Diosmanta sumaq ‘regalom’ kanqaku otaq wawqe-panikunata yanapanankupaq tukuy yachasqankuta servichikuq ancianokuna (Efe. 4:8; Sal. 68:18). Paykunam kusikuywan ‘Diospa ovejankunata michinqaku’ (1 Ped. 5:2, 3). ¡Mayna sumaq bendicionmá wawqe-paninchikkunapaq kanmanku!
10. Apostol Pablota Ananiaspa yanapasqan, ¿imaynatam achka runakunata yanaparqa?
10 Piensarisun Saulopi, paymi tiempopa risqanman hina ‘apostol’ karqa, ichaqa ñawpa tiempopim cristianokunata qatikacharqa (Rom. 11:13). Chaymi Ananiasqa payman predicayta mana munarqachu. Predicaruptinmi ichaqa payqa tiempopa risqanman hina apostol Pablo karqa. Chaymantapas predicasqanwanmi achka runakunata yanaparqa. Kunanpas, Diospa yanapakuyninwan Bibliapi qellqasqankunaqa hinallam yanapawachkanchik (Hech. 9:3-19; 2 Tim. 3:16, 17).
11. ¿Imanasqataq kallpanchakunanchik qarikunaman predicanapaq?
11 Chaynaqa, imatapas rurasunyá qarikunaman predicanapaq Diospa kamachiwasqanchikta cumplinapaq. Yuyarisun, Jehová Diosqa bendecinqamá munayninta ruranapaq kallpanchakusqanchiktaqa.