Casado vidapi huk kaqnin mana iñiq kaptin

“Yaqapasmi qosaykita [otaq warmikita] salvawaq” (1 COR. 7:16).

IMATAM NIWAQ:

¿Imatam rurawaq mana iñiq familiaykiwan hawkalla kawsakunaykipaq?

¿Imatam rurawaq mana iñiq familiayki Diosmanta yachayta munananpaq?

¿Imaynatam yanapachwan mana iñiq familiayoq cristianomasinchikkunata?

1. Diospa munaychakuyninmanta willakuyta pipas chaskikuptinqa, ¿imatam familian ruranman?

JESUSMI qatiqninkunata kamachirqa kaynata willakunankupaq: “Diospa munaychakunanmi hichparamunña”, nispa (Mat. 10:1, 7). Kay sumaq willakuyta chaskiqkunaqa kusisqa hinaspa hawkallamá tarikunanku karqa. Jesusqa nirqataqmi chay sumaq willakuykunapa contranpi achka runakuna kanankumantapas (Mat. 10:16-23). Wakinpiqa familianpi kaqkunallam contrankupi churakunanku karqa, chayqa llakikunapaqmi karqa (leey Mateo 10:34-36).

2. ¿Imanasqam kusisqa kachwan familianchik mana iñiq kaptinpas?

² ¿Chayraykuchu nichwan familianchik mana iñiq kaptin kusisqa mana kawsanamanta? Manamá. Wakinkuqa yaqapaschá llumpayta ñakarinku familian contranpi churakuptinku, ichaqa manamá llapankuchu chaynaqa kanku. Manataqmi wiñaypaqchu chayqa. Hinaptinqa, ¿imamantam kanqa familianchik contranchikpi churakuptinkupas kusisqa kanapaq? Chayqa ñoqanchikmantam kanqa hinaspa sasachakuy kaptin imayna kananchikmanta. Familianchik sasachawaptinchikpas Diosman sonqo kaptinchikqa, Diosqa yanapawaspanchikmi kusikuyta qowasun. Familianchik mana iñiq kaptinpas kusisqa kanapaqqa kaykunam yanapawasun: Puntataqa, kallpanchakunanchikmi familianchikwan hawkalla kanapaq. Chaymantapas hinallam kallpanchakuna Jehová Diosta reqsinankupaq.

FAMILIANCHIKWAN HAWKALLA KASUN

3. ¿Imanasqam tukuyta rurananchik familianchikwan hawkalla kanapaq?

³ Diosmanta yachachikuykuna familianchikpa sonqonpi wiñananpaqqa, paykunawanmi hawkalla kananchik (leey Santiago 3:18). Chaynaqa, familianchik manaraq iñiq kaptinqa, tukuytam rurananchik paykunawan wasinchikpi hawkalla kanapaq. ¿Imaynatam chayta rurachwan?

4. ¿Imaynatam sonqonchikpi hawkalla tarikuchwan?

⁴ Lliw cristianokunam sonqonchikpi hawkalla kananchik. Chaypaqqa Diostam sonqomanta mañakunanchik, chaynapim ‘Diosqa hawkayayninta’ qowasun (Fili. 4:6, 7). Diosmanta yachaspanchik chaynataq kamachikuyninkunata kasukuspanchikpas, hawkalla hinaspa kusisqam tarikunchik (Isa. 54:13). Chaynataqmi tarikusun, sonqomanta huñunakuykunapi rimarispanchik hinaspa Diosmanta willakuspapas. Chayta ruranankupaqmi astawan kallpanchakunku mana iñiq familiayoq kaqkuna. Luisa,a iñiqmasinchikpa qosan llumpayta harkakuptinpas, payqa wasinpi rurayninkunata ruraruspanmi Diosmanta willakunanpaq lloqsin. Paymi nin: “Diospa yanapakuyninwan predicaq lloqsispaymi, ancha allin tarikuni”, nispa. Payqa kusisqa chaynataq hawkachá tarikun.

5. ¿Ima sasachakuypim mana iñiq familiayoqkuna tarikunku, hinaspa maypim yanapakuyta tarinmanku?

⁵ Mana iñiq familianchikwan hawkalla kawsanapaq kallpanchakuyqa ancha allinmi. Ichaqa wakinpiqa sasamá kanman; paykunaqa munanqakuspaschá Bibliapa contranpi kaqkunata ruranapaq. Yaqapaschá llumpayta piñakunqaku munasqankuta mana ruraptinchik, ichaqa tiempopa risqanman hinam chayna takyasqanchik hawkayayta apamunqa. Ichaqa mañawasqanchik Bibliapa contranpi mana kaptinqa, allinmi kanman kasukuyninchikqa (leey Proverbios 16:7). Llumpay sasachakuypi tarikuspaqa, ancianokunapa yanapakuynintawan confianza sirvientepa qowasqanchik qellqakunapi yanapakuytam maskananchik (Pro. 11:14).

6, 7. a) ¿Imanasqam wakin runakunaqa mana munankuchu Testigokunawan familianku estudianankuta? b) ¿Imaynam kanan Biblia estudiaq otaq pi cristianopas mana iñiq qosan otaq señoran harkakuptinqa?

⁶ Mana iñiq familianchikwan hawkalla kawsanapaqqa, entiendenanchikmi hinaspapas Jehová Diospim confiananchik (Pro. 16:20). Kayqa allintaqmi ñoqanchikwan chayllaraq Biblia estudiaqkunapaqpas. Wakinpiqa manam qosanqa otaq señoranqa harkakunchu Bibliata estudiananpaqqa, aswanraqmi allinpaq hapinku. Wakinkum ichaqa llumpayta harkakunku. Estermi manaraq Testigo kachkaspan, llumpayta piñakururqa qosan Biblia estudiayta Testigokunawan qallaykuptin. Ninmi: “Bibliamanta wakin qellqankunatam wikaparurqani, wakintañataqmi kañarurqani”, nispa. Gerardo iñiqmasinchikpas, ñawpaqtaqa harkakurqam señoran Biblia estudiananta, ninmi: “Wakin qosakunaqa manchakunkum ima religionpas señoranta engañarunanta. Imayna harkayta mana atispankum, llumpayta piñakunku”, nispa.

⁷ Biblia estudiaqpa mana iñiq familian contranpi churakuptinqa, ¿imaynatam yanapachwan? Kallpanchachwanmi Biblia estudiasqanta mana saqenanpaq. Mana iñiq familianqa imayna kasqantam cambianman kuyakuywan hinaspa respetowan yanapaptinqa (1 Ped. 3:15). Gerardom nin: “Señoraytam agradecekuni hawkalla kaspan mana llumpay piñarikusqanmanta”, nispa. Señoranñataqmi nin: “Payqa hikutawarqam Biblia estudiayta saqenaypaq. Piensarqam engañawasqankumanta. Ñoqañataqmi kallpanchakurqani mana kutipakunaypaq, nirqanim ichapas nisqanman hina kasqanta, ichaqa nirqanitaqmi mana chayna rikchakuwasqanmanta. Nirqanitaqmi estudiasqay qellqata leenanpaq. Leeruspanñataqmi ima niytapas mana atirqachu”, nispa. Wakinpiqa huñunakuyman otaq Diosmanta willakuq lloqsiptinchikmi, mana iñiq qosaqa otaq señoraqa saqesqa hina tarikunman. Ichaqa kuyakuyllawan rimapayaymi mana iñiqtaqa hawkallata tarichinman.

DIOSTA SERVINANKUPAQ YANAPASUN

8. ¿Imatam apostol Pablo nin mana iñiq qosayoq otaq mana iñiq señorayoq cristianokunata?

⁸ Apostol Pablom cristianokunata nin qosanku otaq señoranku mana iñiq kasqanraykulla mana saqenankupaq (leey 1 Corintios 7:12-16).b Nintaqmi mana iñiq kaqqa ichapas tiempopa risqanman hina Dios yupaychay qallaykunanmanta, chaynapi hinalla kusisqa kawsananpaq. Jehová Diosmanta willanapaq kallpanchakuspanchikpas, manam llumpaytaqa hikutanachu. Qatiqninpi kaymanta qawasun.

9. ¿Imakunapim reparananchik mana iñiq familianchikman Diosmanta willanapaqqa?

⁹ Biblia estudiaqkuna Diosmanta cheqapta yacharuspankuqa, wakinpiqa llumpayta kusikuspankum tukuy punchawpas willakunmanku, munankutaqmi familiankunapas chaylla kasukunankuta. Chaynam Fred iñiqmasinchikta pasarqa. Ninmi: “Lliw runakunamanmi willayta munarqani”, nispa. Ichaqa manamá wakinpiqa chaynachu kanman. Fred iñiqmasinchikpa señoranmi nin: “Amirurqaniñam”, nispa. Huk cristianapas ninmi: “Ñoqaqa munarqanim pisi-pisimanta yachayta”, nispa. Chay cristianaqa qosan bautizakurusqanmanta 18 wata pasaytañam bautizakurqa. Sichu Biblia estudiachisqanchikpa qosan otaq señoran Diosmanta mana yachayta munaptinqa, ancha allinmi kanman sumaqllata willananpaq yanapayninchikqa. Diosmi Moisesnintakama nirqa: “Para hinam chayaypaq chayamunqa yachachikuyniyqa. Sulla hinam wichiypaq wichimunqa rimasqayqa. Chayamunqaqa lliwapa hawanman paramuchkaq hinam. Wichimunqaqa pastopa hawanman paramuchkaq hinam”, nispa (Deu. 32:2). Arí, aswan allinmi parapa sutuyninman hina otaq kaypi chaypi sulla hina Diosmanta pisi-pisimanta yachachiyninchikqa, sinchi para hina tukuyta willarunamantaqa.

10-12. a) ¿Imatam Pedro nirqa mana iñiq qosayoq otaq mana iñiq señorayoq cristianokunata? b) ¿Imaynatam Biblia estudiaq warmi 1 Pedro 3:1, 2 nisqanta kasukurqa?

¹⁰ Mana iñiq qosayoq cristianakunamanmi apostol Pedro nirqa: “Qamkunapas qosaykichiktayá kasuychik, chaynapim Diospa palabranpi mana iñiq qosakunapas mana rimapayachkasqalla allin kawsasqaykichikwan iñikunqaku. Respetowan allin kawsasqaykichikta qawaspam iñikunqaku”, nispa (1 Ped. 3:1, 2). Cristianapa mana iñiq qosan kuyakuywan mana qawaptinpas, respetasqanqa yanapanmanmi Diospi iñikunanpaq. Cristianopas mana iñiq señorantaqa kuyakuyllawanmi kamachinan Diosmanta mana yachayta munaptinpas (1 Ped. 3:7-9).

¹¹ Achka cristianokunatam Pedropa chayna nisqanqa allintapuni yanaparqa. Rimarisun Selma iñiqmasinchikmanta. Paypa Steve sutiyoq qosanmi llumpayta piñakururqa Testigokunawan Biblia estudiayta qallaykuptin. Kikin qosanmi nirqa “piñasqallaña hinaspa saqesqa hina” tarikusqanmanta. Selma iñiqmasinchikmi nin: “Manaraq Bibliata estudiachkaspaypas, paywan vida pasayqa sasam karqa. Imatapas rimanaypaqwan ruranaypaqqa, allintam cuidakunay karqa chaylla piñakuq kasqanrayku. Aswanñam rikurirurqa Biblia estudiayta qallaykuptiy”, nispa. ¿Imam Selma iñiqmasinchikta yanaparqa?

¹² Paytaqa anchatam yanaparqa Biblia yachachiqninpa rimapayasqan, Selma iñiqmasinchikmi willakun: “Huk punchawmi mana estudianayawarqachu. Pasaq tutapim qosaywan piñanakururqaniku, payqa llumpay piñasqam kachkarqa, chaymi ñoqaqa llakisqa kachkarqani. Watukamuwaqniy cristianaman lliwta willaykuptiymi payqa niwarqa 1 Corintios 13:4-7 nisqanta leenaypaq. Hinaptinmi nirqani: ‘Qosayqa manam haykapipas kaypi nisqanman hinaqa kuyawanchu’, nispa. Payñataqmi tapuwarqa: ‘¿Qamqa yaqachu chaynata kuyanki?’, nispa. Ñoqañataqmi nirqani mana allin genioyoq kasqanrayku chaynata mana kuyasqaymanta. Payñataqmi kuyakuyllawan kaynata niwarqa: ‘Selma, ¿pitaq cristiano kayta munachkan? ¿Qosaykichu icha qamchu?’, nispa. Chaypim musyakururqani imayna kasqayta cambianaypaq. Jehová Diostam mañakurqani qosayta kuyakuywan yanapanaypaq. Pisi-pisimantam imayna kasqaykuqa aswan allinña karqa”, nispa. 17 wata pasaruptinmi Steve qosanqa bautizakururqa.

IMATAM WAKIQNINCHIKKUNA RURACHWAN

13, 14. ¿Imaynatam yanapachwan mana iñiq familiayoq iñiqmasinchikkunata?

¹³ Llampu parapa sutuynin allpata nuyuykuspan plantakunata wiñachisqanman hinam, congregacionpi iñiqmasinchikkunapa kuyakuywan imapas rurasqankuqa allintapuni yanapanman mana iñiq qosayoq otaq mana iñiq señorayoq iñiqmasinchikkunata. Brasilmanta Elvina iñiqmasinchikmi nin: “Kunankamam iñiyniypi qaqa hina takyachkani iñiqmasiykuna kuyawasqanrayku”, nispa.

¹⁴ Chayna kuyakuyninchikqa yanapanmantaqmi mana iñiq ayllunchikkunatapas. Rimasun Nigeria nacionniyoq huk iñiqmasinchikmanta, paymi señoran bautizakurusqanmanta 13 wata pasaytaña bautizakurqa. Ninmi: “Ñoqam huk Testigowan illachkarqani, hinaptinmi qonqaymanta carron malograkururqa. Payñataqmi chay lawpi Testigokunaman rirqa yanapachikunanpaq. Paykunañataqmi unayña reqsiwanmankupas hina samachiwaspanku atiendewarqaku. ¡Chayna kuyakuq cristianokunamantam señorayqa sapa kuti rimapayawarqa!”, nispa. Inglaterra nacionpiñataqmi huk cristiana qosan bautizakusqanmanta 18 wata pasaytaña bautizakurqa. Paymi nin: “Testigokunaqa iskayniykutam mikunaykupaq pusawaqku. Paykunaqa wasiypi kasqayta hinam tarichiwaq”, nispa. Hina chay nacionniyoq huk runatapas señoran hina Testigo kananpaqmi, cristianokunapa kuyakuyninku yanaparqa. Ninmi: “Testigokunaqa wasiykumanmi hamuqku otaq wasinkumanmi pusawaqku. Kuyawasqankutam astawanraq qawachiwarqaku onqoruptiy watukamuwasqankuwan”, nispa. Chaynaqa, llapanchikmi yanapakuchwan iñiqmasinchikpa mana iñiq familiakunaman kuyakuyninchikta qawachispa.

15, 16. ¿Imaynatam mana iñiq familiayoq cristianokuna kusisqa kawsakunmanku?

¹⁵ Cristianokuna unay wataña Bibliapa nisqanman hina sumaqta kawsaptinkupas chaynataq allinllata predicaptinkupas, manam nichwanchu familianpi llapallan mana iñiqkuna Diosta servinankutaqa. Paykunaqa yaqapaschá haykapipas mana munanqakuchu hinaspapas hinalla harkakunmanku (Mat. 10:35-37). Chaywanpas allinpunim kanman kuyakuywan respetayninchikqa. Señoranmanta qepataña bautizakuq huk iñiqmasinchikmi nin: “Diospa munasqanman hina kawsaspanchikqa, manam yachanchikchu mana iñiq familianchik haykapi cambiananmantaqa. Chaymi hinalla kallpanchakuna”, nispa.

¹⁶ Diosmanta yachayta mana munaptinpas, atichwanmi kusisqa kawsaytaqa. Huk cristianam 21 wataña hinalla kallpanchakuchkan qosan Jehová Diospi iñinanpaq. ¿Imaynam tarikun?, ninmi: “Hinallam kusisqa tarikuni Jehová Diosta kusichinaypaqwan iñiyniy allin kananpaq kallpanchakusqayrayku. Kallpanchakunitaqmi estudianaypaq, huñunakuykunaman rinaypaq, predicanaypaq chaynataq iñiqmasiykunata yanapanaypaqpas. Chaykunata ruraspaymi sonqoyta waqaychani hinaspam Jehová Diosman astawan asuykuni”, nispa (Pro. 4:23).

¡HINALLA KALLPANCHAKUY!

17, 18. ¿Imam cristianota yanapanqa familian Diosta mana serviptinpas hawkalla tarikunanpaq?

¹⁷ Mana iñiq familiayki Diosta servinaykipaq mana yanapasuptikipas, hinallayá kallpanchakuy. Jehová Diosmi “hatun sutinrayku runankunataqa mana saqesunkichikchu” (1 Sam. 12:22). Paypi hinalla hapipakuptinchikqa haykapipas yanapawasunmi (leey 2 Cronicas 15:2). Bibliapa kayna nisqanta kasukuy: ‘Diosmanta anchallataña kusikuy [. . .]. Qamtaqyá Tayta Diosman vidallaykita entregaykuy. Paypiyá confiakuy qamqa’ (Sal. 37:4, 5). Diosta sapa kuti mañakuy hinaspa ama iskayrayaychu hanaq pachapi Taytanchik haykapipas yanapasunaykimanta (Rom. 12:12).

¹⁸ Jehová Diosta mañakuy chuya espiritunta qosunaykipaq, chaynapi familiaykiwan hawkalla kanaykipaq (Heb. 12:14). Yaqapaschá tiempopa risqanman hina mana iñiq familiayki Diosmanta yachayta munanman. Dios hatunchasqa kananpaq tukuyta ruraspaykiqa, kusisqa chaynataq hawkam tarikunki (1 Cor. 10:31). Manamá sapallaykichu kachkanki, enteron pachapim kuyakuq iñiqmasikikuna kachkan.

[Willakuykuna]

[28 kaq paginapi foto]

Allinta tanteay haykapi iñisqaykimanta willanaykipaq

[29 kaq paginapi foto]

Cristianopa mana iñiq familianman asuykusun