Haykapim Diosmanta yachay munaqta watukuchwan
1. Pipas Diosta servinanpaqqa, ¿imatam rurananchik?
1 Pipas Diosta servinanpaqqa, Diospa gobiernonmanta yachay munaqkunamanmi watukunanchik (Mat. 28:19, 20). Watukunanchikpaqmi ichaqa penden tiemponchikmanta hinaspa watukusqanchik runamasinchikpa tiemponmantapas, chayna kaptinpas manam unay tiempotaqa saqenachu. ¿Imanasqa?
2, 3. ¿Imanasqataq kallpanchakunanchik chaylla kutinapaq?
2 ¿Imanasqataq chaylla watukunanchik? “Diospa munaychakusqanmanta kay allin noticiam” willakusqaña kachkan hinaspa kay tiempopa tukuyninpas chayaykamuchkanñam (Mat. 24:14; 1 Ped. 4:7). Chayna kaptinpas, Diosmanta yachay munaqkunapaqqa kachkanraqmi salvakunankupaq tiempo. Chayraykum ‘Diospa palabranta willakuna’, hinaspapas chayllam kutinanchik yachay munaq runakunata yanapanapaq (2 Cor. 6:1, 2; 2 Tim. 4:2).
3 Satanasqa manam samanchu runapa ‘sonqonpi tarpusqanchik Diospa palabranta’ imaynatapas chinkachinanpaqqa (Mar. 4:14, 15). Arí, Bibliamanta yachay munaqqa hukmanyarunmanmi ayllunkuna, llamkaqmasinkuna chaynataq hukkunapas paymanta burlakuptinku. Chaylla kutispam ichaqa mana sasachakusunchu yapamanta rimanapaq hinaspa yachay munasqan manaraq chinkachkaptin yanapaytapas.
4. ¿Imatam rurachwan yapamanta watukunanchikpaq?
4 Tanteay ima punchaw hinaspa imay hora kutinaykipaq: Allinpunim kanman, huk tapukuyta ruraspa predicasqanchikmantapacha ima punchaw hinaspa imay hora watukunanchikpaq yachay munaqta niyqa. Tiempoyki kaptinqa, qatiqnin punchawkunallata hinalla parlanaykichikpaqmi niwaq. Ichaqa Bibliamanta yachay munaqta llamkasqanrayku, semanapa tukuyninpi tariptikiqa, yaqapaschá munanqa qatiqnin semana tukuypi watukunaykita. Chaypaqqa allintamá qellqanayki hinaspa kutinaykipaq nisqaykitapas cumplinaykim (Mat. 5:37).
5. ¿Imanasqataq ninchik yachay munaqman chaylla watukuspa Jesuspa kamachisqanta cumplisqanchikta?
5 Achka razonkunam kan yachay munaqkunaman kaqllamanta watukunapaqqa. Arí, “manañam tiempo kanñachu”, chaymi ima punchaw hinaspa imay hora chaylla kutinanchikpaq tanteananchik (1 Cor. 7:29). Diospa gobiernonmanta yachay munaqkunaman chaylla kutispaqa, achka runakunatam yanapasun.