¿Kapuqniyoq kayllapichu ñawiki kachkan?
1. ¿Ima ninantaq Mateo 6:22 nisqanqa?
1 Ñawinchikpa rikusqankunatam yaqa llapanpi rurayta munanchik, chaymi Jesuspa kayna nisqanqa allinpuni: “Ñawiki allinta qawakuptinqa tukuy vidaykim kachkan achkiyniyoq” (Mat. 6:22). Huk rimaypiqa, tukuy kapuqniyoq kaypi mana afanakuspaqa, Diospa munayninta ruranapaqmi astawan kallpanchakusun otaq vidanchikpim puntapi churasun.
2. ¿Imataq cambiarunman kapuqllanchikwan contentakuyninchikta, hinaspa imataq yanapawasun?
2 ¿Munasqallaykipichu ñawiki kachkan? Imapas kapuqllanchikwan contentakuyninchikqa cambiarunmanmi rantinapaq imapas uyarisqanchikwan otaq hukkunapa kapuqninkuta qawasqanchikwanpas. Chaymi allin kanman tiemponchiktawan kallpanchikta hinaspa qollqenchiktapas manaraq usuchichkaspa ‘puntata tanteakuyninchikqa’, tapukunanchiktaqmi sichu Dios serviyninchikpi yanapawasunchu icha manachu (Luc. 14:28; Fili. 1:9-11). Allintaqmi kanman wakin kutikunapi imayna kawsasqanchikta qawakuypas, chaynapi Dios serviypi astawan tiempochakunapaq (2 Cor. 13:5; Efe. 5:10).
3. ¿Imatam yachachiwanchik huk paninchikpa rurasqan?
3 Huk paninchikmi precursor regular kayta qallaykurqa, payqa parte punchawlla llamkaspaqa allintaqmi kanman karqa, ichaqa hinallam tukuy punchaw llamkarqa. Allinta musyakuruspanmi payqa kaynata nirqa: “Manam pipas iskay patrontaqa servinmanchu. Chaymi munasqaykunata saqespay necesitasqaykunallapaq llamkarqani. Musyakururqanim imapas kapuqninchikqa tukuruqlla kasqanta, ñoqañataqmi llumpayta afanakuchkarqani chaykunata maskanaypaq”, nispa. Kapuqllanwan kawsayta atispanmi llamkayninta cambiarurqa, chay rurasqanmi yanaparqa hinalla precursora kananpaq.
4. ¿Imanasqataq kunan tiempopi allinpuni kapuqllanchikwan contentakuyqa?
4 Puchukay tiempopi kawsasqanchikraykum imapas kapuqllanchikwan contentakunanchik. Sapa punchaw pasaptinmi astawan hichpallaña kachkan puchukay tiempo hinaspa mosoq pachapi kawsakuypas (1 Cor. 7:29, 31). Predicanapaq astawan kallpanchakuspaqa salvakusunmi, salvasuntaqmi uyariwaqninchikkunatapas (1 Tim. 4:16).