Listo kasun estudiota qallarinapaq
1. ¿Imaynatam Mateo 28:19, 20 nisqanta kasukuchwan?
1 Jesusmi runakunata ‘yachachinapaq’ kamachiwarqanchik, chaynapi ‘qatiqninkuna kanankupaq’ (Mat. 28:19, 20). Chaymi listo kananchik haykapipas Bibliamanta estudiota qallarinapaq, manam congregacionpa akllasqan punchawkunallapichu. Qatiqninpi consejokunam yanapawanchikman.
2. ¿Pikunamanmi Bibliamanta estudiota munachichwan?
2 Estudiota munachiy. Estudiota astawan munachispanchikmi, hukllatapas tarisun (Ecl. 11:6). ¿Punta watukuyllapi estudiota munachirqankichu? Estados Unidospim huk congregacion, killapi chayta ruranankupaq kallpanchakurqaku. ¡Tarirurqakum 42 estudiokunata! Munachiwaqtaqmi watukusqayki runakunamanpas; paykunaqa yaqapaschá suyachkanku. Hinaptinqa, yapamanta watukuspaykiyá Bibliamanta estudiota munachiy. Mana munaptinkuqa, ama hukmanyaychu, hinallaraqmi watukuwaq kallpanchanaykipaq. Chaymantapas tapuwaqmi vecinoykikunata, aylluykikunata hinaspa llamkaq otaq estudiaqmasikikunata ichapas Biblia estudiayta munanmanku. Biblia estudiachisqayki runakunapapas, ¿kanmanchu yachay munaq amistadninku otaq familianku?
3. ¿Ima sumaq yanapakuytaq kan estudiota qallarinapaq, hinaspa haykapim servichikuchwan?
3 Servichikuy kay sumaq yanapakuyta. Estudiota qallarinapaqmi allinta yanapakun ¿Munawaqchu cheqapmanta yachayta? niq tratado. Kaytaqa saqechwanmi qellqanchikkunata chaskiq otaq mana chaskiqkunamanpas. Anchatam yanapakun negociokunapi, callekunapi, yapamanta watukuspa otaq cartakunawan predicanapaq chaynataq wasipi mana pitapas tarispa saqenapaqpas. Apawaqtaqmi carropi rispayki, rantipakuspayki otaq llamkaynikiman rispayki predicanaykipaqpas. Tukuynin paginanpim pisi rimayllapi qawachin Bibliata imayna estudianamanta, qawachintaqmi Yachachiq librotapas.
4. ¿Munawaqchu cheqapmanta yachayta?, niq tratadota ¿imaynatam servichikuchwan estudiota qallarinapaq?
4 ¿Imaynatam servichikuchwan? Uyarisuqnikiman tratadota qospayki punta kaq paginapi tapukuykunata qawachispayki tapuy: “¿Mayqanmantam astawan yachayta munanki?”, nispa. Chaymantañataq paywan qaway tratadopa yachachisqanta, hinaspa leey otaq pisillapi rimariy tukuynin paginapi Bibliata imayna estudianamanta. Qawachiytaq Yachachiq libropa mayqan paginanpi astawan yachachisqanmanta, hinaspa librota qoykuspayki niy ima punchaw kutinaykipaq chaynapi hinalla parlanaykichikpaq.
5. ¿Imanasqataq haykapipas listo kananchik estudiota qallarinapaq?
5 Predicasqanchik lawpiqa kachkanraqmi Bibliamanta yachay munaq runakunaqa. Wiñay kawsayta tarinankupaq runakunata yanapayqa anchatam kusichiwanchik, haykapipas estudiota qallarinapaq listo kaspaqa chaytam tarisunchik (Mat. 7:13, 14).