Hinallayá ruraychik Cristopa wañukusqantam yuyarisun 5 abrilta
1. ¿Imanasqam Jesuspa wañukusqanta yuyariyqa ancha valorniyoq?
1 Jesusmi nirqa: ‘[Hinallayá] qamkunapas ruraychik ñoqata yuyariwaspa’, nispa (Luc. 22:19). Kaywanmi qatiqninkunata kamachirqa lliw runakunarayku wañusqanta yuyarinankupaq. Wañukusqan tukuy imapi allinninchikpaq kasqanraykum lliw cristianokunapa yuyariyninkuqa ancha valorniyoq, chaymi kay watapiqa apakunqa 5 punchaw abrilta. ¿Imaynatam Jehová Diosta agradecekuchwan chay punchaw hichpamusqanman hina? (Col. 3:15.)
2. Jesuspa wañukusqanta yuyariy ancha valorniyoq kasqanta qawanapaq, ¿imaynatam estudiaywan yuyaymanayqa yanapawanchik?
2 Preparakusun. Ima ruraypas ancha valorniyoq kaptinqa preparakunchikmi. Jesuspa wañukusqanta yuyarinapaqmi sonqonchikta preparasunchik, manaraq wañukuchkaptin paywan tukuy ima pasasqanmanta familianchikwan estudiaspa hinaspa yuyaymanaspapas (Esd. 7:10). Calendarionchikpi hinaspa Sapa punchaw estudianapaq folletopim rikurin imakuna pasakusqanmanta willaq versiculokuna. Chaynataq, 2011 watapi abril-junio Llaqta Cuidaq revistapa 15, 16 paginankunapipas tarinki aswan achka yanapakuyta El hombre más grande sutiyoq libropi maskanaykipaq.
3. ¿Imaynatam predicaspa qawachisun Jesuspa wañukusqan ancha valorniyoq kasqanta?
3 Predicasun. Jesuspa wañukusqanta yuyariy ancha valorniyoq kasqantaqa qawachisuntaqmi, tukuy atisqanchikman hina predicaspanchikpas (Luc. 6:45). Marzo killa 17 sabado punchawmantam enteron pachapi invitasunchik Jesuspa wañukusqanta yuyarina huñunakuyman hamunankupaq. ¿Yaqachu allinta tanteaspa tiempochakuchwan astawan predicanapaq otaq precursor auxiliar kanapaqpas? Familiaykiwan, ¿chaymanta rimawaqchu Familiawan Diosta Yupaychanapaq Tutapi?
4. ¿Imaynatam yanapawanchik Jesuspa wañukusqanta yuyarinapaq huñunakuyman riyqa?
4 ¡Anchatamá kallpanchawanchik Jesuspa wañukusqanta yuyarinapaq huñunakuyman sapa wata riyninchikqa! Salvawananchikpaq sapallan Churinta Diospa qomusqanmanta yuyaymanayqa, kallpanchawaspanchikpas Payta astawan kuyanapaqmi yanapawanchik (Juan 3:16; 1 Juan 4:9, 10). Yanapawanchiktaqmi manaña kikillanchikpaq kawsanapaqpas (2 Cor. 5:14, 15). Chaynataq kallpanchawanchiktaqmi hukkunapa qayllanpi Diosta alabanapaqpas (Sal. 102:19-21). Chaymi Diosta serviqkunaqa ancha agradecesqa suyachkanchik kay 5 abrilta, Señorninchik Jesucristopa ‘wañukusqanmanta [hinalla] willakunanchikpaq’ (1 Cor. 11:26).