Allinta yanapanapaq: ¿imakunatam anotachwan kaqmanta watukunapaq?

‘Kikiki cuidakuy hinaspa allinta yachachiy.’ (1 Tim. 4:16, Señorninchik Jesucristopa Mosoq Testamento.) Timoteoman apostol Pablopa chayna consejasqanqa ñoqanchiktapas unayña otaq chayllaraq Testigo kaptinchikpas yanapawanchikmi Diosmanta allin yachachiq kananchikpaq. Chaypaqmi Diospaq Llamkayninchikpi sapa kuti lloqsimunqa “Allinta yanapanapaq” niq yachachikuy. Chay yachachikuypi consejokunaqa Jehova Diosmanta allin yachachiq kanapaqmi yanapawasun. Imata ruwananchikpaq niwasqanchikman hinam huk killa llapallanchik kallpanchakusunchik. Killa tukuytañataqmi Diosta Servinapaq Huñunakuypi willakusunchik imakuna ruwasqanchikmanta chaynataq imaynata chaykuna yanapawasqanchikmantapas. Kay killapim kallpanchawachkanchik Diosmanta yachay munaqkunaman kaqmanta watukunapaq imakunata anotananchikpaq.

Imanasqataq allinta anotananchik. Kamachisqaqa kanchik manam predicanallapaqchu aswanqa tarpusqanchikta parqochkaq otaq qarpachkaq hina kaqmanta watukuspa Diosmanta yachachinapaqmi (Mat. 28:19, 20; 1 Cor. 3:6-9). Chaypaqqa runamasinchikman kaqmanta watukuspam imamanta willasqanchikman hina otaq imamanta yachay munasqanman hina astawan yachachinanchik. Chaymi Diosmanta yachay munaqta tarispaqa astawan yachachinapaq anotananchik.