Allin yachachiq iñiqmasinchikkunata qatipakusun

Bibliamanta allin yachachiq iñiqmasinchikkunaqa ancha chaninniyuqmi kanku. Wakinkum achka wataña Jehova Diosta servinku. Wakinñataqmi iskay-kimsa watakunallaraq Diosta servispankupas allin yachachiq kanku. Paykunaqa manamá iskayrayankuchu kay tukupay tiempopi lliw iñiqkunata señorninchik Jesucristo qawasqanta hinaspa willakuyninchik ñawparinanpaq yanapakusqantapas (Mat. 28:19, 20). Unayña Diosmanta willakusqankuraykum, Jehova Diospa yanapakuyninwan ima sasachakuykunatapas atipanku (2 Cor. 4:7). Paykunaqa tukuy yachasqankutam hukkunaman yachachiyta munanku, chaymi ñuqanchikqa imayna yachachisqankumanta anchata yachachwan (Sal. 71:18). ¿Imaynatam paykunamanta yachachwan?

Paykunawan Diosmanta willakuspanchik. Chayllaraq Diosmanta willakuqkuna allin yachachiq kanankupaqqa, allin yachachiq iñiqkunapa yanapakuynintam chaskinanku. Anchatamá yachachwan paykunapa imayna willakusqankuta qawaspa. (Qaway “Diosmanta chayllaraq willakuqkunata yanapasun” niq yachachikuyta, chayqa kachkan w15 15/2, pag. 29). ¿Ima yanapakuykunatam chaskirqanki allin yachachiq iñiqmasikiwan Diosmanta willakuq lluqsispayki?

Huk kaqninta niy Diosmanta willakuq kuska lluqsinaykichikpaq. Allin yachachiq iñiqmasinchik unquptinqa, ichapas wakinpiqa estudioykita paypa wasinman apawaq. Yachachiyta tukuruspañataqmi chay iñiqmasinchikta tapuy imayna yachachisqaykimanta hinaspa imapi kallpanchakunaykita nisunaykipaq.

Riqsinaykipaq kallpanchakuy. Chaypaqqa invitawaqmi wasikipi kaqkunawan Dios yupaychaynikichikman hamunanpaq. Tapuy Diosta imayna riqsisqanmanta, imayna yanapasqanmanta, testigo kasqanmantapacha Diospa llaqtan imayna wiñasqanmanta hinaspa Dios serviyninpi tukuy ima pasasqanmanta. Chay iñiqmasinchik unquptinqa wasinmanmi Diosta yupaychanaykichikpaq riwaqchik.

Ama hikutaychu mana atisqankuta ruwanankupaqqa. Allin yachachiq iñiqmasinchikkunaqa, ñuqanchik hinam wakinpiqa ima ruwaypipas allin yachayniyuq kanku (Rom. 12:6-8). Wakinkuqa yuyaqñam kanku, chaymi ichapas qampaq mana tiempochakuyta atinqakuchu. Chaywanpas, allin yachachiq hinaspa Diosman sunqu kasqankumantam anchata yachachwan.