¿Listoñachu kachkanki Jesuspa wañukusqanta yuyarinaykipaq?

1. ¿Imanasqataq ñuqanchikpaqqa Jesuspa wañukusqan punchawta yuyariyqa ancha allin? (Rimarimuytaq Lucas 22:​19, 20 nisqanmantapas).

JEHOVA DIOSTA serviqkunapaqqa Jesuspa wañukusqan punchawta yuyariymi ima punchawmantapas aswan allinqa. Wañukusqan punchawllata yuyarinapaqmi kikin Jesus kamachiwarqanchik (leey Lucas 22:​19, 20). Chay punchaw chayamunantaqa kusisqallañamá suyachkanchik. Imakunarayku ancha allin kasqantayá yachaykusun.

2. ¿Imakunaraykutaq munachkanchik Jesuspa wañukusqan punchaw chayamunantaña?

² Jesuspa wañukusqanta yuyarinapaq huñunakuyman hamuspaqa yuyaymananchikmi imanasqa ñuqanchikpaq ancha allin kasqanta. Yuyarinchiktaqmi ñuqanchikrayku Jesuspa wañukusqanmanta imakunata ruwaspa agradecekunamantapas (2 Cor. 5:​14, 15). Chay punchawqa llapallan iñiqmasinchikkunawan huñunakuspam kallpanchanakunchik (Rom. 1:12). Chay huñunakuymanqa hamunkutaqmi chiriyaruq iñiqmasinchikkunapas. Chaymi wakinqa kuyakuywan chaskiykuptinchik Diospa llaqtanman kutikamunku. Chaymantapas, chayllaraq hamuq runamasinchikkunam imayna kasqanchikta qawaspanku hinaspa sumaq yachachikuyta uyarisqankurayku biblia estudiayta qallarinku. Chaykunaraykum Jesuspa wañukusqanta yuyarinapaq punchaw chayamunantaña munachkanchik.

3. Jesuspa wañukusqanta yuyarinapaq punchawqa, ¿imakuna ruwasqanchikraykum sutilla qawakun enteron pachapi iñiqmasinchikkunawan huk sunqulla kasqanchik? (Qawaytaq fotokunatapas).

³ Jesuspa wañukusqanta yuyarinapaq punchawqa qawakuntaqmi may nacionmantaña kaspapas lliw iñiqmasinchikkunawan huk sunqulla kasqanchik. Enteron allpa pachapim testigokunaqa inti siqaykuyta Jesuspa wañukusqanta yuyarinapaq huñunakunchik. Llapallanchikmi uyarinchik Jesuspa wañusqan imanasqa allinninchikpaq kasqanmanta sumaq yachachikuyta, iskay kutikamam takinchik chaynataq tantatawan vinota haywanakunchik. Chaymantapas, tawa kutikamam “amén” ninchik tawa kutikama mañakusqanchikrayku. Chay punchawqa enteron allpa pachapi iñiqkunam hina chaynallata ruwanchik. ¡Mayna kusisqachá Jehova Dioswan Jesusqa tarikunku enteron allpa pachapi chay punchaw hatunchaptinchik

4. ¿Imakunamantam kay yachachikuypi yachasun?

⁴ Kay yachachikuypim kaykunamanta yachasun: ¿Imakunatam puntamanta chay punchawpaq ruwachkachwanña? ¿Imaynatam hukkunatapas yanapachwan chay punchaw hamunankupaq? ¿Imaynatam chiriyaruq iñiqmasinchikkunata yanapachwan? Chaykunamanta yachayqa yanapawasunmi Jesuspa wañukusqan punchawta listo suyanapaq.

¿IMAKUNATAM PUNTAMANTA CHAY PUNCHAWPAQ RUWACHKACHWANÑA?

5. (1) ¿Imanasqataq yuyaymanananchik Jehova Diospawan Jesuspa ñuqanchikrayku imakuna ruwasqankupi? (Rimarimuytaq Salmos 49:​7, 8 nisqanmantapas). (2) ¿Imatam yacharunki ¿Imanasqataq Jesusqa wañukurqa? niq videonchikta qawasqaykimanta?

⁵ Jesuspa wañukusqan punchawta listo suyanapaqqa yuyaymanananchikmi Jehova Diospawan Jesuspa ñuqanchikrayku imakuna ruwasqankupi, chaynapi agradecekunapaq. Ñuqanchikpurallaqa manamá huchamantawan wañuymantaqa haykaqpas libranakuyta atichwanchu karqa (leey Salmos 49:​7, 8. Qawaytaq ¿Imanasqataq Jesusqa wañukurqa? niq videotapas).a Chayraykum Jehova Diosqa tantiarurqa wañuymanta librawananchikpaq kuyasqan churinta kachamunanpaq. Paykunapaqqa chay ruwayqa mayna sasachá karqa (Rom. 6:23). Ñuqanchikrayku tukuy ima ruwasqankuta yuyarispaqa ancha valorniyuqpaqmi hapisun Jesuspa wañupuwasqanchikta. Qatiqnin parrafokunapim yachachkasunchik Jehova Diospas, Jesuspas ñuqanchikrayku imakunata ruwasqankumanta. Puntatam yachasun imanasqa Jesuslla ñuqanchikrayku wañukunan kasqanmanta.

6. ¿Imanasqataq Jesuslla rantinchikpiqa wañunan karqa?

⁶ Huchamantawan wañuymanta librasqa kanapaqqa señorninchik Jesucristollam rantinchikpiqa wañunan karqa. ¿Imanasqa? Payllamiki Adan hina mana huchayuqqa karqa. Adantaqariki mana pantaqtam Diosqa unancharqa, chaymi payqa atinman karqa wiñaypaq kawsakuyta. Ichaqa huchallikurusqanraykum wañururqa, chaymi mirayninkunapas wañuqlla kanchik. Jesusmi ichaqa taytan hina munarqa Adanpa mirayninkuna wiñaypaq kawsananchikta, chaypaqqa vidantam qunan karqa. Jesusqariki kay allpa pachapi kaspanpas “manam ima huchatapas ruwarqachu nitaqmi pitapas llullakurqachu” (1 Ped. 2:22). Arí, payqa mana ima huchayuqmi wañukurqa. Chaymi vidanqa Adanpa vidan hina ancha valorniyuq karqa (1 Cor. 15:45; 1 Tim. 2:6).

7. ¿Imanasqam Jesuspaqqa wakinpi sasa kanman karqa kasukuynin?

⁷ Kay allpa pachapi kaspanqa Jesusqa taytan Jehova Diostam tukuy imapi kasukurqa. Wakinpim ichaqa kasukuynin sasa kanman karqa. Warmacha kaspanmi pantaq tayta-mamanta kasukunan karqa (Luc. 2:51). Musuchaña kaptinpas musumasinkunach hikutarqaku tayta-mamanta hinaspa Diostapas mana kasukunanpaq. Yuyayniyuq kaptinñataqmi achka kutikama satanas tentarqa Diosta qipanchananpaq (Mat. 4:​1-11). Satanasqa tukuytamá ruwarqa Jesus huchallikunanpaq. Satanasqariki yacharqam Jesus huchallikuruspanqa wañuymanta mana librayta atiwananchikta.

8. ¿Ima sasachakuykunapiraqmi Jesusqa tarikurqa?

⁸ Jesusqa huk sasachakuykunapiraqmi tarikurqa. Diosmanta willakusqanraykum enemigonkuna maskarqaku wañuchinankupaq (Luc. 4:​28, 29; 13:31). Chaymantapas sapa kutim apostolninkuna umanta nanachiq pantaq kasqankurayku (Mar. 9:​33, 34). Wañuchinankupaq hapiruspankupas maqaparqakum chaynataq burlakurqaku. Chaymantañataqmi mana allin runata hina llumpayta ñakarichispa wañuchirqaku (Heb. 12:​1-3). Chaymantapas wañuy patanpi tarikuptinmi taytan Jehova Dios saqirurqa, manañam yanaparqachu. Hinaptinmi sapachallanña Jesusqa wañunankama tukuy ima ñakariyta aguantarqa (Mat. 27:46).b

9. ¿Imaynam tarikunchik ñuqanchikrayku tukuy ima ñakariyta Jesus aguantasqanmanta yuyarispa? (Rimarimuytaq 1 Pedro 1:8 nisqanmantapas).

⁹ Yachamusqanchikman hinam, Jesusqa huchamantawan wañuymanta librawananchikpaq tukuy ñakariykunata aguantarqa. Ñuqanchikrayku Jesucristo tukuy ima ñakarisqanta yuyarispaqa tukuy sunquwanmi astawan kuyanchik (leey 1 Pedro 1:8).

10. ¿Imatam Diosqa aguantanan karqa kay allpa pachaman churinta kachamuspanqa?

¹⁰ ¿Imatam Diosqa aguantanan karqa kay allpa pachaman churinta kachamuspanqa? Yachasqanchikman hinam, Jehova Dioswan churin Jesusqa anchata kuyanakunku (Prov. 8:30). Chaymi kay allpa pachapi Jesus tukuy imawan ñakarisqanta qawamuspanqa taytanqa anchata llakikurqa. Churin Jesusta maqaptinkuqa, burlakuptinkuqa hinaspa llumpayta ñakarichiptinkuqa Diospa sunqunqa maynatachá nanarqa. Tukuy chaykunatam Diosqa aguantarqa.

11. ¿Imaynataq Jehova Diospas tarikurqa churin Jesus wañukuptin?

¹¹ Warmanku wañukuptinqa tayta-mamaqa llumpaytam waqallanku, muspaypi hinam tarikunku. Warmanku kawsarimunanta yachaptinkupas manam imapas sunqunku tiyaykachiyta atinchu. Chayna llumpay llakisqachá Jehova Diospas tarikullarqa 33 watapi ñakarispa churin Jesus wañukuptinqa (Mat. 3:17).c

12. ¿Imamantam estudiananchik manaraq Jesuspa wañukusqan punchaw chayamuchkaptin?

¹² Jesuspa wañukusqan punchaw manaraq chayamuchkaptinmi estudiachkachwanña sapallanchikpas utaq familianchikwanpas Jesuspa wañukusqanmanta rimaq yachachikuykunata. Chaytam tarichwan Guía de estudio para los testigos de Jehová niqpi utaq huk qillqanchikkunapi.d Chaymantapas, leechwanmi 2023 watapaq Jesus tukuy ima pasasqanta bibliapi leenapaq niq yachachikuyta, chayqa kachkan Diospa munayninta ruwananchikpaq huñunakuypi yanapawaqninchik qillqanchikpim. Chaymantapas, qawananchikmi Jesuspa wañukusqanta yuyarinapaq punchawpi lluqsimuq sumaq videonchikta. Sichum tukuy chaykunata ruwasun hinaspaqa hukkunatapas aswan allintam yanapasun chay punchawpaq (Esd. 7:10).

¿IMAYNATAM HUKKUNATAPAS YANAPACHWAN CHAY HUÑUNAKUYMAN HAMUNANKUPAQ?

13. Achka runamasinchikkuna Jesuspa wañukusqanta yuyarinapaq huñunakuyman hamunankupaqqa, ¿imakunatam ruwananchik?

¹³ Chay huñunakuyman achka runamasinchikkuna hamunankupaqqa lliwmanmi invitacionta qunanchik. Chaymantapas, listapim churaruchwan pikunataraq invitay munasqanchikta. Invitachwanmi familianchikta, llamkaqmasinchikta, estudiaqmasinchikta utaq riqsinakusqanchikkunata. Invitacionninchik tukuruptinqa celularnintam chay invitacionta apaykachichwan. Manamá yachanchikchu invitasqanchikmanta hayka runakuna hamunantaqa (Ecl. 11:6).

14. ¿Imanasqataq riqsinakusqanchikmanqa kikinchik invitacionta qunanchik? Rimarimuy kay parrafopi punta apaqmanta.

¹⁴ Amayá piensasunchu: “Kay invitasqay runaqa manachusmi hamunmanchu”, nispaqa. Huk paninchikmi ancha admirasqa tarikurqa mana testigo kaq qusan Jesuspa wañukusqanta yuyarinapaq huñunakuyman rinanpaq niykuptin. ¿Imanasqa? Payqa sapa watam chay huñunakuypaq qusanta invitarqa, ichaqa manam haykaqpas rirqachu. ¿Imanasqataq qusanqa kunanqa riyta munarqaña? Paymi willakurqa punta apaq iñiqmasinchik kikinpuni invitacionta quykusqanmanta. Chaymantam qusanqa sapa wata chay huñunakuyman rirqaña.

15. ¿Imakunamantam tapuwachwan invitacionta qusqanchik runamasinchikqa?

¹⁵ Invitasqanchik wakin runamasinchikkunaqa manachá haykapipas chay huñunakuymanqa hamurqakuraqchu. Chaychá imamantapas tapukuyninku kanqa. Chaymi puntamanta piensachkanaña imamantapas tapuwaptinchik imaynata ninapaq (Col. 4:6). Runamasinchikkunaqa tapuwanchikmanpaschá: “¿Imatam chaypiqa ruwanku? ¿Hayka unaytaq chay huñunakuyqa? ¿Imayna pachasqataq rina? ¿Paganachu yaykunapaqqa? ¿Huñunakuy ukupiqa qullqita qunachu?”, nispa. Chaymi invitacionta qusqanchik runamasinchiktaqa tapuchwan sichu ima tapukuyninpas kasqanmanta, kaptinqa sumaqtam willarinanchik. Chaymantapas qawachichwanmi Jesuspa wañukusqantayá yuyarisun niq videonchikta, utaq ¿Imaynataq huñunakuyniykuqa? niq videonchikta. Atikuptinqa rimarichwantaqmi Kusisqa kawsakunapaq niq libronchikpa 28 yachachikuyninmantapas.

16. Jesuspa wañukusqanta yuyarinapaq huñunakuyman hamuq runakunaqa, ¿imakunamantaraqtaq tapuwachwan?

¹⁶ Chay huñunakuy tukuytapas invitasqanchik runaqa imamantapas yachaytaraqchá munanqa. Yaqapaschá tapuwachwan: “¿Imanasqataq mana pipas tantataqa mikurqachu nitaq vinotapas tomarqachu? ¿Hayka kutitataq kay huñunakuyta watapi ruwankichik? ¿Kaynatachu sapa kuti huñunakuynikichikta ruwankichik?”, nispa. Chay huñunakuypi chaykunamanta yachachimuptinpas invitasqanchik runakunaqa astawanraqchá yachaykuyta munanqaku. Chaykunamanta sumaqta yachachinapaqmi yanapawasun jw.org nisqapi rikuriq “¿Imanasqataq Jehova Diospa testigonkunaqa Jesuspa santa cenanta mana wakin runakuna hinachu yuyarinku?” niq yachachikuy. Tukuytachá ruwana kanqa Jesuspa wañukusqanta yuyarinapaq huñunakuy manaraq chayamuchkaptin, chay huñunakuy horapas chaynataq chay huñunakuy tukuytapas. Chaynapi “wiñaypaq kawsanankupaq” kallpanchakuq runamasinchikkunata allinta yanapanapaq (Hech. 13:48).

CHIRIYARUQ IÑIQMASINCHIKKUNATA YANAPASUN

17. ¿Imatam punta apaqkunaqa ruwananku chiriyaruq iñiqmasinchikkunata yanapanankupaq? (Rimarimuytaq Ezequiel 34:​12, 16 nisqanmantapas).

¹⁷ ¿Imaynatataq punta apaqkunaqa chiriyaruq iñiqmasinchikkunata yanapanmanku chay sumaq huñunakuyman hamunankupaq? Kallpanchakunankum chay iñiqmasinchikkunawan rimanankupaq, chaynapi hinalla kuyasqanchikta yachanankupaq (leey Ezequiel 34:​12, 16). Punta apaqkuna, chiriyaruq iñiqmasinchikkunatayá qayaykuychik utaq watuykuychik. Paykunataqa niychikyá mana qunqarusqaykichikta chaynataq hinalla yanapay munasqaykichiktapas. Chay huñunakuyman hamunankupaqyá niykuychik, hamuptinkuñataqyá kuyakuyllawan chaskiykuychik. Chay huñunakuy pasaytapas hinallayá chay kuyasqanchik iñiqmasinchikkunawanqa parlaychik, hinaspayá tukuy imata ruwaychik Diospa llaqtanman kutimunankupaq (1 Ped. 2:25).

18. ¿Imaynatam llapallanchik chaskiykunanchik huñunakuyman hamuq chiriyaruq iñiqmasinchikkunata? (Rimarimuytaq Romanos 12:10 nisqanmantapas).

¹⁸ Jesuspa wañukusqanta yuyarinapaq huñunakuyman chiriyaruq iñiqmasinchikkuna hamuruptinkuqa llapallanchikmi kuyakuywan hinaspa respetowan chaskiykunanchik (leey Romanos 12:10). Paykunaqariki hinallam Diospa kuyasqan ovejachankuna kanku. Mayna sasachá paykunapaqqa karqa chay huñunakuyman hamuyninkuqa. Nirqakuchá: “¿Ima ninqataq iñiqmasiykunaqa rikuykuwaspa?”, nispae. Chayraykum hukmanyanankupaq hinaqa mana imatapas tapunanchikchu nitaq rimananchikchu (1 Tes. 5:11). Paykunaqariki hinallam iñiqmasinchikkuna kanku, chaymi Diospa wasinman hamuruptinkuqa anchata kusikunchik (Sal. 119:176; Hech. 20:35).

19. ¿Imanasqataq allinninchikpaq Jesuspa wañukusqanta yuyariyninchikqa?

¹⁹ Yachamusqanchikman hinam Jehova Dioswan Jesusqa ñuqanchikrayku tukuyta ruwarqaku. Chayta mana qunqanapaqmi Jesucristoqa kamachiwarqanchik wañukusqanta sapa wata yuyarinapaq. Chay huñunakuyman hamuyninchikqa allinninchikpaqmi, chaynallataqmi runamasinchikkunapaqpas (Is. 48:​17, 18). ¿Imanasqa? Chay huñunakuyman hamuspaqa Jehova Diostawan Jesustam astawan kuyanchik. Chaymantapas, ñuqanchikrayku tukuy ima ruwasqankumantam anchata agradecekunchik. Iñiqmasinchikkunawanpas huk sunqullam kanchik. Hinaspapas, runamasinchikkunamanmi willanchik hamuq tiempopi kusisqa kawsakunankupaq imata ruwanankumanta. Chaynaqa, kuyasqa wawqi-panillaykuna, manaraq chay punchaw chayamuchkaptinyá tukuy imata ruwasun listo kanapaq. Chay sumaq huñunakuytaqariki watapim huk kutillata ruwanchik.