Politicokunapa nisqantaqa manañam creenkuchu | ¿Imatam biblia nin?

Kay 2024 watapim enterollan mundopi kanqa achkallaña nacionpi votacion presidentenkuta akllanankupaq. Ichaqa, yaqa lliw runakunam politicokunapa nisqantaqa manaña creenkuchu.

• Estados Unidos nacionpi runakunata tapuptinkum achka runakuna nirqaku: “Yaqa lliwmi politicokunaqa ima cargomanpas yaykuyta munanku kikillankupaq imatapas munaspa, manam llaqta runata yanapayta munaspachu”, nispa (centro de investigación Pew Research Center, 19 de septiembre de 2023).a

Yaqa lliwmi jovenkunapas politicokunapa nisqanpiqa manaña confiankuñachu.

• Riqsisqa periodicopim kaynata nin: “Achka colegiopi warmakunam munachkanku kay pachapi sasachakuykunata imayna allicharuyta. Ichaqa paykunata tapuptinkum willakunku politicokunaqa mana kasuy munasqankuta”, nispa (The New York Times, 29 de enero de 2024).

• Huk riqsisqa periodicopipas kaynatam nin: “Jovenkunata tapuptinkum ninku, politicokunapi confianankumantaqa youtuber runakunapi astawan confiasqankuta” (The Korea Times, 22 de enero de 2024).

Chaynaqa, ¿yaqachu politicokuna hawka kawsanapaq haykallapipas allichayta atinqaku?¿Pikunapiñataq confiachwan?

¿Pipa nisqantataq qamqa creenki?

Allintam tantiananchik pi runapipas confianapaqqa. Bibliapipas niwanchikmi: “Mana yuyayniyuq runaqa tukuy ima nisqankutam chaylla creerun, yuyayniyuq runam ichaqa imapaqpas allinta tantian”, nispa (Proverbios 14:15).

• Sichu munanki yachaykuyta nisqanku cierto utaq llulla kasqanta hinaspaqa leeykuwaqmi “Cómo protegerse de la información falsa” sutiyuq yachachikuyta.

Chaymantapas, imatapas allinta ruwanankupaq kallpanchakuq politicokunapas manam lliw sasachakuyninchikta chinkachiytaqa atinmankuchu. Chaymi bibliapipas kaynata niwanchik:

• “Kamachiqkunapiqa amayá hapipakuychikchu. Runakunapipas amayá hapipakuychikchu, paykunaqa manam salvaytaqa atiwachwanchu”, nispa (Salmos 146:3).

Confianapaq gobierno

Bibliapim niwanchik confiakunapaq kamachiqta Diosninchik nombrarusqanmanta: Payqa señorninchik Jesucristom (Lucas 1:32, 33). Jesustam Diosninchik churarun hanaq pachapi kaq gobiernonpi kamachiq kananpaq (Mateo 6:10).

• Imanasqa Jesuspi confianamanta hinaspa sasachakuykunata chinkachinanpaq imakuna ruwananmanta yachanaykipaqmi leeykuwaq “¿Pitaq Diospa munaychakuyninpi kamachiq kanqa?” hinaspa “¿Imaynañam Jesus kamachiptin kawsakusun?” sutiyuq yachachikuykunata.