¿Sapaqchu Jehova Diospa testigonkunapa bibliankuqa?
Jehova Diospa testigonkunaqa achka bibliakunatam kikinku estudianankupaq servichikurqaku. Ichaqa allinpaqmi qawanku Traducción del Nuevo Mundo de las Santas Escrituras niq bibliata, kay bibliaqa tukuy rikchaq rimaymanmi tikrasqa kachkan, chaypiqa Diospa sutinmi rikurin chaymantapas chiqap kaqtam yachachin hinaspapas chaylla entiendenapaqmi.
Diospa sutinmi rikurin. Wakin bibliakunapiqa manam qillqankuchu Diospa sutintaqa. Kaypi yuyaymanay, tikrasqanku huk kaqnin bibliapim rikurin chay biblia lluqsinanpaq yanapakuq qanchis chunka masnin runakunapa sutin, ichaqa manam huk kutillatapas rikurinchu Diospa sutin Jehova Diosqa.
Traducción del Nuevo Mundo niq bibliapim ichaqa, bibliata chayllaraq qillqasqanku tiempopi hina Diospa sutinqa maymi kananpi qanchis pachak masnin kutita rikurin, manam kay bibliata tikraqkunapa sutinkuchu.
Imam kaqtam yachachin. Wakin bibliakunaqa manam allintachu imamantapas yachachin, chayna kasqanmanta cuentata qukunapaq qawarisun Mateo 7: 13 nisqanta, chaypim nin: “Kichki punkuntayá yaykuychikqa, hatun punkunta hinaspa hatun ñannintaqa richkanku infiernomanmi”, nispa. Qallariypi qillqasqankupiqa manam ‘infiernoman’ nispachu qillqarqaku aswanqa “wañuyman” nispam. Bibliata tikraqkunaqa yaqachusmi piensarqaku mana allin runakunaqa infiernopi wiñaypaq ñakarichisqa kasqankuta. Bibliam ichaqa mana chaynatachu yachachin. Chaymi Traducción del Nuevo Mundo niq bibliata tikraqkunaqa ñawpaqpi kasqanman hina “wañuyman” nispa tikrarunku.
Manam sasa entiendeychu. Imam kaq tikrasqa kasqan allin kaptinpas allintataqmi entiendekunanpas. Chayna kasqanmanta qawasunchik. Achka bibliakunapim Mateo 5:3 nisqanta imam kaqllata tikranku, chaypim nin: ‘Chika samiyuqmi kanku chay chiqap wakchakunaqa’, nispa. Chayna nisqantaqa manañam kay tiempopi runakunaqa allintañachu entiendenku. Chayraykum Traducción del Nuevo Mundo niq bibliata tikraqkuna kayna niqtaña tikrarunku: “Mayna kusisqam Diosta maskaqkunaqa”, niqta.
Traducción del Nuevo Mundo niq biblia Diospa sutinmanta rimaspan hinaspa imam kaqta yachachispanpas manam chayna ruwasqa kasqallanwanchu riqsichikun aswanqa mana qullqillapaq aypukusqanwan. Chaywanmi wara-waranqantin runakuna kikinkupa rimayninkupi bibliata leeyta atinku, rantinankupaq qullqinku mana kaptinpas.