¿Imanasqataq Jehova Diospa testigonkunaqa mana rinikuchu llaqtakunapi fiestakunaman?
¿Imaynatam Jehova Diospa testigonkunaqa tantianiku ima fiestamanpas rinaykupaq utaq mana rinaykupaqpas?
Testigokunaqa ima fiestamanpas manaraq richkaspam utaq festejachkaspam bibliapi ima nisqanta qawariniku. Wakin fiestakunaqa bibliapi yachachikuyninkunapa contranpim kachkan. Chayna fiestakunataqa testigokunaqa manam festejanikuchu. Ichaqa wakin fiestakunamantaqa bibliaqa manam imatapas ninchu. Chayta festejanaykupaqqa utaq mana festejanaykupaqqa sapakamañam tantiakuniku. ‘Kallpanchakunikum Diospa […] qayllanpi allin concienciayuq kanaykupaq’ chaynataq runamasinchikkunata mana hukmanyachinaykupaq (Hechos 24:16).
Qatiqninpim kachkan tapukuykuna. Chay tapukuykunawanmi allinta tantiakuniku ima fiestatapas festejanaykupaq utaq manapas.a
¿Kay fiestaqa bibliapa yachachikuyninkunapa contranpichu kachkan?
Bibliapim nin: “Jehova Diosqa kaynatam nin: ‘Paykuna ukumantayá lluqsiychik, hinaspayá paykunamanta rakikuychik, amañayá hapiychikchu millakuypaq kaqtaqa’”, nispa (2 Corintios 6:15-17).
Jehova Diospa testigonkunaqa manam rinikuchu bibliapi yachachisqanwan mana tupaq fiestakunamanqa. Chaymi qatiqninpi qawasunchik ima fiestakunata mana ruwasqaykumanta.
Taytacha-mamachakunata yupaychanapaq fiestakuna. Jesusmi nirqa: “Jehova Diosllaykitam yupaychanaykiqa, payllatataqmi servinaykipas”, nispa (Mateo 4:10). Diospa kayna nisqanta kasukuspaykum testigokunaqa “navidadta”, “domingo de pascua” nisqan fiestakunataqa mana festejanikuchu. Kay fiestakunataqa ñawpaqtaqa rikurichirqaku taytacha-mamachakunata yupaychanankupaqmi, chayraykum mana festejanikuchu. Chaynataqmi qatiqnin fiestakunatapas mana festejanikuchu:
Inti Raymi. Kay fiestataqa ruwanku taytacha intipaqmi. Ñawpa tiempopi inkakunaqa taytachanku intipaqmi wawakunatapas hinaspa animalkunatapas wañuchipuqku (El hombre en busca de Dios pag 59. parr 32, 33).
Ganadota qaykuy. Kay fiestapiqa sallqakunamantam ganadonkuta huñunku qarawispanku, tususpanku hinaspa takispanku. Hinaspapas urqukuna atiyniyuq kasqanta piensaspankum urqukunaman pagaputa qunku ganadonkuta waqaychasqanrayku (libro Fiestas populares tradicionales de Perú pag 54).
Cruzkunapaq fiesta. Kay fiestaqa qallarin urqukunamanta cruzkunata wantumusqankuwanmi. Huknin cruzqa 8 metro sayayniyuqmi. Chaymantañataqmi cargoyuqkuna piña torokunata pusachimunku pukllachinankupaq [...]. Kay fiesta tukuruptinñataqmi tragota tomaspanku hinaspa tususpanku kaqmanta chay cruzkunata urqukunaman kutichinku. Llakisqallañam kutichinku. Urqumantam warmikuna kutimunku waqastin hinaspa kaynata rimastin: “Kunanqa sapallanchikñam kachkanchik, mana taytayuq, urqupi taytanchikta saqiramuspa”, nispa (libro Fiestas populares tradicionales de Perú pag. 63).
Allin suerteyuq kanapaq utaq imanchikpas allin kananpaq ruwasqanku fiestakuna. Bibliapim nin Jehova Diosta saqiruq runakuna ‘Suerte qukuq taytachapa mesanpi tukuyta churasqankumanta’ (Isaias 65:11). Bibliapi chayna nisqanraykum qatiqnin fiestakunataqa mana festejanikuchu:
Santiago utaq animalkunata cintachiy. Kay fiestapiqa ganadokunatam cintachinku hinaspa marcanku. Chaytaqa ruwanku taytacha Santiago ganadonkuta mirachinanpaqmi hinaspa llaqtata bendecinanpaqmi (La fiesta del Santiago, donde el ganado se entrega al señor de los cerros, RPP).
Yacu Raymi (Fiesta del agua). Kay fiestataqa sapa watam agosto killapi ruwanku. Runakunam creenku 2 de agosto punchawta allpa kichakusqanta hinaspa yakuta munasqanta chaynapi allin kawsaykunata qispichinanpaq. Creenkum allpa qawanta kacharisqanku yakuqa taytachanku wamanipa qari kayninmanta lluqsimuq kasqanta. Chayraykum hatun fiestata ruwanku pachamama allinta rurunanpaq hinaspa taytachanku wamanita kusichinanpaq (libro Fiestas populares tradicionales de Perú pag 55).
Wañusqakunapaq ruwasqanku fiestakuna. Bibliapiqa ninmi wañukuspanchikqa manaña maypipas kawsasqanchikta (Ezequiel 18:4, willakuynin). Chayraykum Jehova Diospa testigonkunaqa wañukuqpa almanta yuyarinankupaq fiesta ruwasqankumanqa mana rinikuchu. Chaymi qatiqnin fiestakunataqa mana ruwanikuchu:
Wañusqakunata yuyarinapaq punchaw. Chay punchawtaqa riqsinkutaqmi todos los santos nispa. Kay punchawpim llapallan wañusqakunata yuyarinku. Nueva Enciclopedia Catolica nisqan qillqapi willakusqanman hinaqa, ñawpaq tiempopi runakunaqa creeqkus chay punchaw purgatoriopi kasqankumanta almakuna lluqsimuspanku brujaman, sapoman utaq imamanpas tikrakuspa ñakarichiqnin runakunata manchachisqanta (New Catholic Encyclopedia).
Chuseok. Kay fiestataqa Corea nacionpim ruwanku. Huk qillqapa nisqanman hinaqa, chay fiesta punchawmi “wañusqakunapa almanpaq mikuykunata hinaspa vinota churapunku”. Chay ofrendakunataqa churanku “wañuqkunapa alman huklawpi hinalla kawsasqanta piensaspankum” (The Korean Tradition of Religion, Society, and Ethics [La tradición coreana de la religión, la sociedad y la ética]).
Demoniokunapaq fiestakuna. Bibliapim nin: “Amam pipas kanqachu qawaqqa, qatipaqqa, imapas pasananmanta yachaqtukuqqa, layqa ruwaqqa, brujoqa, qayaqkunaman utaq qawaqkunaman riqqa nitaq wañuqkunawan rimaqqa. Jehova Diosqa chiqninmi chaykuna ruwaq runataqa”, nispa (Deuteronomio 18:10-12). Chayraykum Jehova Diospa testigonkunaqa mana chaykunataqa ruwanikuchu. Manataqmi maki qawaq utaq naipeskunata qawaqkunataqa tapukunikuchu. Chaymantapas halloween fiestatapas manam ruwanikuchu, manataqmi qatiqnin fiestakunatapas ruwanikuchu:
Danzante de tijera. Chaypi tusuqkunaqa urqukunapa, pachamamapa atiy qusqanwansi tukuymanata pawaspa tusunku. Chayraykutaqsi manchakuypaq kaqkunatapas mana imanakuspallanku ruwanku (Ministerio de Cultura del Peru, danza de las tijeras).
Manataqmi festejanchikchu Moisesman kamachikuykuna qusqanpi fiestakunataqa, chaykunataqa Jesus wañukusqanraykum manaña ruwanachu. Bibliapim nin: “Cristopa wañukusqanwanmi Moisespa chaskisqan kamachikuykunaqa tukun”, nispa (Romanos 10:4). Moisespa chaskisqan kamachikuykunaqa kunankamapas yanapawanchikmi, ichaqa manañam chaypi nisqan fiestakunataqa ruwanchikñachu. Chay fiestakunataqa ruwarqaku Jesus kay pachaman hamunanta suyaspankum. Chaynata ruwaspankum yachananku karqa Jesus imakunata ruwananmanta. Bibliapim nin: “Tukuy chaykunaqa hamuq kaqkunapa llantuyllanmi, chaykunaqa Cristopim cumplikun”, nispa (Colosenses 2:17). Chaymi kay pachaman Jesus hamurusqanta yachasqanchikrayku Jehova Diospa testigonkunaqa manaña qatiqnin fiestakunataqa ruwanikuñachu.
Rosh Hashaná. Chayqa Judiokunapa calendarionpi watapa punta kaq punchawninmi. Ñawpaq tiempopiqa Diospaqmi ofrendakunata chay punchawqa kañapuqku (Numeros 29:1-6). Ichaqa, señorninchik Jesucristopa wañukusqanwanmi Diospaq animalkuna ‘wañuchiyqa hinaspa imakunapas quyqa’ tukurqaña (Daniel 9:26, 27). Chaymi chaykunataqa yanqaña ruwachwan, Diospaqqa mana valorniyuqñam.
¿Ruwasqanku fiestaqa religionkuna hukllawakunankupaqchu kachkan?
Bibliapim nin: “¿Chaynallachu kanman Diospi iñiq runaqa Diospi mana iñiq runawanqa? ¿Imatataq Diospa wasinpiqa taytacha-mamachakunaqa ruwanman?”, nispa (2 Corintios 6:15-17).
Jehova Diospa testigonkunaqa runamasinchikkunawanqa hawkam kawsakuniku. Hinaspapas respetanikum ima religionniyuq kanankupaq akllakuptinkupas. Ichaqa, manam chayraykuchu pantay religionpa fiesta ruwasqankupiqa chapukuniku. Chaymi qatiqnin fiestakunataqa mana ruwanikuchu.
Ima religionmantaña kaspapas huk sunqulla kanankuta munaspanku fiestakuna. Jehova Diosmi ichaqa llaqtanta kaynata nirqa: “Amam paykunawanqa imata ruwanaykichikpaqpas tantianakunkichikchu nitaq taytacha-mamachankuta yupaychanaykichikpaqpas ninkichikchu [...]. Taytachankunata yupaychaspaykichikqa sasachakuypim kankichik”, nispa (Exodo 23:32, 33). Arí, Diosqa manam munarqachu serviqninkuna huk religionpi kaq runakunawan hukllawakunankutaqa. Chayraykum testigokunaqa kay qatiqnin fiestakunataqa mana ruwanikuchu:
Huchamanta wanakunapaq punchaw utaq día Nacional de Arrepentimiento. Kay punchawta yuyariqkunaqa llapallankum Jesuspi creenku ima religionpiña kaspankupas. Papua Nueva Guinea sutiyuq nacionpi kamachiqmi kaynata nirqa: “Kay fiestaqa allinmi Jesuspa yachachisqanman hina llaqtamasinchikkuna kawsakunankupaq”, nispa (The National, periodico de Papúa Nueva Guinea).
Vesak. Chayqa budismo religionpa aswan riqsisqa fiestankum. “Chay fiestapim yuyarinku Budapa nacesqanta, yachay haypasqanta hinaspa ñakariymanta librakusqanta” (Diccionario de religiones comparadas).
Vesak fiesta
Bibliata mana kasuspanku costumbreman hina festejasqanku fiestakuna. Jesusmi ñawpaq tiempopi religiosokunata kaynata nirqa: “Costumbrekichikta ruwasqaykichikraykum Diospa palabranta yanqacharunkichik”, nispa. Nirqataqmi paykunapa yachachisqanqa yanqapaq kasqanta, chaynataqa nirqa ‘runakunapa kamachisqallanta yachachisqankuraykum’ (Mateo 15:6, 9). Chaymi testigokunaqa runakunapa costumbrenraykuqa Diospa nisqanta qipanchaytaqa mana munanikuchu, chayraykum kay qatiqnin fiestakunataqa mana ruwanikuchu:
Niño Occeta Rey Magokuna yupaychasqankumanta. Kay fiestataqa Huancavelica lawpim ruwanku. Chaypiqa yuyarinku 3 magokuna Jesus wawa kaptin watukusqankutam. Chawpi punchawtam chay 3 magokunaqa achkallaña sirvientenkupiwan callekunapi purinku, hinaspam sapa esquinapi runakunata ninku Jesusta maskasqankumanta. Plazaman chayaruspankuñataqmi samarinku biblioteca municipalpa ñawpaqninpi Jerusalenmanpas chayaruchkanmanku hina. Chaypim Jesusmanta tapukunku, hinaspam iglesia San Franciscopa ñawpaqninpi tariruspa yupaychanku, mamam Mariatapas hinaspa Joseytapas yupaychankum. Chaymantañataqmi ripukunku. Paqarintinñataqmi Mariata, Joseyta hinaspa Jesusta procesionpi callekunapi purichinku. Llapallankum “Los Pastores” nisqapi tusunku. Chaypiqa kantaqmi mascarayuq qarikunapas, paykunatam ninku “Kichka Machus” nispa. Paykunam runakunata asipayaspa purinku (libro Fiestas populares tradicionales de Perú pag. 62).
Mamacha asuncionpa punchawnin. Kay fiestataqa ruwanku Jesuspa maman Maria aycha cuerpontin hanaq pachaman apasqa kasqanta piensaspankum. Diccionario de religiones comparadas qillqapim nin: “Kay fiestaqa rikurirqa Jesuspa wañukusqanmanta unay watakuna qipatañam. Bibliapiqa manam ninchu Maria aycha cuerpontin hanaq pachaman apasqa kasqanmantaqa”, nispa.
Mamacha concepcionpa punchawnin. Enciclopedia Católica Online qillqapim nin Maria wiksayakusqanta yuyarinapaq fiesta ruwanapaqqa bibliapi mana nisqanta. Chayraykum nichwan kay fiestataqa catolico runakuna qallarichisqanmanta.
Cuaresma. Kay fiestapim penitenciata ruwanku hinaspa ayunanku. Huk qillqapa nisqanman hinaqa kay fiestataqa 325 watamanta qipatañam qallarichirqaku, biblia qillqay tukusqankumanta iskay pachak watakuna pasaruptinña. Cuaresma qallaykuptin Miercoles de Ceniza punchawmantam hina chay qillqa nin: “Urbano II sutiyuq runam concilio de Benevento de 1091 watapi kamachirqa ‘imposición de la ceniza’ nisqanwan qallaykunanpaq”, nispa. (Enciclopedia universal ilustrada europeo-americana).
Semana santa. Chay semanam cruzta qipirachispa huk runata Huamanga callekunapi purichinku Jesucristo imayna wañusqanta yuyarinankupaq. Domingo punchawtam chay fiestaqa qallarin. Chay punchawmi asnochapi sillakuykuspa Jesus llaqtaman yaykun. Sapa punchaw Jesuspa ima ruwasqantam actuanku. Semana tukuy domingo punchawtañataqmi hatun fiestata ruwanku. Kawsariramuq Jesustam procesionpi callen-callen purichinku. Acuchimay urqumantam piña torokunata plaza lawman kachaykamunku (libro Fiestas populares tradicionales de Perú pag. 54).
¿Ruwasqanku fiestaqa runatachu hatunchan, huk organizaciontachu icha nacionninkupa banderantachu?
Bibliapim nin: “Jehova Diosmi nin: ‘Ñuqa Jehova Diosta saqiwaspan runallapi hapipakuqqa ñakasqayá kachun, runapa kallpallanpi hapipakuqqa ñakasqayá kachun’”, nispa (Jeremias 17:5).
Testigokunaqa runakunata yanapaspaykupas utaq paykunapaq Diosta mañakuspaykupas manam pitapas hatunchanikuchu. Chayraykum runakunata hatunchanankupaq fiestakuna ruwasqankumanqa mana rinikuchu. Manam chaqrukunikuchu kayna fiestakunapiqa:
Autoridadta utaq runakunata hatunchanankupaq fiestakuna. Bibliapiqa ninmi runakunapiqa mana hapipakunapaq. Ninmi: “Allinlla kayta munaspaykichikqa amayá runapiqa hapipakuychikchu. Runaqa sinqaykichikta yaykuq wayra hinallam”, nispa (Isaias 2:22). Chayraykum kamachiqkunapa utaq pipas santon festejaptinqa mana rinikuchu, chayqariki runata hatunchay hinam.
Banderapa punchawninta yuyarinankupaq fiesta. Jehova Diospa testigonkunaqa manam banderapa punchawnintaqa festejanikuchu. ¿Imanasqa? Bibliapim nin: “Karunchakuychikyá taytacha-mamachakunata yupaychaymantaqa”, nispa (1 Juan 5:21). Wakin runakunaqa ninkum: “Banderata saludayqa manam taytacha-mamachata yupaychay hinachu”, nispa. Ichaqa, Carlton Hayes sutiyuq runam nirqa llapallan nacionpi runakunaqa huk nacionkunamanta aswan allinpaq hapikuspanku banderankuta adorasqankumanta.
Santopaq hapisqanku runakunata yupaychanankupaq fiesta. ¿Ima nirqataq apostol Pedro huk runa ñawpaqninpi qunqurakuykuptin? Bibliapim kaynata willawanchik: “Pedrom ichaqa hatarichirqa: ‘¡Sayariy! Ñuqapas qam hina runallam kani’, nispan” (Hechos 10:25, 26). Pedropas, wakin apostolkunapas manam munarqakuchu runakuna adoranankutaqa. Chayraykum Jehova Diospa testigonkunaqa mana taytacha-mamachakunataqa yupaychanikuchu nitaq santopaq hapisqanku runakunatapas. Chayraykum mana festejanikuchu qatiqnin fiestakunataqa:
Día de Todos los Santos. Año cristiano sutiyuq qillqapa nisqanman hinaqa, kay punchawqa llapallan santopaq hapisqanku runakunatam yuyarinku fiestata ruwaspa. Hina chay qillqapitaqmi nin ima watamanta qallarisqanqa mana yachakusqanta.
Mamacha Guadalupepa punchawnin. Chay fiestataqa Mexico nacionpim ruwanku. Ninkum Guadalupeqa “Mexico nacionpa patronan” kasqanta. Chay nacionpi runakunaqa ninkum payqa Jesuspa mamam Maria kasqanta. Ninkum Maria chakrapi llamkakuq runaman 1531 watapi rikuriykusqanta (Enciclopedia Guadalupana).
Mamacha Guadalupepa punchawnin
Cumpleaño utaq santo. Huk libropa nisqanman hinaqa “wawatam huk santopa sutinwan sutichanku bautizakuptin utaq confirmacionta ruwaptinku. Cumpleañonta utaq santonta ruwaspankuqa chay santopaqmi fiestata ruwachkanku” (Celebrating Life Customs Around the World—From Baby Showers to Funerals [Costumbres de todo el mundo para celebrar la vida: desde baby showers hasta funerales]).
Politica nisqanwan tupaq hatun fiestakuna. Bibliapim nin: “Runakunapi hapipakunamantaqa Jehova Diospi hapipakuymi aswan allinqa”, nispa (Salmos 118:8, 9). Chaymi testigokunaqa politica nisqanwan tupaq hatun fiestakunapiqa mana chaqrukunikuchu. Chay fiestakunaqariki runakunatam creechin runalla imapas sasachakuyta allichay atinanmanta. Testigokunam ichaqa creeniku Jehova Diospa gobiernollan kay allpa pachata kamachispan tukuy mana allinta chinkachinanmanta (Romanos 2:11; 8:21). Chayraykum runakuna marchata ruwaptinkupas mana rinikuchu, nitaq mayqin partidomanpas sayapakunichu. Chayraykutaqmi Dia Internacional de la Juventud, Dia Internacional de la Mujer, Dia de la Emancipación nisqankunata ruwaptinkupas mana celebranikuchu.
Fiesta ruwasqankuqa, ¿nacionninkutachu utaq kastankutachu hatunchan?
Bibliapim nin: “Diosqa manam pimanpas sayapakunchu, payqa chaskinmi lliw nacionkunapi respetaqnin hinaspa allin ruwaq runataqa”, nispa (Hechos 10:34, 35).
Jehova Diospa testigonkunaqa yachasqayku nacionta respetaspaykupas manam chaqrukunikuchu llaqtaykuta utaq nacionniykuta hatunchanankupaq fiestakunapiqa.
Soldadokunata hatunchanankupaq punchaw. Jesusqa llapallanchik hawkalla kawsakunanchiktam munan. Chayraykum qatiqninkunata nirqa: “Ñuqam ichaqa nikichik enemigoykichikkunata hinalla kuyanaykichikpaq hinaspa ñakarichisuqnikichik runakunapaqpas Diosta mañakunaykichikpaq”, nispa (Mateo 5:44). Chayraykum Jehova Diospa testigonkunaqa soldadokuna hatunchaq fiestakunataqa mana festejanikuchu nitaq qatiqninpi fiestakunatapas:
Fiesta patronal de San Pedro y San Pablo. Kay fiestapiqa Ancashpim Piscobamba llaqtaman achka llaqtakunamanta rispanku callenkunapi, llaqtankupi takisqankuta takispa hinaspa tususqankuta tususpanku purinku. Chaymantañataqmi actuacionta ruwanku Atahualpata imayna hapisqankuta hinaspa wañuchisqankuta yuyarinankupaq (libro Fiestas populares tradicionales de Perú pag. 43).
Nacionpi ñawpaqta imakuna pasakusqanta utaq huk nacionpa manaña ñakarichisqan kasqankuta yuyarinankupaq fiesta. Jesusmi qatiqninkunamanta nirqa: “Ñuqaqa manam kay pachapi runakuna hinachu kani, chaynam paykunapas mana kay pachapi runakuna hinachu kanku”, nispa (Juan 17:16). Testigokuna nacionniykupi ñawpaqta ima pasasqanmanta yachaspaykupas, manam festejanikuchu kayna fiestakunataqa:
28 de Julio punchawta. Chay punchawpim Peru nacion libreña kasqanta festejanku. Kay fiestataqa enteron julio killam ruwakun. 28 de julio fiestataqa ruwanku chay punchawpi 1821 watapi Jose de San Martin riqsisqa runa España nacionpa makinmanta Peru nacionta librasqanraykum. Chay killapiqa Peru nacionniyuq runakunam kaykunata ruwanku librasqaña kasqankuta festejanankupaq: Banderanku colorniyuq escarapelatam qasqunkupi churakunku, wasinkupim banderankuta watanku, escuelapi kaqkunapas, colegiopi kaqkunapas, militarkunapas desfilankum. (La República, ¿Qué celebra HOY en Perú este 28 de julio? Historia, resumen y significado de las Fiestas Patrias).
Yawar Fiesta. Kay fiestataqa julio killapim ruwanku. Kay fiestapiqa condortam toropa wasanman watarunku. Torotam tupachinku español runakunawan, condortañataqmi llaqta runawan. Chayraykum condorta toropa wasanman watanku chaynapi kacharikuyta munaspan torota tuspapananpaq, chayqa llaqta runata yuyarichin español runakunamanta librakusqankuta. Runakunapas punchunkuwan lancespankum torota astawan piñachinku. Condor wañuruptinqa runakunam ninku: “Manam allinchu kay wataqa kasun, imach kanqa”, nispa. Tutapiñataqmi antorchakunawan callenta purinku hinaspa cuetekunata tuqyachinku (libro Fiestas populares tradicionales de Perú pag. 47).
Fiesta ruwasqankupiqa, ¿llumpaytachu tomakunku utaq huchapakunku?
Bibliapim nin: “Ñam qamkunaqa runakunapa munasqanta ruwarunkichikña, qamkunaqa mana pinqakuspam mana allinkunata ruwarqankichik, sunquykichikpa mana allinkuna munapayasqankunatam ruwarqankichik, sinkakuyllapim purirqankichik, pinqakuypaq fiestakunapim purirqankichik, huñunakuruspa tomaykunapim purirqankichik hinaspapas taytacha-mamachakunatam yupaycharqankichik, chayqa millakuypaqmi”, nispa (1 Pedro 4:3).
Bibliapi chaynata nisqanraykum testigokunaqa mana rinikuchu llumpayta tomakuspanku fiestakunata ruwasqankumanqa. Testigokunaqa huñunakunikum amistadniykuwan, pipas tragota tomaspanqa allin tantiowanmi asllata toman. Bibliapi kayna nisqantam kasukuniku: “Mikuspaykichikpas, tomaspaykichikpas utaq imataña ruwaspaykichikpas llapallanta ruwaychik Dios hatunchasqa kananpaq”, nisqanta (1 Corintios 10:31).
Chayraykum Jehova Diospa testigonkunaqa carnaval fiestapi utaq chayman rikchakuq fiestakunapiqa mana purinikuchu. Chay fiestakunapiqariki huchapakuyllañam kakun. Rimarisun Carnaval Ayacuchanomanta. Kay fiestapiqa runakunam tusukunku, takikunku hinaspa tomakunku. Akllankutaqmi pinqaypaq kaqkunata ruwaspan asichikuq runatapas. Sipaskunapas “reina del Carnaval” kanankupaqmi concursanku (libro Fiestas populares tradicionales de Perú pag. 54).
Jehova Diospa testigonkunaqa Diosta mana yupaychaq aylluykupa fiesta ruwasqankupi mana kaspaykupas, ¿hinallachu paykunataqa kuyaniku?
Arí, paykunataqa hinallam kuyaniku. Bibliapipas yachachiwankum llapallan aylluykuta kuyanaykupaq hinaspa respetanaykupaq (1 Pedro 3:1, 2, 7). Fiestakuna ruwasqankupi paykunawan kuska manaña kaptiykum wakinpiqa piñakunmanku utaq manaña kuyasqaykuta piensanmanku. Chayraykum paykunamanqa kuyakuyllawan willaniku imanasqa chay fiestakunata mana festejasqaykumanta, kuyasqaykuta yachanankupaqtaqmi imallatapas ruwaykapuniku, hinaspaykupas huk punchawkunapi kuska kanaykupaqmi tiempochakuniku.
¿Testigokunaqa harkakunikuchu runakunata ima fiestankutapas manaña ruwanankupaq?
Manam. Sapakamam tantiakunanchik Jehova Diosta kasukunapaq utaq mana kasukunapaqpas (Josuey 24:15). Ima religionniyuqña kaptinkupas runamasiykutaqa respetanikum (1 Pedro 2:17).
a Kay yachachikuypiqa testigokunapa mana festejasqanku lliw fiestakunachuqaya kachkan. Manataqmi fiestamanta allinta tantiakunapaq bibliapa lliw textonkunachu kachkan.