Imaynatam runakunapa llamkana sitiokunapi allinta predicachwan
1. Punta kaq cristianokuna hina, ¿imaynatam tiemponchikpi cristianokunaqa predicachkanku runakunapa llamkasqan sitiopi, hinaspa tarinkuchu uyariy munaqkunata?
1 Jesuspa punta kaq qatiqninkuna hina, kay tiempopi cristianokuna yachachiyta munanku maypipas tarikuq runakunaman sumaq willakuykunata (Hech. 16:13; 17:17; 20:20, 21). Runakunapa llamkasqan sitiopi predicanankupaq kallpanchakusqankurayku uyariy munaqkunata tarichkanku, manapaschá wasin-wasinta predicaspa tarinmankuchuqaya.
2. ¿Imanasqataq allin yuyaywan llamkana sitiokunapi predicana, hinaspa imaynatataq yanapachwan arreglollapi predicanapaq?
2 Runakunapa llamkasqan sitiopi predicanapaqqa sumaqtam tanteakuna. Ancha allinmi runata mana hukmanyachispa chayta rurayqa. Sichus hina kaq sitiollapi otaq rantikuq sitiollapi achka wawqe-paninchikkuna predicaptinku, kanmanpaschá qawariwaspanchik hukmanyaqkuna, chayqa rurasqanchikta yanqa hinata rikcharachinman hinaspa mana uyariwanchikmanchu. ¿Imatam rurachwan mana chayna kananpaq? Wakin congregacionkunapa achka runakunapa llamkasqan sitiokunataqa rakikurunku achka territoriopi (1 Cor. 14:40). Congregacionninchikpa predicana kaqpi predicaspaqa yanapachwanpas arreglollapi predicananchikpaq, ichaqa sichus comité de serviciopi kaqkuna arreglota ruranmanku huk congregacionta yanapanapaq huklaw sitokunapipas predicachwanmi (qaway Nuestro Ministerio del Reino de noviembre de 1998, pág. 6, párrs. 18, 19).
3. ¿Imatam wakin wawqe-panikuna ruranku runakunapa llamkana sitiokunapi predicanankupaq?
3 Imaynatam runakunawan rimachwan. Jesús huk warmiwan pozopa patanpi asllata rimarqa qallarinanpaq hinaspa allillamanta parlaytaña qallarirqa warmi uyarisqanman hina (Juan 4:7-26). Kayna rurayqa allinmi kunanpas. Wakin wawqe-panikunaqa musyarunku allinta predicanankupaq, ancha allinmi runakunawan rimaykuspa, munasqanta hinaspa piensasqanta reqsiy manaraq Diospa Reinonmanta willaspa. Willanku llaqtapi imakuna pasasqanta chaymantañataq rimayta qallarinku. Runakuna preocupakusqanta willakuptinku uyarinkupuni, hinaspa allillamanta Diospa Palabranwanña kallpanchachkanku (Rom. 15:4).
4. ¿Imaynatam uyariqkunata masta interesachinchikman?
4 Imaynatam masta interesachinchikman. Piwanpas sumaqta rimaspaqa arreglota rurananchik kaqllamanta rimanapaq, chaynapi masta interesachinchikman. ¿Imaynatam chayta rurachwan? Rimayta tukunapaqña qellqananchikpaq kaqta horqospa nichwan: “Anchatam kusikuni qanwan parlaspay. ¿Atichwanchu hina kaymanta yapapi parlayta?”. Otaq nichwan: “Munaymanmi sumaq yachayta qam hinapaq leenaykita. ¿Apamuymanchu wasikiman otaq llamkaynikiman?”. Wakinñataq kaynallata tapunku: “¿Qayamuykimanchu telefonowan?, ¿Ima numeroman?”, chayqa allintapuni yanapan kaqllamanta rimanapaq.
5. ¿Imapaq kallpanchakunanchik llamkana sitiokunapi predicaspa?
5 Llamkana sitiokunapi uyarikuq runakunamanta achkaña Biblia estudiayta qallarirunku. Estudiakunmanmi wasinkupi otaq llamkayninkupi, hawkalla kaq sitiopi otaq telefonontakamapas. Kallpanchakusunchik Bibliamanta estudiota qallarinapaq runakunapa llamkana sitiokunapi allinta predicaspa.