Yachachisqanchikwan convencechinapaq

IMAMANTAPAS rimaptikiqa uyarisuqnikikunam yachayta munanku nisqaykikuna imanasqa cheqap kasqanmanta, ichapas tapukunmanku: “¿Cheqapchu kanman nisqankuna? ¿Imakunataq chayna kasqanta qawachin?”, nispa. Chayna tapukusqankutaqa contestawaqmi otaq cheqap kasqanta yachanankupaqmi sutillata qawachiwaq. Aswan allinnin kaq yachachikuykunamanta yachachispaqa sutillatam qawachinayki imanasqa cheqap kasqanmanta.

Apostol Pablom uyariqninkunata yachachisqanwan convencechirqa. Wakinpiqa imapas imayna pasasqanmanta willaspanmi piensarichiq, wakinpiñataqmi tukuy sonqonwan ruegarqa imayna piensasqankuta cambianankupaq, chayna yachachisqanta qatipakuyqa ancha allinmi (Hech. 18:4; 19:8). Wakin runakunam ichaqa yachachisqankuwan hukkunata engañanku (Mat. 27:20; Hech. 14:19; Col. 2:4). Ichapas mana sumaqta yachaykuspa chaynataq piensasqankuman hinalla pantasqata yachachinku. Mana chaynata yachachinapaqmi qawarikuna.

Bibliapa nisqanman hina yachachiy. Yachachisqanchikqa manam piensasqanchikman hinachu kanan aswanqa Bibliapa yachachisqanman hinam. Chaypaqmi yanapawanchik allin yuyayniyoq confianza sirvientepa rurasqanku qellqakuna, chay qellqakunaqa Bibliamanta astawan entiendechiwananchikpaqmi yanapawanchik. Ñoqanchikpas kallpanchakunanchikmi Bibliapa nisqanman hina yachachinapaq, ichaqa manam yachasqanchikta qawachinapaqchu aswanqa Bibliapa ima nisqanmanta uyariwaqninchikkuna kikinku cuentata qokunankupaqmi. Jesucristom Taytanta nirqa: “Palabraykiqariki cheqapmi”, nispa. Ñoqanchikpas chaynatam ninchik (Juan 17:17). Jehova Diosllam tukuy atiyniyoq, paymi unancharqa hanaq pachapi chaynataq kay Pachapi tukuy imatapas chaymi yachachispaqa paypa yachachisqanman hina yachachinanchik.

Wakinpiqa ichapas rimanki Bibliamanta mana yachaq runawan otaq Bibliapa nisqanpi mana creeq runawan. Chaymi tanteanayki parlasqaykichikman hina textokunata leenaykipaq hinaspa Bibliapa nisqanta qawachinaykipaq kallpanchakuy.

¿Huk textopa nisqallanwanchu convencechiwaq? Manapaschá. Ichapas cheqap kasqanmanta qawachinayki kanqa leesqayki textopa ñawpaqninpi otaq qatiqninpi nisqankunawan. Imayna kawsakuymanta huk textollawan mana convencechispaqa yachachisqaykiwan tupasqanman hinam huk textokunawanpas sutillata qawachiwaq.

Chaynata yachachispapas ama masyarichispa sumaqllata leey. Yachachisqaykiwan tupasqanman hina textokunata leeptikipas imam nisqanta Bibliankupi mana rikuspankuqa iskayrayanmankum.

Huk qellqakunawanpas yanapachikuwaqmi. Wakinpiqa allinmi kanman Bibliapa yachachisqankuna cheqap kasqanmanta qawachinaykipaq huk qellqakunawanpas yanapachikuynikiqa.

Ichapas chay qellqakunawan qawachiwaq hanaq pachapi tukuy ima rikusqanchikkuna unanchasqa kasqanta chaynataq Allpa pachapi kaqkunapas unanchasqa kasqanta. Nisqaykikunaqa allinmi kanqa Bibliapa nisqanman hina yachachiptikiqa (Job 38:31-33; Sal. 19:1; 104:24; Rom. 1:20). Huk qellqakunapa nisqanwan Bibliapa yachachisqan imayna tupasqanta qawachiyqa allinpaqmi.

¿Kallpanchakuchkankichu Bibliaqa Diospa Palabran kasqanmanta pimanpas entiendechinaykipaq? Ichapas willawaq yachaysapa runakunapa nisqankuman hina, ichaqa ¿cheqapchu kanman Bibliamanta paykunapa nisqankuqa? Chayna yachachisqaykiqa chay runakunata respetaqkunallatam yanapanman. ¿Yachaysapa runakunapa yachachisqankuwanchu qawachiwaq Bibliapi yachachikuykuna cheqap kasqanmanta? Paykunapa yachachisqanman hinalla yachachispaqa Diospa yachachikuyninkunatam yanqacharuwaq. Bibliapi yachachikuykuna cheqap kasqanmanta entienderachispam ichaqa willawaq Bibliapa willakusqanman hina yachaysapa runakuna imakuna tarisqankumanta.

Imamanta yachachispapas cheqap kasqantam qawachinayki. Chayqa kanman uyarisuqnikikuna pikuna kasqanman hinam. Ichapas rimawaq tukupay tiempoqa imayna kananmanta 2 Timoteo 3:1-5 nisqanman hina, runakunaqa ‘manaña kuyapayakuq’ kasqanmantam qawachiwaq ima noticiamantapas willaspa. Chaynata yachachiptikiqa cuentatam qokunqaku tukupay tiempopiña kawsasqanchikmanta.

Wakinpiqa yachachisqaykitam astawan entiendenmanku imapas imayna tupasqanta qawachiptikiqa. Tupanachiykunawan yachachiptikiqa imamanta yachachisqaykitam allinta entiendenqaku. Diospa Gobiernonmanta yachachispaqa imayna kasqanta entiendenankupaqmi ichapas tupanachiwaq runapa gobiernon imayna organizasqa kasqanwan, runapa gobiernonpiqa kanmi kamachisqan runakuna, gobernadorkuna, kamachikuykuna, juezkuna chaynataq yachachiqkunapas.

Experienciakunamanta willaspapas qawachiwaqmi Diosta kasukuyqa ancha allin kasqanta. Kikikipa experienciaykimantapas willawaqmi imamanta yachachisqaykita astawan entiendechinaykipaq. Ichapas yachachiwaq Bibliata leeyqa hinaspa estudiayqa ancha allin kasqanta, chaytam astawan entiendechiwaq chayna rurasqayki imakunapi yanapasusqaykita willaspa. Apostol Pedrom iñiqmasinkunata kallpanchananpaq Jesuspa rikchaynin kancharispa tikrakusqanmanta willarqa, chaytaqa kikinpunim rikurqa (2 Ped. 1:16-18). Apostol Pablopas vidanpi tukuy ima pasasqanmantam willakurqa (2 Cor. 1:8-10; 12:7-9). Experienciaykimanta willanayki kaptinqa allintam tanteanayki, mana chayqa qampim reparanmanku yachachisqaykipi reparanankumantaqa.

Yachachisqaykiwanqa manapaschá llapallan uyarisuqnikikunatachu convencechinki, runakunaqa sapakamam imamantapas hukniraqta piensanku. Chaymi yachachisqaykiwan convencechinaykipaq preparakuspaqa uyarisuqnikikunapa imayna piensasqanpi reparanayki. Bibliam nin: ‘Allin yachayniyoq runaqa yachanmi imayna rimayta. Chayna rimasqanwanmi pitapas allinta convencechin’, nispa (Prov. 16:23).