Allinnin kaq yachachikuykunata qawachinapaq

¿MAYQENKUNATAQ kanman discursopi aswan allinnin kaq yachachikuykunaqa? Chaykunaqa imamanta yachachisqaykita entiendechinaykipaq kaqkunam.

Aswan allinnin kaq yachachikuykunata sutillata entiendechinaykipaqqa imamanta yachachinaykipaq kaqtam ordenninpi preparakunayki. Discursota qonaykipaq preparakuspaqa achka yachachikuykunatam tarinki. ¿Imaynatam tanteawaq mayqenkunata servichikunaykipaq? Qatiqninpi kasqanman hinam.

1) Uyarisuqnikikunapi reparay, ¿yachankuñachu imamanta yachachinaykipaq kaqta icha manaraqchu? ¿Yaqa llapankuchu creenku yachachisqaykiqa Diospa Palabranwan tupasqanta icha iskayrayankuchu? ¿Diospa kamachisqanta kasukusqankuwanchu ima sasachakuykunapipas tarikunku? 2) Reparaytaq uyarisuqnikikunata yachachinaykipaq kaq imayna yanapasqanpipas. Chaykunapi reparaspa aswan allinnin kaq yachachikuykunata akllay imamanta yachachisqaykita allinta entiendechinaykipaq.

Yachachinaykipaq bosquejota chaskispaqa chaypi nisqanman hina yachachiy. Ichaqa uyarisuqnikikunapi reparaspa aswan allinnin kaq yachachikuykunata sutillata entiendechinaykipaq allinta preparakuy. Imamanta yachachinaykipaq bosquejoykita kikiki ruraspaqa yachachisqaykita entiendechinaykipaqmi aswan allinnin kaq yachachikuykunata akllanayki.

Aswan allinnin kaq yachachikuykunamanta chaynataq chaywan tupaq yachachikuykunamanta allinta entiendespaqa mana sasachakuspam allinta yachachinki, uyarisuqnikikunapas sumaqtam entiendenqaku.

Imaynatam sumaqta entiendechiwaq. Qatiqninpi nisqanman hinam bosquejoykitaqa ordenninpi preparakuwaq. Imamanta yachachisqanta entienderuspaqa mana sasachakuspam yachachinki.

Punta kaq: imamanta yachachisqaykita entiendechinaykipaq aswan allinnin kaq yachachikuykunata tupasqanman hina qatinasllanpi qellqay. Iskay kaq: yachachiwaqmi imapas imayna pasasqanmanta. Willawaqmi Sinchi para manaraq chayamuchkaptin imakuna pasasqanmanta, Jerusalenta 70 kaq watapi manaraq purmachichkaptinku imakuna pasasqanmanta otaq kay tiempopi imakuna pasasqanmantapas. Kimsa kaq: imapas imanasqa pasasqanmantam sutillata qawachiwaq. Willawaqmi kay tiempopi ima sasachakuypas imanasqa pasasqanmanta. Tawa kaq: qawachiwaqtaqmi imakuna allin kasqanmanta hinaspa mana allin kasqanmanta chaynataq kasukuypas otaq mana kasukuypas imapi tukusqanta. Wakin discursokunapiqa kay tawa ejemplokunaman hinam aswan allinnin kaq yachachikuykunata allinta entiendechinku.

Ñawpa tiempopi imakuna pasasqanmanta willaspanmi Estebanqa yanqa acusasqankumanta defiendekurqa judiokunapa huñunakunanku cortepi. Hechos 7:2-53 nisqanta leespa reparay imakunamanta willasqanpi. Puntatam willarqa uyariqninkunapa yachasqanman hina ñawpa tiempopi imakuna pasasqanmanta, willarqataqmi wawqenkuna cheqniptinpas Joseynintakama runakunata Dios librasqanmanta. Chaymantam qawachirqa Diospa nombrasqan Moisesta israelitakuna mana kasukusqankumanta. Hinaspam qawachirqa Jesusta wañuchiqkunapas ñawpa tiempopi israelitakuna hina kasqankuta.

Haykamantam rimawaq. Imamanta yachachiptikipas aswan allinnin kaq yachachikuykunaqa tiempoykipa kasqanman hinallam kanan. Pichqa minutopi, chunka otaq kimsa chunka masnin minutopi rimanayki kaptinqa ichapas aswan allinnin kaq yachachikuykunaqa kanman chullalla, iskaylla, kimsalla, tawalla otaq pichqapas.

Aswan allinnin kaq yachachikuykunamanta yachachinaykipaq haykata tanteaspapas uyarisuqnikikuna yuyanankupaqmi sapakamamanta allinta entiendechinayki.

Yachachisqaykiqa mana sasachakuspa entiendenankupaqmi kanan. Imamanta yachachisqaykipi aswan allinnin kaq yachachikuykunata qatinasllanpi entiendechiptikiqa yachachisqaykitam mana qonqanqakuchu.

Sutillata qawachiy. Yachachinaykipaq kaqta ordenninpi qellqaspaqa mana sasachakuspallam aswan allinnin kaq yachachikuykunata entiendechinki.

Chaykunata sumaqta entiendechinaykipaqqa tupasqanman hina yachachikuykunata chaynataq textokunata allinta servichikuy. Yachachisqaykiwan mana tupaptinqa ama servichikuychu. Wakin yachachikuykunata servichikuspapas sutillata qawachiy aswan allinnin kaq yachachikuykunawan imayna tupasqanta. Chaytaqa entiendechiwaqmi aswan allinnin kaq yachachikuykunawan tupaq palabrakunata yapamanta rimaspa.

Wakin discursantekunam rimayta qallarisqallankupi ninku imakunamanta yachachinankupaq kaqta. Chayna rurasqanku allin kaptinpas imamanta yachachisqankutaqa allintam entiendechinanku.

Wakin yachachikuymanta willanaykipaqqa aswan allinnin kaq yachachikuykunamantaraqmi willanayki. Chaynata ruraspaqa uyarisuqnikikunatam yanapanki imamanta yachachisqaykita allinta entiendechinaykipaq. Aswan allinnin kaq yachachikuykunata rimaruspapas atinkim pisi rimayllapi yapamanta entiendechiyta.

Predicaspa. Predicaspapas aswan allinnin kaq yachachikuykunamantam allinta entiendechinayki. Predicacionpaq preparakuspayki reparay vecinoykikunata imakuna sasachasqanpi hinaspa chayman hina tanteay Bibliapa nisqanman hina imamantapas yachachinaykipaq. Ichapas chayta entiendechinaykipaq akllawaq iskay aswan allinnin kaq yachachikuykunata chaynataq chay yachachikuywan tupaq textokunatapas. Chaynata yachachinaykipaq preparakuspaqa willasqaykita mana qonqananpaqmi uyarisuqnikita yanapanki.