2 KAQ YACHACHIKUY
Sumaq huertamantam qarqochikunku
Mana kasukuq angelmi Adantawan Evata hikutan Diosta mana kasukunankupaq. Hinaptinmi huchawan wañuy rikurin
RUNAKUNA manaraq kachkaptinmi Diosqa unancharqa mana rikuy atina angelkunata. Huk kaqnin angelmi Diosta qepanchaspan Evata engañarurqa huertapi prohibisqa sachapa rurunta mikunanpaq, chay angelmi Satanas otaq Diablo nispa sutichasqa karqa.
Satanasmi culebrata servichikuspan Evawan rimarqa hinaspam entiendechirqa allinninkupaq kaqta Dios pakasqanta. Nirqataqmi prohibisqa ruruta mikuspaqa mana wañunankuta; chaynata nispanmi nichkarqa paykunata Dios llullakusqanta. Arí, Diabloqa sumaqllataña rimaspanmi piensarachirqa, Diosta mana kasukuspankuqa sumaq yachayniyoq kanankuta, hinaspa imapas ruray atinankuta. Ichaqa hatun llullakuymi karqa. Huk rimaypiqa Satanasqa kaynatam nichkarqa: ¿Derechoyoqchu Diosqa kanman tukuy imata kamachinanpaq? ¿Allinchu kanman kamachikuyninkuna? ¿Allinninchikpaqchu kasukuyqa kanman?, nispa.
Evaqa Satanaspa toqllanpim wichiykurqa. Chay sachapa rurunta munapayaruspanmi mikururqa. Chaymantam Adanman qoykuptin paypas mikururqa. Chay rurasqanku hatun huchaman mana rikchakuptinpas, Diospa contranpi huchallikuymi karqa. Paykunaqa yacharqakumá ima rurasqankuta: Unanchaqninkupa kamachikuynintam qepanchachkarqaku, Diosqa tukuytam qorqa mana huchayoq vidankutapas.
“Mirayninmi umaykita chamchasunki, qamñataqmi talonninpi kachunki.” (Genesis 3:15)
Diosmi cuentata mañarqa mana kasukusqankumanta. Nirqam, prometesqa Miray hamuq tiempopi Satanasta chinkachinanmanta. Hinaspam Adantawan Evata wañunankupaq nirqa, ichaqa llakipayarikurqam hamuq mirayninkunamanta chaymi mana chayllapichu wañurachirqa. ¿Ima suyakuytam mirayninkunaman qorqa? Jehová Diosmi nirqa prometesqan miray, Edenpi rikurisqan huchatawan wañuyta chinkachinanmanta. Ichaqa, ¿pitaq kanman chay Libraqqa, imaynatam Diospa prometesqanta cumplinman karqa? Tiempopa risqanman hina Biblia qellqakuchkaptinmi, kay tapukuypa kutichiyninqa sutilla karqa.
Hinaptinmi Diosqa Adantawan Evata Paraisomanta qarqorurqa. Manaña huertapi kaspankum, kawsanankupaqqa anchallataña llamkananku karqa. Evam wachakurqa Cain sutiyoq piwi wawanta. Chaymantapas, Adanwan Evaqa achka wawa-churiyoqraqmi karqaku, hukninmi karqa Abel hinaspa Noeypa abuelon Set.