Uyariwaqninchikkunata allinta yachachinapaq

IMAMANTA yachachisqayki uyarisuqnikikunata yanapananpaqqa manam imayna yanapasqallantachu qawachinayki. Tapukuy: “¿Imanasqataq uyariwaqniykunaqa kay yachachikuymanta yachananku? ¿Imaynatam qawachiyman yachachisqay imayna yanapasqanta?”

Escuelapi demostracionta ruranaykipaq kaptinqa yanapasuqnikim uyarisuqnikiqa kanqa, wakinpim ichaqa huñunakuypi kaqkunaman yachachinki.

Uyarisuqnikikunapi reparay. Tapukuy, ¿imakunatataq yachankuña yachachinaypaq kaqkunamanta? nispa, hinaspa chayman hina preparakuy. Iñiyninkupi takyasqa kaqkunaman yachasqanku kaqkunamanta yachachispaqa chaykunamanta astawan entiendechinaykipaq kallpanchakuy. Chayllaraq hamuqkunapipas reparay chayman hina yachachinaykipaq.

Uyarisuqnikikunapa yachasqankunapi reparaspa chayman hina yachachiy. Yachasqanku kaqkunamantaqa ama llumpayta rimaychu, mana yachasqanku kaqkunamanta ichaqa allinta entiendechinaykipaq astawan rimay.

Allinta entiendechinaykipaq. Uyarisuqnikikunata yachachisqaykiwan yanapanaykipaqqa manam mosoq yachachikuykunamantaraqchu rimanayki. Wakin discursantekunaqa uyariqninkunapa yachasqanku kaqkunamanta rimaspapas astawanraqmi entiendechinku.

Predicasqanchikpi tukupay tiempopiña kawsasqanchikmanta yachachispaqa manam ima noticiamantapas willayllachu-willana aswanqa Bibliawanmi qawachina chaykuna imanasqa pasasqanta. Chaynata yachachiptikiqa wasiyoqmi allinta entiendenqa. Plantamanta otaq animalmanta rimaspapas manam yachayniyoq runakunapa nisqankuman hinallachu rimanayki, aswanqa Bibliapa nisqanman hinam entiendechinayki kuyakuq Dios kasqanrayku imapas unanchasqa kasqanmanta. Chaynata yachachiptikim uyarisuqnikunaqa mana yachasqanku kaqkunamanta allinta entiendenqaku.

Yachasqanku kaqkunamantaña yachachiyqa sasam. Ichaqa allin yachachiq kayta munaspaqa yachanaykim imaynata astawan entiendechiyta.

Chaypaqqa mayqen yachachikuymantapas allintaraqmi yachanayki. Yachachisqaykita allinta entiendechinaykipaqqa kay libropa 33-38 paginankunapi nisqanman hina preparakuy. Chaypim yachachichkan imakunapi reparaspa imaynata preparakunaykipaq. Ichapas preparakusqaykipi tariwaq ñawpa tiempopi imapas pasasqanmanta mana yachasqanku willakuykunata otaq kay tiempopi ima willakuykunamantapas. Yachachisqaykipi chay willakuykuna yanapasuptikiqa servichikuwaqmi.

Yachachinaykipaq kaqta preparakuspaqa allinta entiendenaykipaq kayna tapukuykunapi piensay: imanasqa, haykapi, maypi, ima, pi, imaynata. Hinaspa chayman hina tapukuy: ¿Imanasqataq kayqa cheqap? ¿Imaynatam cheqap kasqanta qawachiyman? ¿Imakunapi creesqankutaq wakin runakunata sasachan Bibliapa yachachisqanta entiendenankupaq? ¿Imanasqataq ancha allin kanman? ¿Imaynatam uyariwaqniykunata yanapanman? ¿Imataq qawachinman kasukuyqa allinpaq kasqanta? ¿Imatam Jehova Diosmanta qawachin? nispa. Yachachisqaykiman hinataqmi tapukuwaq: “¿Haykapitaq kayqa pasarqa? ¿Imapitaq yanapawanchik?”, nispa. Huñunakuypi yachachispapas chaynataqa tapuwaqmi, hinaspam yachachisqaykiman hina contestawaq.

Yaqapaschá uyarisuqnikikunapa yachasqan textokunata leenayki kanqa. ¿Imaynatataq chay textokunamanta astawan entiendechiwaq? Leeylla leenaykimantaqa allinta explicay.

Yachasqanku textokunata leespaqa astawanmi entiendechiwaq yachachisqaykiwan tupaq palabrakunamanta explicaspa. Ejemplopaq, ¿imakunamantam entiendechiwaq Miqueas 6:8 nisqanta leespa? ¿Imatataq entiendechiwaq ‘allin ruraymanta otaq justiciamanta’? ¿Pipa allin justicianmantataq rimachkan? ¿Imaynatam rikchanachiwaq ‘justiciamanta’ yachachispa? ¿Imaynatataq entiendechiwaq ‘kuyapayakuq’ otaq ‘humilde’ kaymanta? ¿Imaynatam yuyaqyasqa iñiqmasinchikkuna yanapasqanta qawachiwaq? Chaykunamanta entiendechinaykipaqqa kaykunapi reparay: imamanta yachachisqaykipi, imayna yanapasqanpi, pikunapaq kasqanpi chaynataq hayka minutopi rimanaykipaq kasqanpipas.

Mana entiendesqanku palabrakunamanta entiendechiyqa allinpaqmi. Wakin runakunaqa manam entiendenkuchu Mateo 6:10 nisqanpi “munaychakusqayki” niq palabrata, chaymi allinta entiendechinayki. Unay wataña Testigokunapas astawanmi entiendenqaku textopi kaq mayqen palabramantapas allinta explicaptikiqa. Ejemplopaq, 2 Pedro 1:5-8 nisqanta leespaykiqa imamanta yachachisqaykiman hinam entiendechiwaq kayna niq palabrakunamanta, iñiyniyoq, allin sonqoyoq, yachayniyoq, controlakuq, pacienciakuq, wawqe-panintin sientenakuq, Diosta serviq hinaspa kuyakuq nisqankunamanta. Leesqayki textopi wakin palabrakunapa ima niy munasqan kaqlla kaptinqa sapakamamantam allinta explicanayki. Reparay Proverbios 2:1-6 nisqanpi, chaypim nin: yachayniyoq, entiendeq, cuentata qokuq nispa.

Textokunata leespaqa piensarichinaykipaqmi yanapanayki. Ichapas explicawaq 1 Juan 2:17 nisqanmanta, kay textopi kay pacha chinkananmanta nispanqa manam Allpa pacha chinkananmantachu nichkan aswanqa Diosta mana kasukuq runakuna chinkananmantam, chayna kasqanta entiendesqankuwanmi wakinqa admirakunku. Chaynallataqmi Salmo 104:5 nisqanta entiendesqankuwanpas admirakunku, chaypiqa rimachkan Allpa pacha mana haykapipas chinkananmantam. Exodo 3:6 nisqanman hina kawsarimuymanta rimaspanmi Jesucristopas saduceokunata admirachirqa, chay textopa nisqanpim paykunaqa creeqku (Luc. 20:37, 38).

Wakinpiqa allintam entiendenmanku leesqayki textopa qatiqninpi otaq ñawpaqninpi kaq textokunata leespa imanasqa qellqasqankumanta, pipas rimasqanmanta otaq uyarisqanmanta explicaptikiqa. Fariseokunaqa allintam yacharqaku Salmo 110 ima nisqanmanta. Ichaqa Jesusmi punta kaq versiculopi nisqanwan piensarichispan tapurqa: ‘¿Imaninkichiktaq Cristomanta? ¿Pipa miraynintaq?’ nispa. Chaymi paykunañataq nirqaku: ‘Davidpa mirayninmi’, nispa. Hinaptinmi Jesusñataq nirqa: ‘¿Imaynanpitaq Davidqa Cristota Señorwan suticharqa?’ Davidmi nirqa: ‘Jehova Diosmi Señorniyta nirqa: enemigoykikunata vencenaykamayá alleqniypi tiyaykuy, enemigoykikunata saruchinaykamayá alleqniypi tiyaykuy’, nispa. ‘¿Imaynataq Cristoqa Davidpa miraynin kanman Davidpuni “Señorniy”, nispa Cristomanta rimachkaptinqa?’, nispa (Mat. 22:41-45). Jesus hina chaynata piensarichispaqa uyariwaqninchikkunatam astawan entiendenankupaq yanapasun.

Bibliapi mayqen librotapas haykapi qellqasqankumanta otaq imapas imayna pasasqanmanta discursoykipi rimaspaqa qawachinaykitaqmi chay tiempopi imapas imayna pasasqanta. Chaynata yachachiptikiqa allintam entiendenqaku.

Tupanachiykunawan yachachisqaykipas yanapanmanmi allinta entiendenankupaq. Runakunapa nisqantam Bibliapa nisqanwan tupachiwaq otaq willawaqmi Bibliapi willakuykuna imayna tupasqantapas. ¿Hina kaqllamantachu willan? ¿Imaynanpitaq chayna kanman? ¿Imatataq chaymanta yachachwan? Chaynata yachachiptikiqa uyarisuqnikikunam astawan entiendenqaku.

Predicanamanta otaq runamasinchikman imayna yachachinamanta rimanayki kaptinqa rimayta qallarispalla niy imamanta yachachinaykipaq kaqta, chaynata ruraspaqa astawanmi entiendechinki. Qawachiy imam ruranapaq hinaspa imanasqa ruranapaq kasqanta chaynataq Dios serviyninchikwan imayna tupasqantapas. Explicaytaq imaynata, haykapi hinaspa maypi ruranapaqpas.

Diospa sonqonpi kaqkunamanta otaq sasa entiendena kaqkunamanta yachachinayki kaptinqa, ¿imatam rurawaq? (1 Cor. 2:10.) Aswan allinnin kaq yachachikuyninkunamanta puntata entiendechiy, chaynata yachachiptikiqa wakin yachachisqaykikunatapas allintam entiendenqaku. Yachachisqaykimanta pisillata rimaspa yuyarichiptikiqa uyarisuqnikikunam kallpanchasqa kanqaku.

Imayna kawsakunapaq consejokuna. Yachachisqaykita astawan entiendenankupaqqa imayna yanapasqantam qawachinayki. Bosquejopi textokunata leenaykipaq tanteaspaqa tapukuy: “¿Imanasqataq Bibliapa kayna nisqankunaqa kunankamaraq kachkan?”, nispa (Rom. 15:4; 1 Cor. 10:11). Reparay uyarisuqnikikuna imakunawan sasachakusqankupi, chayman hina preparakuy Bibliapa yachachisqanwan imaynata yanapanaykipaq. Yachachisqaykiman hina qawachiy ima sasachakuyninkutapas imaynata atipanankupaq yanapasqanta.

Yachachinaykipaq tupasuptikiqa kay yachachikuypi yanapakuykunaman hina yachachinaykipaq kallpanchakuy. Sapa yachachisqaykipi chaynata ruraspaqa tiempopa risqanman hinam allinta yachachinki. Chaynata yachachiptikiqa uyarisuqnikikunapas astawanmi uyariyta munanqaku imamanta yachachisqayki allinninkupaq kasqanrayku.