Reqsisqanku kaqkunawan rikchanachinapaq

RIKCHANACHIYWAN yachachispaqa yachachisqanchikwan tupasqanman hinam rikchanachina, ichaqa uyariwaqninchikkunata astawan entiendechinapaqmi kanan.

Uyarisuqnikikunapi reparaspa allinta tanteay imayna rikchanachiykunawan yachachisqaykita entiendechinaykipaq. Reparay Jesucristopa imayna yachachisqanpi. Discipulonkunaman otaq achka runakunaman yachachispanpas rikusqanku kaqkunawan rikchanachispanmi entiendechirqa. Jesusqa manam rimarqachu Egipto nacionpa palacionpi imayna kawsasqankumantaqa nitaq India nacionpi ima costumbreyoq kasqankumantapas. Aswanqa uyariqninkunapa reqsisqanku kaqkunawanmi rikchanachiq: pacha remiendaywan, negocio ruraywan, qollqe wischuruywan chaynataq casamientowanpas. Jesusqa musyaqmi imamantapas willaptin runakuna imayna kasqankuta hinaspam chayman hina yachachiq (Mar. 2:21; Luc. 14:7-11; 15:8, 9; 19:15-23). Israel nacionman Diosmanta astawan willasqanraykum paykunapa imapas servichikusqanku otaq reqsisqanku kaqkunawan rikchanachispa yachachirqa. Chaymi rikchanachiq chakrapi llamkaywan, michiqninta ovejakuna reqsisqanwan hinaspa vino waqaychana odrewanpas (Mar. 2:22; 4:2-9; Juan 10:1-5). Rikchanachirqataqmi: Adanwan Eva unanchasqa kasqankuwan, Noeypa tiemponpi Sinchi parawan, Sodomawan Gomorra llaqtakuna puchukachisqa kasqankuwan, Lotpa señoran wañusqanwan chaynataq huk willakuykunawanpas (Mat. 10:15; 19:4-6; 24:37-39; Luc. 17:32). Rikchanachiykunata akllaspaqa, ¿yaqachu reparanki uyarisuqnikikunapa ima rurasqankupi chaynataq pikuna kasqanpipas?

¿Imatataq rurawaq achka runakunaman otaq huk runallaman yachachinayki kaptinqa? Tukuy sonqowan kallpanchakuy uyarisuqnikikunapaq hina rikchanachiykunawan yachachinaykipaq. Jesusmi Samariamanta warmiman sapa punchaw rurasqanwan rikchanachispan yachachirqa ‘kawsachikuq yakumanta’, ‘manaña yakunayachikunamanta’ chaynataq ‘toqyachkaq yaku’ hina wiñay kawsaymantapas (Juan 4:7-15). Mallankuta mayllachkaq challwiru runakunawan rimaspanñataqmi chay rurasqankuman hina rikchanachispa yachachirqa (Luc. 5:2-11). Samariamanta warmipas chaynataq challwirukunapas chakrakunapa hinaspa uywakunapa kasqan lawpim yachaqku otaq tiyaqku, ichaqa ima rurasqankuwan rikchanachispanmi Jesusqa astawan entiendechirqa. ¿Chaynata yachachinaykipaqchu kallpanchakuchkanki?

Jesusqa “Israel casta” runakunallamanmi yachachirqa, apostol Pabloñataqmi huklaw nacionpi kaqkunamanpas Diosmanta yachachirqa (Mat. 15:24; Hech. 9:15). ¿Imaynatam Pabloqa paykunaman predicarqa? Corinto llaqtapi kaq iñiqmasinkunaman qellqaspanmi rikchanachirqa llallinakuypi kallpaqkunawan, taytachakunapa kasqan templopi mikuqkunawan hinaspa guerrapi venceqkuna llaqtaman kusisqa yaykumusqankuwan. Tukuy chaykunaqa iñiqmasinkunapa reqsisqanmi karqa (1 Cor. 8:1-10; 9:24, 25; 2 Cor. 2:14-16).

¿Jesus hinachu otaq Pablo hinachu qampas kallpanchakunki rikchanachiykunawan chaynataq willakuykunawanpas yachachinaykipaq? ¿Reparankichu uyarisuqnikikuna pikuna kasqanpi chaynataq imakuna rurasqankupi? Kay tiempoqa manam ñawpa tiempo hinañachu. Achka runakunam televisionpi noticiakunata qawasqankuwan Allpantinpi imapas pasasqanmanta yachanku. Yachasqayki lawpi chayna noticiakunamanta yachasqankuman hina rikchanachispa yachachiynikiqa allinmi kanman. Ichapas rikchanachiwaq familiapi, llamkaypi, rupay tiempopi otaq chiri tiempopi imapas pasasqanwan chaynataq ima mikuykuna alimento kasqanwanpas. Chaykunawan rikchanachispa yachachiptikiqa astawanmi yachayta munanmanku.

Ima rikchanachiytapas explicanaykipaq sasachakuspaqa ichapas mana reqsisqanku kaqkunawan rikchanachinaykipaq tantearunki, chayna kaptinqa imamanta yachachisqaykitam yanqacharuwaq. Uyarisuqnikikunaqa Diosmanta yachachisqaykitam yuyananku, manam rikchanachisqaykitachu.

Mana reqsisqanku kaqkunawan rikchanachinanmantaqa imapas rurasqankuwanmi Jesusqa rikchanachirqa. Entiendenankupaq kaqkunallawan rikchanachispanmi sasa entiendenapaq kaqkunatapas allinta entiendechiq. Chaynata rikchanachispa yachachiytaqa ñoqanchikpas atichwanmi.