7 KAQ YACHACHIKUY
Adivinaq runakunam Jesusta watukuq rirqaku
LUCEROTA QATISPAM ADIVINAQ RUNAKUNA JERUSALENMAN RIRQAKU, HINASPAÑATAQMI JESUSPA KASQANMAN RIRQAKU
Intipa qispimunan lawmantam adivinaq runakuna lucerota rikuruspa qatirqaku. Chay runakunaqa lucerota qawaspa adivinaqkunam karqaku (Isaias 47:13). Paykunaqa karu-karutam chay lucerota qatispa Jerusalenkama rirqaku, manam Belenmanchu.
Hinaspankum runakunata tapukurqaku: “¿Maypitaq kachkan judiokunapa kamachiqnin nacemuqqa? Lucerontam rikuramuniku intipa qispimunan lawpi, chaymi hamurqaniku ñawpaqninpi kumuykunaykupaq”, nispa (Mateo 2:1, 2).
Chayta yacharuspanmi Jerusalenpi kamachiq Herodesqa hukmanyarurqa. Hinaspam riqsisqa sacerdotekunatawan religionkunapi punta apaqkunata qayachispan suma-sumaqta tapurqa maypi Diospa akllasqan Cristo nacenanmanta. Hinaptinmi paykunaqa nirqaku: “Judea law Belenpim”, nispanku (Mateo 2:5; Miqueas 5:2). Chaymi Herodesqa mana pipa yachasqallanta adivinaq runakunata qayachispan nirqa: “Rispaykichikyá wawachata allinta maskamuychik, tariruspaykichikñataqmi kutimuspa willaykuwankichik ñuqapas rispay ñawpaqninpi kumuykunaypaq”, nispa (Mateo 2:8). Chaynataqa nirqa Jesusta wañurachiyta munasqanraykum.
Chaymantam adivinaq runakunaqa qatimusqanku lucero pusaptin Belen llaqtamanña rirqaku. Chaypim Joseywan Mariapa yachasqan wasipa altonpi lucero sayaruptin wasiman yaykurqaku. Chay luceroqa manam wakin lucerokuna hinachu karqa, aswanqa hatu-hatunmi karqa, chaymantapas manam kikillanmantachu rikurirurqa.
Wasiman yaykuruspankum adivinaq runakunaqa Mariata wawantinta rikururqaku. Hinaspam Jesuspa ñawpaqninpi kumuykuspanku apasqanku qurita, olibanota hinaspa mirrata qurqaku. Chaymantam Herodesman willaq kutinanku kachkaptin musquyninkupi Dios nirqa ama rinankupaq. Chaymi huk lawnintaña llaqtankuman kutikurqaku.
¿Pitaq chay adivinaq runakunata lucerowan achkispan pusarqa? Yuyaymanasun, chay luceroqa manam Jesuspa kasqan Belenmanchu pusarqa, aswanqa Herodespa kasqan Jerusalenmanmi. Herodesqa Jesustam wañurachiyta munarqa. Ichaqa Jehova Dios harkaptinmi mana wañuchirqachu. Chaymi nichwan chay lucerowan pusaqqa satanas diablo kasqanmanta, paymi Jesus wañunantaqa munarqa.