¿YACHARQANKICHU?

¿Ima ruwayniyuqtaq karqaku Roma nacionpi soldadokunapa capitanninqa?

Bibliapiqa Roma nacionpi soldadokunapa capitanninmantam achka kutita riman. Jesusta wañuchinankupaq encargakuq soldadopas chaynataq Corneliopas capitanmi karqaku, Cornelioqa huk law nacionniyuq runakunamanta Jesuspi punta iñiqmi karqa. Pablota asutichiq soldadowan Roma nacionman apaq Julio sutiyuq soldadopas capitanmi karqaku (Marcos 15:39; Hechos 10:1; 22:25; 27:1).

Capitankunaqa 50 utaq 100 soldadokunapa jefenmi karqa. Payqa soldadonkunatam yachachiq hinaspa armankutapas qawaq, guerraman riptinkuñataqmi imayna peleanankupaq yachachiq.

Capitan kayqa ancha allinmi soldadokunapaq karqa, ichaqa chaypaqmi anchata kallpanchakunanku karqa. Paykunaqa allin experienciayuqmi hinaspa allin kamachiqmi karqaku, Roma nacionpa tropankuna ganananpaqqa paykunamantam karqa. Huk qillqapa nisqanman hinam “paykunaqa ancha allin experienciayuq hinaspa guerramanta yachaqmi karqaku”.

¿Imaynam karqa ñawpaq tiempopi espejokunaqa?

Ñawpaq tiempopi espejoqa manam kay tiempopi espejo hinachu karqa​. Ñawpaq tiemponpiqa yaqa llapanpim ruwarqaku broncemanta, cobremanta, platamanta, qurimanta hinaspa electro metalmantapas. Bibliapiqa espejomantam riman Diospa carpanta ruwachkaptinku, chay carpapim lliw israelitakunaqa Diosta yupaychaqku. Broncemanta lavatoriota ruwanankupaqmi warmikunaqa broncemanta espejonkuta qurqaku (Exodo 38:8). Chayta ruwanankupaqqa espejokunatam chulluchinanku karqa.

Israel nacionpim yachaysapa runakuna warmikunapa alhajankunawan kuskata espejokunata tarirunku. Yaqa llapanpim ruwaqku ruyrunpata mangochantañataqmi warmipa uyanman rikchakuqta. Chaytaqa ruwaqku kaspimanta, fierromanta utaq marfil nisqamantapas. Espejopa qipantam ichaqa mana adornaqkuchu.

Ñawpaqpi espejokunaqa antallatam qawachiq manam kunan tiempopi hinachu karqa, chayraykuchá apostol Pablo nirqa: “Kunanqa espejopi hinam chinka-chinkallata qawachkanchik”, nispa (1 Corintios 13:12, CQ12).