Kuyakuywan sonqomanta rimanapaq

SENTIMIENTOYOQMI runaqa kanchik. Pipas rimaspanqa imayna runa kasqantam qawachin, hukkunapaq imayna kasqanwan chaynataq imapas pasaptin imayna sientekusqanwan. Vidankupi imapas pasasqankuwanmi wakinqa mana sentimientoyoq hina kanku, wakinñataqmi maylawmanta kasqankurayku chayna kanku. Chayna kaptinpas Jehova Diosmi kallpanchawanchik allin sonqoyoq kanapaq chaynataq chayman hina kawsanapaqpas (Rom. 12:10; 1 Tes. 2:7, 8).

Sientesqanchikta imayna rimasqanchikpi mana qawachiptinchikqa uyariwaqninchikkunam piensanman tukuy sonqonchikmanta mana kasqanta. Rimasqanchikman hina sientesqanchik sutilla kaptinqa uyariwaqninchikkunapas tukuy sonqowan rimasqanchiktam musyanqaku.

Kuyakuywan rimay. Pitapas astawan reqsispaqa kuyakuywanmi rimanchik. Jehova Diospa sumaq kayninkunamanta rimaspaqa hinaspa kuyapayakuq kasqanmanta agradecekuspaqa kuyakuywanmi rimananchik (Is. 63:7-9). Hukkunawan rimaspapas llampu simiwantaqmi rimana.

Lepra onqoywan ñakariq runam Jesusta ruegakurqa sanoyaykachinanpaq. Piensariy kuyakuywan Jesuspa nisqanpi, payqa kaynatam nirqa: “Munanim, allinyayña”, nispa (Mar. 1:40, 41). Piensariytaq yaqa 12 wataña hemorragiawan onqoq warmipi, paymi allillamanta Jesusman asuykuspan hawa pachanpa patachanta llachpaykurqa. Chay rurasqanmanta Jesus cuentata qokuruptinmi katkatatastin kumuykuspan runakunapa qayllanpi willakurqa imanasqa llachpaykusqanmanta chaynapi sanoyarusqanmantapas. Reparay kuyakuywan Jesuspa kayna rimasqanpi: “Mamáy, iñisqaykiraykum allinyarunki, hawkañayá pasakuy” (Luc. 8:42b-48). Chayna kuyakuywan Jesuspa rimasqanqa kunan tiempopas kallpanchawanchikmi.

Runamasinchikta Jesus hina kuyaspa chaynataq tukuy sonqonchikwan yanapayta munaspaqa imayna rimasqanchikwanmi sutillata qawachina. Kuyakuywan yanapasqanchikqa sonqomantam kanan. Llampu simiwan rimapayaspaqa yachasunmi ima piensasqanta. Predicaspaqa yaqa llapanpim kuyakuywan rimanchik, astawanraqmi imamantapas piensarichispaqa, kallpanchaspaqa otaq imamantapas llakipayaspaqa.

Runamasiki kuyasqaykita qawachiy kusisqa rimasqaykiwan. Kuyakuywan rimapayaptikiqa uyarisuqnikim asuykusunki imaynam chiri tutapi qoñikunanpaq ninaman asuykuq hina, mana chayqa paypi mana reparasqaykitam piensanman. Kuyakuynikiqa sonqoykimantam kanan.

Kuyakuq kasqaykitaqa imayna rimasqaykiwanmi qawachinayki. Kallpawan otaq hukmanniraq rimaq kaspaykiqa sasachakunkipaschá kuyakuywan rimasqaykita qawachinaykipaq, chayna kaptinpas kallpanchakuspaykiqa sumaq rimaytam atinki. Qonqayllamanta kallpawan chaylla rimayqa piñarikuchkaq hina rimaymanmi rikchakunman. Chaymi wakin palabrakunataqa tupasqanman hina allillamanta rimana vozninchik sumaqta uyarikunanpaq.

Chaymantapas reparanam imamanta yachachinapaq kaqpi. Uyarisuqnikikunata yachachisqaykiwan sonqomanta yanapayta munasqaykiqa imayna rimasqaykipim sutilla qawakunqa.

Yachachisqanchikwan uyariwaqninchikkunata kallpanchanapaq kaptinpas kuyakuywan rimasqanchiktam qawachina. Manam entiendechiyllachu entiendechina aswanqa kasukunankupaqmi kallpanchana.

Sentimientowan rimay otaq leey. Llakisqa kaspanchikqa ichapas hukmanyasqa, mancharisqa otaq imapaqpas mana ganasniyoq kasqanchikta qawachisun. Sonqonchikpi kusisqa kasqanchikqa sutillam imayna rimasqanchikpi. Chayna kaptinpas Diosta serviqqa mana allin rimaykunamantam cuidakunanchik (Efes. 4:31, 32; Filip. 4:4). Ima palabrakunawan rimasqanchik, kallpawan otaq tumpallamanta rimasqanchik chaynataq uyanchikwanpas makinchikwanpas yanapachikuspa rimasqanchikmi imayna tarikusqanchikta qawachin.

Diospa Palabranmi willawanchik runakuna imaymana sientekusqankumanta. Wakinpim willawanchik imapas pasaptin imayna sientekusqankumanta chaynataq imayna palabrakunawan rimasqankumantapas. Chayna willakuykunamanta tupasqanman hina kallpawan leesqaykiqa kikikitapas piensarichisunkim hinaspam uyarisuqnikikunatapas yanapanqa. Chaypaqqa chay willakuypi runakuna imayna sientekusqankuman otaq rimasqankuman hina leey. Uyarisuqnikikuna willasqaykita rikuchkanmanpas hina piensarichinaykipaq leey. Discursota qospaykiqa manam pitapas qatipakuchkaq hinachu rimanayki, chaymi imayna rimanaykipaq kaqkunataqa allinta akllanayki.

Imamanta yachachisqaykiman hina rimay. Sentimientowan rimanapaqqa imamantapas yachachisqanchikman hinam kanan.

Mateo 11:28-30 nisqanpi allinta reparay. Reparaytaq Diospa leynin yachachiqkunaman chaynataq fariseokunaman Mateo 23 capitulonpi Jesuspa imayna rimasqanpi. Manachá Jesusqa chay runakunataqa llampu simillawanqa ninmanchu karqa.

¿Imayna sentimientowantaq leechwan Genesis 44 capitulopi Benjaminpa favorninpi wawqen Juda rimasqanta? 13 versiculota leespayki reparay imayna sientekusqankupi, 16 versiculota leespañataq reparay imarayku sasachakusqankumanta Juda ima piensasqanpi hinaspa Genesis 45:1 nisqanpi Josey imayna contestasqantapas.

Rimasqanchik otaq leesqanchik allin kananpaqqa manam palabrakunallapichu nitaq imamanta yachachinanchikpaq kaqkunallapichu reparana, imayna sentimientowan rimanapaq otaq leenapaq kasqanpipas reparanam.