Bibliata manaraq leechkaspa piensarichinapaq

HUÑUNAKUYPI yachachikuykuna uyarisqanchikqa Bibliapa nisqanman hinam, chay yachasqanchikkunatam predicacionpipas servichikunchik. Bibliapa nisqanman hina yachachinapaqqa textokunata manaraq leechkaspam piensarichinaraq.

Manam textota maskanankupaq uyariqninchikkunata kallpanchayllachu. Manaraq leechkaspayki 1) piensarichiy allinta uyarinankupaq, 2) qawachiy imanasqa chay textota servichikusqaykita. Chaykuna ruraytam atiwaq qatiqninpi yachachikuykunawan.

Tapuspa. Mana yachasqankumanta tapuyqa piensarinankupaqmi yanapan, Jesuspas chaynatam rurarqa. Templopi kachkaptinmi fariseokuna Jesusman asuykuspanku Bibliamanta yachasqanta runakunapa qayllanpi pruebaman churarqaku hinaptinmi Jesusñataq paykunata tapurqa: “¿Imaninkichiktaq Cristomanta? ¿Pipa miraynintaq?”, nispa. Paykunañataqmi nirqaku: “Davidpa mirayninmi” nispa. Hinaptinmi Jesusqa Salmo 110:1 nisqanman hina tapurqa: ‘¿Imaynanpitaq Davidqa chuya espiritu [yanapaptin] Cristota Señorwan suticharqa?’, nispa. Chaymi fariseokunaqa upallarurqaku, hukunañataqmi Jesusta atencionwan uyarirqaku (Mat. 22:41-46).

Predicaspa rimariyta qallarinaykipaqqa ichapas kayna tapukuykunata servichikuwaq: “Lliwmi sutiyoq kanchik, ¿Diospas sutiyoqchu kanman? Salmo 83:18, NM nisqanmi Diospa sutinmanta willachkan”; “¿Haykapipas atinmanchu huk gobiernolla lliw runakuna gobiernayta? Qawariy Daniel 2:44 nisqanta”; “¿Willanmanchu Bibliaqa kay tiempopi imapas pasasqanmanta? Reparay 2 Timoteo 3:1-5 nisqanpi imanasqa sasachakuykuna kasqanmanta”; “¿Hinallachu ñakariywan wañuyqa tukuy tiempo kanqa? Chaymantam Apocalipsis 21:4, 5 willachkan”, nispa.

Discurso qosqaykipi textota manaraq leechkaspa tapuynikiqa uyarisuqnikikunatam kallpanchanman yachasqanku textokunaña kaptinpas Bibliankupi ganaswan maskanankupaq. ¿Atiwaqchu chayna kallpanchayta? Yachay munasqankumanta tapuspaqa atiwaqmi. Yachachisqayki allinninkupaq kaptinpas manapaschá atencionwanchu uyarisunki achka kutikamaña uyarisqanku textokunata leeptikiqa. Chaymi yachachisqaykita allinta uyarinankupaqqa tanteanayki imamanta tapuspa piensarichinaykipaq.

Ima sasachakuymantapas rimaspa. Huk sasachakuymanta willay hinaspa qawachiy tupaqnin textota leespa chay sasachakuy imayna allichasqa kananmanta. Manapaschá huk textollawanqa qawachiwaqchu chay sasachakuy allichasqa kananmantaqa. Ichaqa uyarisuqnikikunatam niwaq chay sasachakuyta atipanapaq leesqayki texto imayna yanapasqanpi piensarinankupaq.

Chaymantapas willawaqmi Diospa munasqanman hina kawsanapaq yanapaq textomanta hinaspam Bibliamanta huk ejemplota willaspa qawachiwaq chay textopa nisqan kasukuyqa allin kasqanmanta. Wakin textopi iskay otaq kimsa yachachikuykuna kaptinqa discurso qoqkunam wakinqa uyariqninkunata tapunku mayqen kaq yachachikuy yachachisqanwan imayna tupasqanpi reparanankupaq. Ima sasachakuymantapas uyarisuqnikikunapaq willasqayki sasa kaptinqa piensarichispa yanapay hinaspa allinta entiendechiy leesqaykiwan chaynataq imamanta yachachisqaykiwanpas.

Bibliapa nisqanman hina yachachispa. Uyarisuqnikikunata yachachinaykipaq kaqwan piensarichispaqa niwaqmi: “Qawasun Diospa Palabran ima nisqanmanta”, nispa. Chaynata nispam qawachinki leesqaykiqa ancha valorniyoq kasqanta.

Jehova Diosmi Bibliapa wakin libronkunata qellqachinanpaq valekurqa Juanta, Lucasta, Pablota hinaspa Pedrota. Paykunaqa Diospa piensaynintam qellqarqaku manam kikinkupatachu. Chayraykum textokunata leespaqa manam ninachu “Pedrom qellqarqa” otaq “Pablom nirqa” nispaqa, chaynata niptinchikqa manapasmi Diospa Palabranta hinachu qawanqaku astawanraqchá Bibliata mana estudiaqkunaqa. Wakin kutipiqa Jehova Diosmi Jeremiasta kamachirqa nisqanmanta manaraq willakuchkaspan kaynata ninanpaq: “[Jehova] Diospa nisqantayá uyariychik”, nispa (Jer. 7: 3; 17:20; 19:3; 22:2). Chaymi textota manaraq leechkaspa nichwan ‘Jehova Diosmi nin’, mana chaynata nispapas qawachinanchikmi yachachisqanchikqa Diospa Palabranmanta kasqanta.

Hanayninpi otaq urayninpi kaqta qawachispa. Mayqen textotapas manaraq leechkaspayki hananpi otaq uranpi kaqta qawariy. Wakinpiqa willanaykipaschá kanqa pimanta otaq imamanta willasqanta, wakinpiñataq mana chaynatachu ruranayki kanqa. Ejemplopaq, Diosman sonqo Jobmanta rimaspaykiqa, ¿hina kaq rimayllawanchu rimawaq consuelaqnin tukuq runakunamanta? Hechos libropim Lucas qellqarqa Santiagopa, Pedropa, Pablopa, Felipepa, Estebanpa, Gamalielpa hinaspa mana cristiano kaq judiokunapa chaynataq angelkunapa rimasqankumanta. Hinaptinqa, ¿pipa rimasqanmantataq niwaq leesqayki textopiqa? Reparay, Salmos librotaqa manam rey Davidchu llapanta qellqarqa, Proverbios librotapas manam rey Salomonchu llapanta qellqarqa. Allinmi kanman Bibliata qellqaq piman qellqasqanpi chaynataq imamanta qellqasqanpi reparayqa.

Ñawpa tiempomanta willakuykunata servichikuspa. Allinmi kanman textota manaraq leechkaspa Bibliapa willakusqanman hina ñawpa tiempopi imapas pasasqanmanta yachachisqaykiwan tupaqta willaynikiqa. Wakinpiqa allinmi kanman leesqayki textota uyarisuqnikikuna entiendenankupaq ñawpa tiempopi imakuna pasasqanmanta willayniki. Piensariy, rantinchikpi Cristopa wañusqanmanta discurso qosqaykipi Hebreos 9:12, 24 nisqanta leenayki kaptinqa allinmi kanman Diospa karpanpi chuyay-chuyay sutiyoq cuarto imayna kasqanmanta puntata willayniki, chay leenaykipaq 2 versiculokunapim rikchanachichkan chuyay-chuyay cuartoman yaykuchkaq hina Jesucristo hanaq pachaman yaykusqanmanta. Ichaqa ama achkanpichu willay, mana chayqa leey munasqayki textom mana entiendekunmanchu.

Mayqen textotapas manaraq leechkaspa uyarisuqnikikuna piensarichiyta munaspaqa experienciayoq discurso qoqkunapi reparay. Imayna piensarichisqankupi reparay chaynataq imanasqa allin kasqanpipas. Discursoykita preparakuspaqa mayqen textokunata leenaykipaq tanteay hinaspa chay textokunawan imayna yanapanaykipaq kasqanpipas piensay. Textokunata manaraq leechkaspayki uyarisuqnikikunata imayna piensarichinaykipaq tanteay. Chaynatataqmi rurawaq leenaykipaq akllasqayki wakin textokunawanpas. Kay yachachikuypi nisqanman hina yachachispaqa astawanmi qawachinki Diospa Palabranman hina kasqanta.