¿Imaynatam yachachwan chiqap religion kasqanmanta?

1. ¿Pitaq niwanchikman imayna yupaychanapaq?

YAQA llapallan religionkunam ninku Diosmanta imam kaqta yachachisqankuta. Ichaqa manam chaynachu, paykunaqa manam imam kaqtachu Diosmantaqa yachachinku nitaq imayna yupaychanapaqpas. Hinaptinqa, ¿imaynatam yachachwan mayqan chiqap religion kasqanmanta? Jehova Diosllam niwanchikman imayna yupaychanapaqqa.

2. ¿Imatam ruwanayki Diosta imayna yupaychanamanta yachanaykipaq?

² Jehova Diosqa imayna yupaychananchikta yachananchikpaqmi bibliata quwarqanchik, chaymi allin kanman bibliamanta yachayniki. Diosqa kuyasusqaykiraykum yanapasunki yachachikuyninkunawan (Isaias 48:17).

3. ¿Imata ruwananchiktam Diosqa munan?

³ Wakin runakunam ninku llapan religionkunata Dios chaskisqanmanta, ichaqa chaytachu Jesusqa yachachiwarqanchik. Paymi nirqa: “Manam ‘¡señorlláy, señorlláy!’ nispa llapallan niwaqniykunachu hanaq pachapi Diospa munaychakuyninmanqa yaykunqa, aswanqa hanaq pachapi taytaypa munasqanta ruwaqkunallam”, nispa. Chaynaqa, yachananchikmi Diospa munaynin ima kasqanta hinaspam chayta ruwananchik, chaytam Diosqa munan. Jesusmi nirqa Diosta mana kasukuqkunaqa “mana allin ruwaqkuna” kasqankuta (Mateo 7:21-23).

4. ¿Imatam Jesusqa nirqa Diospa munaynin ruwaymanta?

⁴ Jesusmi nirqa Diospa munayninta ruwaptinchik sasachakuykuna kananmanta. Chaymi nirqa: “Kichki punkuntayá yaykuychikqa, hatun punkuqa hinaspa hatun ñanqa wañuymanmi apakun, achkallañam chaynintaqa yaykuchkanku, kichki punkuwan kichki ñanmi ichaqa kawsayman apakun, chaytaqa asllam tarinku”, nispa (Mateo 7:13, 14). Kichki ñanqa chiqap religionwanmi tupan, chayqa wiñay kawsaymanmi apakun. Hatun ñanñataqmi pantay religionwan tupan, chayqa wañuymanmi apakun. Jehova Diosqa manam munanchu pipas wañunantaqa, chaymi munan llapallan runakuna paymanta yachanankuta (2 Pedro 3:9).

¿IMAYNATAQ DIOSPA CHIQAP YUPAYCHAQNINKUNAQA?

5. ¿Imaynatam riqsiwaq Diospa chiqap yupaychaqninkunata?

⁵ Jesusmi nirqa Diospa chiqap yupaychaqninkunata riqsiy atinanchikmanta. Chaypaqqa, yachananchikmi imapi iñisqankuta hinaspa imata ruwasqankutapas. Jesusmi nirqa: “Rurunpim riqsinkichik”, nispa. Nirqataqmi: ‘Allin sachaqa allintam rurun’, nispa (Mateo 7:16, 17). Kaywanqa manam nichkanchu Diosta yupaychaqkuna mana pantaq kasqankutachu. Aswanqa allin kaqkunata ruwanankupaqmi kallpanchakunku. Yachasunyá imaynatam riqsichwan chiqap religionta.

6, 7. (1) ¿Imanasqam chiqap religionqa bibliapa nisqanman hina yachachin? (2) ¿Imatam Jesusmanta yachachwan?

⁶ Chiqap religionqa bibliapa nisqanman hinam yachachin. Bibliam nin: “Diospa llapallan qillqanqa paypa yuyay qusqanwan qillqasqam kachkan, allinmi runakunata yachachinapaq, pantaypi kasqanta qawachinapaq, imatapas allichanapaq chaynataq Diospa kamachikuyninman hina correginapaq. Chaynapi Diospa runankuna alli-allin yachachisqa hinaspa tukuy allinkunata ruwanankupaq listo kanankupaq”, nispa (2 Timoteo 3:16, 17). Apostol Pablom iñiqmasinkunaman kaynata qillqarqa: “Qamkunaqa Diospa palabranta willaptiykum chaskirqankichik, ichaqa manam runapa rimasqanta hinallachu aswanqa Diospa chiqap palabranta hinam”, nispa (1 Tesalonicenses 2:13). Chiqap religionqa manam runakunapa piensasqantachu yachachin, aswanqa Diospa palabranpa nisqanman hinam.

⁷ Jesusqa Diospa palabranpa nisqanman hinam yachachirqa (qaway Juan 17:17). Chaymi nirqa: “Qillqasqam kachkan”, nispa (Mateo 4:4, 7, 10). Diospa chiqap yupaychaqninkunaqa Jesustam qatipakunchik hinaspapas bibliapa nisqanman hinam yachachinchik.

8. ¿Imatam Jesus yachachirqa Jehova Diosta yupaychaymanta?

⁸ Jehova Diosllatam yupaychananchik. Bibliam nin: ‘Jehova Dios sutiki kasqantayá lliw runakuna yachachunku, qamllam kanki kay pachapa altonpi kamachiqqa’, nispa (Salmo 83:18, NM). Jesusqa munarqam pi chiqap Dios kasqanta runakuna yachanankuta. Chaymi runakunaman Diospa sutinta willarqa (qaway Juan 17:6). Jesusmi nirqa: “Jehova Diosllaykitam yupaychanaykiqa, payllatataqmi servinaykipas”, nispa (Mateo 4:10). Chaymi Diosta yupaychaqkunaqa Jesusta qatipakuspanchik Jehova Diosllata yupaychananchik, sutinmanta mañakunanchik hinaspa runakunaman willakunanchik. Yachachinchiktaqmi imakunata Dios ñuqanchikpaq ruwananmantapas.

9, 10. ¿Imaynatam kuyanakusqanchikta qawachinanchik?

⁹ Sunqumantam runamasinchikta kuyananchik. Jesusmi qatiqninkunata yachachirqa kuyanakunankupaq (qaway Juan 13:35). Wawqi-panintin hinam hinaspa turi-ñañantin hinam kuyanakunanchik, maymantaña kaspanchikpas utaq wakchaña apuña kaspanchikpas (Colosenses 3:14). Chaymi mana rinchikchu guerraman nitaq pitapas wañuchinchikchu. Bibliam nin: “Suti riqsiyllam Diospa churinkunaqa, suti riqsiyllataqmi diablopa churinkunapas. Pipas allinkunata mana ruwaqqa hinaspa runamasinta mana kuyaqqa manam Diospa churinchu”, nispa. Nintaqmi: “‘Llapallaykichikmi kuyanakunaykichik’ [...]. Amayá Cain hinachu kasun, payqa satanaspa churin kaspanmi wawqinta mana llakipayaspan wañurachirqa”, nispa (1 Juan 3:10-12; 4:20, 21).

¹⁰ Tiemponchikta, kallpanchikta hinaspa imapas kapuqninchiktam servichikunchik yanapanakunanchikpaq hinaspa kallpanchanakunanchikpaq (Hebreos 10:24, 25). Llapallankupaqmi allin kaqkunata ruwanchik (Galatas 6:10).

11. ¿Imanasqam Jesusta kasukunchik?

¹¹ Jesustam kasukunanchik, payraykum salvakuyta atisunchik. Bibliam nin: “Jesusmanta hukpiqa manam salvacionqa kanchu, salvawananchikpaqqa manamriki kay pachapiqa kanchu runakunamanta Diospa akllasqan huk runaqa”, nispa (Hechos 4:12). Kay qillqapim 5 kaq yachachikuyninpi yachamurqanchik Jehova Dios kay pachaman Jesusta kachamusqanmanta, chaynapi runakunapa rantinpi wañunanpaq (Mateo 20:28). Jehova Diosqa Jesustam akllarun hamuq punchawkunapi kay pachata kamachimunanpaq. Chaymi bibliaqa niwanchik wiñaypaq kawsakuyta munaspanchikqa Jesusta kasukunanchikmanta (qaway Juan 3:36).

12. ¿Imanasqam kamachiyta munaq runakunawanqa mana chaqrukunanchikchu?

¹² Kamachiyta munaq runakunawanqa amayá chaqrukusunchu. Jesuspas manam chaytaqa ruwarqachu. Juezkunapa qayllanpim, Jesusqa Roma nacionta kamachiq Pilatota nirqa: “Munaychakuyniyqa manam kay pachapi kamachiqkunapa hinachu”, nispa (qaway Juan 18:36). Jesus hinam, Jehova Dioslla kamachiwananchikta munanchik. Chayraykum maypiña yachaspanchikpas kamachiyta munaq runataqa mana akllanchikchu. Ichaqa bibliam kamachiwanchik: “Llapallan runakunayá autoridadkunata kasukuchunku”, nispa (Romanos 13:1). Yachasqanchik nacionpi kamachikuykunataqa kasukunchikmi. Ichaqa Diospa kamachisqanpa contranpi kaptinqa, apostolkunatam qatipakunchik. Paykunam nirqaku: “Runakunamantaqa Diostam kasukunayku”, nispa (Hechos 5:29; Marcos 12:17).

13. ¿Imamantam runakunaman willakunanchik?

¹³ Diospa munaychakuynillan sasachakuykunata allichananmantam willakunanchik. Jesusmi nirqa: “Diospa munaychakuyninmanta kay sumaq willakuymi willakusqa kanqa enterollan kay pachapi”, nispa (qaway Mateo 24:14). Manam mayqan kamachiq runapas Dios hinaqa sasachakuykunataqa tukuchinmanchu (Salmo 146:3). Jesusmi yachachiwarqanchik Diosta mañakuspanchik munaychakuyninta mañakunanchikpaq, nirqam: “Munaychakuynikiyá hamuchun. Munasqaykiyá ruwasqa kachun kay pachapipas hanaq pachapi hina”, nispa (Mateo 6:10). Bibliam niwanchik llapallan kamachiq runakunata Diospa munaychakuynin puchukachinanmanta, chaynapim Diosllaña wiñaypaq kay allpa pachata kamachimunqa (Daniel 2:44).

14. ¿Pikunataq kanku Diospa chiqap yupaychaqninkunaqa?

¹⁴ Tukuy kaykunamanta yacharuspa, tapukuy: “¿Pikunataq bibliapa nisqanman hina yachachinku? ¿Pikunataq Diospa sutinmanta willakunku? ¿Pikunataq sunqumanta kuyanakunku? ¿Pikunataq mana iskayrayankuchu salvawananchikpaq Jesusta Dios kachamusqanmanta? ¿Pikunataq kamachiyta munaq runakunawanqa mana chaqrukunkuchu? ¿Pikunataq willakunku sasachakuyninchikta Dioslla allichananmanta?”, nispa. Jehova Diospa testigonkunallam tukuy chaykunataqa ruwanku (Isaias 43:10-12).

¿IMATAM KUNANQA RUWANAYKI?

15. Yupaychasqanchikwan Diosta kusichiyta munaspaqa, ¿imatam ruwananchik?

¹⁵ Manam Dios kasqantaqa yachayllachu-yachananchik. Demoniokunapas yachankum Dios kasqantaqa, ichaqa manam kasukunkuchu (Santiago 2:19). Yupaychasqanchikwan Diosta kusichiyta munaspaqa, paypa kamachiwasqanchiktam kasukunanchik, manam pay kasqanta yachayllachu.

16. ¿Imanasqam pantay religiontaqa saqinanchik?

¹⁶ Yupaychasqanchikwan Diosta kusichiyta munaspaqa, pantay religiontam saqinanchik. Diosmanta willakuq Isaiasmi kaynata qillqarqa: ‘Diospa millakusqan kaqkunata ama hapispayá lluqsiychik’, nispa (Isaias 52:11; 2 Corintios 6:17). Chaymi pantay religionpa imapas ruwasqanta hinaspa yachachisqanta qipanchananchik.

17, 18. (1) ¿Imataq “hatun Babiloniaqa”? (2) ¿Imanasqataq utqayman lluqsikunayki?

¹⁷ ¿Imataq pantay religionqa? Diosta yupaychanapaq bibliapa nisqanman hina mana yachachiq religionkunam. Chaymi bibliaqa llapallan pantay religionkunata sutichan: “Hatun Babilonia”, nispan (Apocalipsis 17:5). ¿Imanasqataq chaynata sutichan? Babilonia nacionpi pantay yachachikuykuna qallaykusqanraykum, chayqa karqa sinchi para qipatam. Chay pantay yachachikuykunaqa enteron pachamanmi chiqirurqa. Babiloniapi runakunaqa hukllapi kimsa dioskunatam yupaychaqku. Kunanpas achka religionkunam yachachinku hukllapi kimsa dioskuna kasqanta, ichaqa bibliam sutillata qawachin Jehova Diosqa chullalla chiqap Dios kasqanta hinaspa churinñataq Jesus kasqanta (Juan 17:3). Babiloniapi runakunaqa piensarqakutaqmi runakuna wañuruptinku espiritun hinalla kawsasqanta hinaspa infiernopi ñakarisqantapas. Ichaqa manamá chaynachu (qaway 14, 17 hinaspa 18 kaq willakuykunata).

¹⁸ Diosqa willarqañam pantay religionkuna pisi tiempollamantaña puchukachisqa kananmanta (Apocalipsis 18:8). Chaynaqa, ¿imanasqam utqayman lluqsikunayki pantay religionmanta? Jehova Diosmi munan chaylla lluqsikunaykita (Apocalipsis 18:4).

19. ¿Jehova Diosqa saqirusunkichu paytaña yupaychaptikiqa?

¹⁹ Pantay religionmanta lluqsikuruspa Jehova Diostaña yupaychanaykipaq tanteakuruptikiqa, ichapas wakin aylluykikuna utaq amistadnikikunaqa mana entiendespanku harkakusunki. Ichaqa Jehova Diosqa manam saqisunkichu. Qusunkim enteron pachapi wara-waranqantin aylluyki hina kuyakuq iñiqmasikikunata hinaspa musuq pachapi kawsakunaykipaq suyakuytapas (Marcos 10:28-30). Ichapas harkakuq wakin aylluykikunaqa hinaspa amistadnikikunaqa hamuq punchawkunapi bibliata estudiayta qallaykunmanku.

20. ¿Imanasqam Diospa munasqanman hinaña yupaychanayki?

²⁰ Pisi tiempollamantañam Diosqa mana allinkunata chinkachinqa hinaspam kay pachata kamachimunqa (2 Pedro 3:9, 13). Chayqa sumaqmi kanqa, llapanchikmi Jehova Diostaqa munasqanman hinaña yupaychasunchik. Chaynaqa, tukuy ima yachamusqanchiktam ruwanaykiña hinaspam Diospa munasqanman hinaña yupaychanayki.