‘Diosqa kawsaqkunapa Diosninmi’

¿Diosqa atiyniyoqchu wañuyta chinkachinanpaq? Awriki. Wañuyqa manam Diosmanta aswan atiyniyoqchu (1 Corintios 15:26; Exodo 6:3). Wañusqakunata kawsarichinanpaqmi Diosqa atiyniyoq chaytam ruwanqa hamuq tiempopi.a ¿Confiachwanchu chay prometesqanpi? Yachanaykipaq leey Señorninchik Jesucristopa nisqanta. (Leey Mateo 22:31, 32.)

Kawsarimuypi mana creeq saduceokunatam Jesucristo nirqa: ‘¿Manachu leerqankichik Diospa nisusqaykichikta? Paymi nirqa: “Ñoqaqa kani Abrahampa, Isaacpa hinaspa Jacobpa Diosninmi” nispa. Chaynaqa Diosqa manam wañusqakunapa Diosninchu ichaqa kawsaqkunapa Diosninmi’, nispa. Chay nisqantaqa Jesucristo kay Pachaman manaraq hamuchkaptinmi 1514 wata ñawpaqtaraq rupachkaq chaprapa ñawpaqninpi Moisesman Jehova Dios nirqa (Exodo 3:1-6). Jesuspa willakusqanman hinaqa “Ñoqaqa kani Abrahampa, Isaacpa hinaspa Jacobpa Diosninmi” nisqanwanmi qawachin kawsarimuy kananmanta. ¿Imaynatam chayta entiendenchik?

Moiseswan Jehova Dios rimaptinqa Abrahampas Isaacpas Jacobpas unay watakunañam wañusqa karqaku. Abrahanmi wañukurqa 329 wata ñawpaqtaraq, Isaacñataq 224 wata ñawpaqtaraq, Jacobpas 197 wata ñawpaqtaraq. Chaywanpas Jehova Diosqa manam nirqachu ‘paykunapa Diosninmi karqani’ nispaqa, aswanmi nirqa ‘paykunapa Diosninmi kani’ nispa, paykunaqa kawsachkanmankupas hina. ¿Imanasqa?

Jehova Diosqa kawsaqkunapa Diosnin kasqanmantam Jesusqa allinta entiendechirqa, manam wañusqakunapa Diosnin kasqanmantachu. Chay nisqan ima ninan kasqanpi piensariy. Kawsarimuy mana kaptinqa Abrahampas Isaacpas Jacobpas wiñaypaqchá wañusqa kanmanku, chayna kaptinqa Jehova Diosqa wañusqakunapa Diosninchá kanman. Chaywanqa qawachichkanmanchá serviqninkunata wañuymanta mana libray atisqanta, chaynataq wañuyqa Jehova Diosmanta astawan atiyniyoq kasqantapas.

Chaynaqa imanichwantaq, ¿Abrahanmanta, Isaacmanta, Jacobmanta, chaynataq Jehova Diosta servichkaspa wañuqkunamanta? Jesucristom nirqa: “Paypaqa llapallanmi kawsachkan”, nispa (Lucas 20:38). Jehova Diosqa cumplinqapunim prometesqanta, wañuruptinkupas serviqninkunamantam kawsachkanmankupas hina riman (Romanos 4:16, 17). Payqa lliwtam yuyachkan kawsarimuy punchaw chayamunankama.

¿Munawaqchu kuyasqa aylluyki kawsarimunanta? Jehova Diosqa tukuy atiyniyoqmi wañuyta chinkachinanpaq. Manam imapas harkanqachu kawsariy kananpaq prometesqan cumplikunantaqa. ¿Munawaqchu kawsarimuymanta astawan yachayta chaynataq Jehova Diosmantapas? Astawan yachaspaqa Jehova Diosmanmi asuykunki, payqa ‘kawsaqkunapa Diosninmi’.