2 Samuel

15 Chaykuna pasasqan qhepatan Absalonqa conseguikurqan juj carretata, caballokunata, ñaupanta phawananpaq pisqa chunka runakunatawan.+ 2 Absalonqa tutallamanta jatarispan llaqtaman jaykuna ñan patapi sayaq.+ Justiciata mañakuq pipas reyman jamuqtintaq+ payqa wajaspa tapuq: “¿Maymantan kanki?”, nispa. Runakunataq niqku: “Israelpa jujnin ayllunmantan noqaqa kani”, nispa. 3 Absalontaq niq: “Mañakusqaykiqa allinmi, chaninmi. Ichaqa manan pitapas reyqa churanchu justiciata ruwapunasuykipaq”, nispa. 4 Chaymantapas Absalonqa nillaqtaqmi: “Noqata kay nacionpi juezta churawankuman chayqa, llapa kayman jamuqkunatan yanapayman. Ima problemankutapas chanintan allichapuyman”, nispa.

5 Pipas payman qayllaykuspa k’umuykushaqtintaq Absalonqa makinmanta jap’ispa sayarichiq, jinaspa much’aykuq.+ 6 Chaytan Absalonqa ruwaq justiciata mañakuspa reyman jamuq llapa Israel runakunawan. Chhaynatan Absalonqa llapa Israel runakunaq sonqonta pisi-pisimanta suwasharqan.+

7 Tawa wata* pasaqtintaq Absalonqa reyta nirqan: “Reyníy, valekusayki, Hebrón+ llaqtata rirusaq Jehová Diosman promesa ruwasqayta junt’aq. 8 Siria ladopi kaq Guesurpi kashaspan+ juj promesata ruwarqani,+ nirqanin: Jehová Dioschus Jerusalenman kutichiwanqa chayqa, Jehová Diosmanmi juj ofrendata jaywasaq,* nispa”. 9 Chaymi rey Davidqa nirqan: “Ama llakikuychu, rillay”, nispa. Jinan Absalonqa Hebrón llaqtaman rirqan.

10 Absalonqa llapa Israel ayllukunamanmi pakallapi runankunata kacharqan, paykunatan nirqan: “Ovejaq waqranta tocaqta uyarispa jinan ninkichis: ¡Hebrón+ llaqtapin Absalonta reyta churapunku!, nispa”. 11 Absalonqa iskay pachaj runakunatan Jerusalenmanta wajachirqan Hebrón llaqtaman rinankupaq. Chay runakunaqa manan yacharqankuchu imatachus Absalón ruwayta munasharqan chaytaqa, chayraykun rillarqanku. 12 Chaymantapas sacrificiota jaywashaspan Absalonqa Ahitofelta+ wajachimurqan Guiló+ llaqtanmanta, Ahitofelqa Davidpa yuyaychaqninmi karqan.+ Absalonwan kuska David contra sayariqkunaqa astawanmi yapakusharqanku.+

13 Tiempowanmi juj runa Davidpa kasqanman jamurqan, jinaspan nirqan: “Israel runakunan Absalonta qatikapushanku”, nispa. 14 Chayta uyarispan Davidqa Jerusalenpi kaq llapa kamachinkunata nirqan: “¡Jaku, manaraq Absalón chayamushaqtin ayqekusun!+ ¡Usqhaylla kay llaqtamanta lloqsisun, mana jinaqa Absalonmi qonqaylla chayaramuspa llapa llaqtantinta wañuchiwasun!”,+ nispa. 15 Jinan kamachinkunaqa Davidta nirqanku: “Reyniyku, imataña ruwanki chaypas yanapasaykikun”,+ nispa. 16 Jinan rey Davidqa wasinpi kaqkunapiwan llaqtamanta llapallanku lloqsirqanku. Wasinta* cuidanankupaqmi ichaqa chunka tiyaqmasin warmikunata* saqerqan.+ 17 Chhaynatan rey Davidqa llapa runankunantin llaqtamanta lloqsirqanku, jinaspa Bej-Meracpi sayaykurqanku.

18 Jinan rey Davidqa pikunachus paywan jamushasqanta yachananpaq sayaykurqan. Chaymi paypa ñaupanta pasarqanku llapa kamachinkuna, keretita runakuna, peletita runakuna,+ Gaj+ llaqtamanta+ payta qatikamuq soqta pachaj runakunapas. 19 Gaj llaqtayoq Ittái+ runatataq nirqan: “Qanqa waj llaqtayoqmi kanki, llaqtanmanta qarqosqa runa, amaña noqaykuwanqa riychu aswanpas kutipuy, jinaspa mosoq reywan qhepakamuy. 20 Jinaspapas qanqa chayllaraqmi chayamunki, manan obligaykimanchu noqawan kuska kayman jaqayman rinaykitaqa. Aswanpas runaykikunata pusarikuspa kutipuy, Jehová Diosmi mana tukukuq munakuyninta* rikuchisunki manan saqerparisunkichu”,+ nispa. 21 Ittaitaq ichaqa rey Davidta nirqan: “Wiñaypaq kausaq Jehová Diospa sutinpi, qanpa sutiykipi iman jurayki, ¡maytaña rinki chaypas qanwan kuskallapunin noqaqa risaq, wañunayña kaqtinpas manapunin saqesaykichu!”,+ nispa. 22 Chayta niqtinmi Davidqa nirqan: “Chhaynaqa jaku risunchis”, nispa. Jinan Gaj llaqtayoq Ittaiqa+ llapa runankunantin wawankunantin ima Davidwan kuska rirqanku.

23 Rey Davidqa Cedrón wayq’opin+ sayasharqan, llapa runankunataq chayninta chimpasharqanku ch’inneqman riq ñan ladoman. Chay wayq’ota pasashaqtinkun chaykunapi tiyaq runakunaqa khuyayta waqaykurqanku. 24 Sadocpas+ Leví ayllu runakunawan+ kuskan risharqan, paykunan apasharqanku Diospa rimanakuynin arcata.*+ Jinan paykunaqa sayaykurqanku, jinaspa cheqaq Diospa rimanakuynin arcata pampaman churaykurqanku. Cedrón wayq’ota chimpayta tukushaqtinkutaq Abiatarqa+ chayamurqan. 25 Sadoctataq rey Davidqa nirqan: “Diospa rimanakuynin arcata llaqtaman kutichipuy.+ Jehová Dioschus sumaqta qhawariwan chayqa, paymi kutichimuwanqa jinaspa rimanakuynin arcatapas maypichus kashan chaytapas rikuchiwanqa.+ 26 Manataqchus allinpaq qhawariwan chayqa, payña ima munasqantapas noqawan ruwachun”, nispa. 27 Chaymantapas rey Davidqa nillarqantaqmi: “Qanqa rijuriykunata rikuq runamá kashanki riki.+ Phaway Abiatarwan kuska llaqtaman kutipuy. Aimáz wawaykipas, Abiatarpa wawan Jonatanpas+ qankunawan kuska iskayninku kutipuchunku. 28 Noqan ch’inneqpi suyamusaykichis, maypichus Jordán mayu chimpanakuna kashan chaypi. Chaypin suyamusaykichis ima willakuytapas apachimuwanaykichiskama”,+ nispa. 29 Jinan Sadocwan Abiatarwanqa Diospa rimanakuynin arcata Jerusalenman kutichipurqanku, jinaspa chaypi qhepakapurqanku.

30 Davidqa uman tapasqan q’ala chakilla waqaykuspa Olivos orqota+ wichasharqan. Paywan riq runakunapas uman tapasqan waqaykuspa wichashallarqankutaq. 31 Jinan Davidta nirqanku: “Ahitofelpas Absalonwan kuskan qan contra jatarishan”,+ nispa. Chaymi Davidqa nirqan: “Jehová Diosníy+ rogakuykin, Ahitofelpa ima yuyaychasqanpas mana yuyayniyoq runaq rimasqanman jina tukupuchun”,+ nispa.

32 Runakunaq Diosta yupaychananku orqo pataman David chayaqtinqa, chaypiñan kashasqa arkita runa+ Jusaiqa,+ p’achanpas llik’i-llik’illaña, umanpas jallp’akamallaña. 33 Davidmi ichaqa nirqan: “Noqawan rispaqa manan nishutachu yanapawankiman. 34 Aswanpas phaway Jerusalén llaqtaman kutiy, jinaspa Ahitofelpa yuyaychasqanta pantachimuspa yanapaway.+ Llaqtaman chayaspan Absalonta ninki: Reyníy, kamachiykin kani. Ñaupaqqa papaykitan servirqani, kunanmi ichaqa qanta servisayki,+ nispa. 35 Chaypin kashanku sacerdote Sadocwan Abiatarwan. Paykunaman lliuta willanki imakunatachus kamachikunay wasipi uyarinki chayta.+ 36 Chaymantapas chaypin kashallankutaq Sadocpa wawan Aimazpas+ Abiatarpa wawan Jonatanpas,+ imatapas uyarispaykiqa paykunawan willachimuwanki”, nispa. 37 Jinan Davidpa amigon Jusaiqa+ Jerusalén llaqtaman jaykurqan, chay ratun Absalonpas Jerusalén llaqtaman jaykushallarqantaq.