2 Samuel
21 Davidpa kamachikusqan p’unchaykunapin Israel llaqtapi kinsa wata yarqay karqan.+ Chaymi Davidqa Jehová Diosta tapurqan, Jehová Diostaq nirqan: “Kay pasananpaqqa Saulwan wasinpi kaqkunapiwanmi juchayoq kanku, paykunan Gabaón runakunata wañuchirqanku”,+ nispa. 2 (Gabaón runakunaqa+ manan Israel t’aqamantachu karqanku, aswanpas amorreo runakunamanta+ qhepaqkunan karqanku. Israel runakunan Gabaón runakunata mana wañuchinankupaq jurarqanku,+ Saulmi ichaqa chay runakunata chinkachiytapuni munarqan, payqa manan munarqanchu Israel runakuna ukhupi, Judá ayllu runakuna ukhupi Gabaón runakuna tiyanankuta). Jinan rey Davidqa Gabaón runakunata wajachirqan paykunawan rimananpaq. 3 Jinaspan nirqan: “¿Imatan ruwaykuman juchaykumanta paganaykupaq? ¿Imatan ruwapuykichisman Jehová Diospa llaqtanta* bendecinaykichispaq?”, nispa. 4 Gabaón runakunataq nirqanku: “Saulwan wasinpi kaqkunapiwan ruwawasqankumantaqa manan qoriwanpas qolqewanpas pagayta atiwankikumanchu.+ Manataqmi pitapas Israelpiqa wañuchiyta atiykumanchu”, nispa. Jinan Davidqa nirqan: “Munasqaykichista mañakuwaychis, noqaqa ruwapusaykichismi”, nispa. 5 Chaymi paykunaqa reyta nirqanku: “Saulmi Israelmanta llapaykuta chinkachiwanankupaq yuyaykurqan, chaymi yaqa llapaykuta wañuchiwarqanku.+ 6 Chayrayku Saulpa qanchis wawankunata entregawayku. Paykunata wañuchispan Jehová Diospa ñaupanpi warkusaqku*+ Saulpa llaqtan Guibeapi,+ paytan Jehová Diosqa rey kananpaq ajllarqan”,+ nispa. Jinan rey Davidqa nirqan: “Nisqaykichisman jinan entregasaykichis”, nispa.
7 Davidmi ichaqa Saulpa nieton Mefiboset-ta+ khuyapayarqan papan Jonatanwan Jehová Diospa ñaupanpi juramentota ruwasqankurayku.+ 8 Jinan reyqa Ayopa ususin Rizpapa+ iskaynin churinkunata ajllarqan, Armonitawan Mefiboset-tawan, paykunatan Rizpaqa Saulpaq onqokurqan. Chaymantapas ajllallarqantaqmi Saulpa ususin Micalpa*+ pisqantin churinkunata. Chay wawakunatan payqa Meolá llaqtayoq Barzilaipa churin Adrielpaq+ onqokurqan. 9 Chay qanchis runakunatan Davidqa Gabaón runakunaman entregarqan. Paykunaq cuerpontan Gabaón runakunaqa orqo pataman rispa Jehová Diospa ñaupanpi warkurqanku.+ Chhaynapin qanchisnintin wañurqanku. Paykunataqa cosecha tiempo qallariypin wañuchirqanku, jayk’aqchus cebada cosechayta qallarisharqanku chay tiempopi. 10 Chaymantataq Ayopa ususin Rizpaqa+ qhasqa telata aparikuspa qaqa pataman mast’arqan. Chaypin payqa kasharqan cosecha tiempo qallariymantapacha para chayamunankama. Payqa wawankunaq cuerponman ama imapas qayllaykunanpaqmi p’unchaypi phalaq animalkunata manchachiq, tutapitaq salqa animalkunamanta cuidaq.
11 Saulpa tiyaqmasin* Rizpapa chay ruwasqantan Davidman willarqanku. 12 Jinan Davidqa Saulpa tullunta Jonatanpa tulluntawan maskhaq rirqan. Saulpa Jonatanpa tullunkunataqa Jabés-Galaad+ llaqtapi kaq umallikunan jap’isharqanku, paykunan Bej-San plazamanta suwaspa llaqtankuman aparqanku. Chay plazapin Filistea runakunaqa Saulpa Jonatanpa cuerponta warkurqanku Guilboa orqopi+ Saulta atipamusqanku qhepaman. 13 Davidmi Saulpa tullunta Jonatanpa tullunta apamurqan. Chaymantapas apamullarqankutaqmi warkusqanku runakunaq tulluntapas.+ 14 Jinaspan Saulpa papan Quispa+ sepulturanpi Saulpa tulluntapas Jonatanpa tulluntapas p’ampapurqanku, chay sepulturan kasharqan Zelá+ llaqtapi Benjamín ayllupi. Tukuy chaykunatan reypa nisqanman jina ruwarqanku, chayraqmi Israel nacionpaq mañakusqankuta Diosqa uyarirqan.+
15 Chay qhepamanmi Israel runakunaqa Filistea runakunawan guerrapi kallarqankutaq.+ Jinan rey Davidqa runankunawan kuska Filistea runakunawan maqanakuq rirqan, Davidmi ichaqa sinchita sayk’urapurqan. 16 Chay maqanakuypin Davidta wañuchiyta munarqan Isbí-Benof sutiyoq refaín runa.+ Chay runaq cobremanta lanzanqa pesarqan yaqa kinsa kilo kuskantan,*+ espadanpas mosoqllan karqan. 17 Chayllamanmi Zeruyapa churin Abisaiqa+ payta yanapaq jamurqan,+ jinaspan chay Filistea runata wañuchirqan. Chaymantataq Davidpa runankunaqa payta juraspa nirqanku: “¡Noqaykuqa manan munaykuchu Israelpa k’anchaynin wañunanta,+ chaymi kunanmantaqa manaña jayk’aqpas noqaykuwanqa maqanakuq rinkichu!”,+ nispa.
18 Chay qhepamantaq Israel runakunaqa jujmanta Filistea runakunawan Gofpi maqanakullarqankutaq.+ Chay kutipin Jusá runa Sibecaiqa+ Saf sutiyoq refaín runata+ wañuchirqan.
19 Chaymantapas Israel runakunaqa jujmantan Filistea runakunawan Gofpi maqanakullarqankutaq.+ Jinan Belenmanta Jaré-Oreguinpa churin Elananqa Gaj llaqtayoq Goliat-ta wañuchirqan. Goliatpa lanzanpa mangonqa karqan telarpi k’uyuna k’aspi jinan.+
20 Chay qhepamanpas jujmantan Israel runakunaqa Filistea runakunawan Gaj llaqtapi maqanakullarqankutaq. Chay llaqtapin karqan juj jatunkaray refaín runa,+ sapanka makinpi sapanka chakinpi soqta dedokunayoq. Llapanpiqa iskay chunka tawayoq dedokunayoqmi karqan. 21 Chay runan Israel runakunata k’amisharqan,+ chaymi Simeipa+ churin Jonatanqa chay runata wañuchirqan. Simeiqa Davidpa wayqenmi karqan.
22 Chay jatunkaray tawantin refaín runakunaqa Gaj llaqtapin tiyarqanku, paykunatan Davidwan kamachinkunawan wañuchirqanku.+