2 Pedro
3 Munasqa wayqe-panaykuna, kaywanqa ñan iskay cartataña qelqamushaykichis; kunanpas ñaupaq apachimusqay cartapi jinan imatapas allin yuyaywan ruwanaykichispaq kallpachamushaykichis,+ ichaqa yuyarichiq jinallan qelqamushaykichis, 2 chhaynapi ch’uya profetakunaq ñaupaqmantaña rimasqanta yuyarinaykichispaq, salvawaqninchis Señorpas apostolkunawan* imachus kamachikusqanta yuyarinaykichispaqwan. 3 Ñaupaqtaqa kayta allinta yachaychis: Tukukuy p’unchaykunataqa millay asipayakuq runakunan rijurimunqa, paykunaqa munasqankuman jinallan kausanqaku,+ 4 ninqakutaq: “Jamusaqmi nintáq, ¿maytaq jamusqan kanchu?+ Ñaupa taytanchiskunaq wañusqanmantapachapas kaqllan imapas kashan, runata Diospa kamasqanmantapachapas manan imapas cambianchu”,+ nispanku.
5 Paykunaqa yuyaypin mana yuyariyta munankuchu imaynas cieloqa ñaupa tiempomantaña karqan chayta, imaynas Diospa siminwan jallp’apas unumanta t’aqasqa kasharqan unu chaupipitaq kasharqanpas chayta.+ 6 Chaykunawanmi Diosqa chay tiempopi runakunata wañuchipurqan. Chaymi pasarqan llapa kay pachata unu millp’uqtin.+ 7 Diospa simillanwantaqmi kay tiempopi kaq cielopas kay pachapas ninapaq waqaychasqa kashan, Diosta mana manchakuq runakunapaq juicio p’unchay chayamunankamataqmi kanqapas, chay p’unchaypin chay runakunaqa chinkachisqa kanqaku.+
8 Ichaqa, munasqa wayqe-panaykuna, aman kayta qonqankichischu: Jehová* Diospa “juj p’unchay” nisqanqa waranqa wata jinan noqanchispaqqa, “waranqa wata” nisqanchistaq juj p’unchay jinalla paypaqqa.+ 9 Wakinña piensanku Jehová* Dios unaymanta promesanta junt’ananpaq chaypas, manan payqa unaymantachu junt’anqa,+ aswanmi payqa qankunawan pacienciakushan. Chaymantapas payqa manan munanchu pipas wañunantaqa, aswanmi munan lliupas juchankumanta pesapakuspa payman kutirikunankuta.+ 10 Jehová* Diospa p’unchayninqa+ suwa jinan jamunqa,+ chaypin cieloqa manchay kunununuywan tukupunqa,+ qallariy kaqkunapas sinchita rupharispan unuyapunqa; kay pachapas chaypi imaymana ruwasqakunapas sut’imanmi orqosqa kanqa.+
11 Tukuy chaykunaqa chhayna unuyachisqataq kanqa chayqa, allinta piensaychis imayna runachus kanaykichis chaypi. Qankunaqa ch’uyata kausaq runakunan kanaykichis, Dios sonqo runakuna jinataqmi imatapas ruwanaykichis. 12 Chaymantapas ama qonqaspa makilla suyashaychis Jehová* Diospa p’unchaynin chayamunanta,+ chaypin cieloqa nina rauraywan kanaykusqa kanqa,+ qallariy kaqkunapas sinchita rupharispan unuyapunqa. 13 Ichaqa paypa prometesqanman jinan mosoq cielo mosoq jallp’a pacha ima kanqa,+ chaypiqa chanin kausayllan kanqa;+ chaytan noqanchisqa suyakushananchis.
14 Chayrayku, munasqa wayqe-panaykuna, chaykunatataq suyakushankichis chayqa, tukuy atisqaykichista ruwaychis Diosqa mana ima qhelliyoqta, mana k’iñasqata, paywan sumaq kausashaqta tukukuypi tarinasuykichispaq.+ 15 Chaymantapas Señorninchispa pacienciantaqa salvasqa kanaykichispaqpas pacienciakushanman jinata rikuychis; iñiqmasinchis Pablopas chhaynatan rikurqan,+ chaychá paypas Diospa yuyaychasqan kaspa qelqamurqasunkichis. 16 Lliu cartanpin payqa tukuy chaykunamanta qelqamusqa. Ichaqa chay cartakunapi qelqamusqanmanta wakinqa sasa entiendeymi kasqa, chaytan iñiypi mana allin tajyasqa, mana yuyayniyoq kaqkunaqa q’ewinku, imaynan Diospa simin wakin qelqakunatapas q’ewinku chhaynata, ichaqa paykuna chinkachisqa kanallankupaqtaqmi chaytaqa ruwashanku.
17 Munasqa wayqe-panaykuna, qankunaqa ñataq chaykunata yachankichisña chayqa, allinta cuidakuychis, paqtataq chay millayta kausaq runakuna pantasqa yachachikuyninkuwan pantachisunkichisman, jinaspa manaña qaqatachu sayawaqchis.+ 18 Chayrayku wiñashallaychis salvawaqninchis Señorninchis Jesucristoq ancha sumaq sonqo kayninta chaskiypi, jinallataq paymanta yachaypipas. Jatunchasqa payqa kachun kunanpas wiñay-wiñaypaqpas. Amén.*