Lucas
21 Jesusmi qhapaq runakunata qhawasharqan qolqe churanakunaman qolqenku churashaqta.+ 2 Chayllamanmi juj wajcha viudata rikurqan iskay pisi valorniyoq qolqechata* chayman churaykuqta,+ 3 jinan Jesusqa nirqan: “Cheqaqtan niykichis: Kay viudan wajchaña kashaspapas, llapankuq churasqanmantaqa aswan askhataraq churaykun.+ 4 Llapa churaqkunaqa puchullankumantan churanku, kay viudan ichaqa wajcha kayninpi tukuy kausananpaq kaqta churaykapun”,+ nispa.
5 Chay qhepatataq wakinkuna rimasharqanku temploqa sumaq rumikunawan Diosman qosqa kaqkunapiwan sumaqchasqa kasqanmanta,+ 6 jinan Jesusqa nirqan: “P’unchaykunan chayamunqa, chaypin kay rikusqaykichiskunaqa lliu thunisqa kanqa, manan rumi patapi juj rumillapas qhepanqachu”,+ nispa. 7 Jinan payta nirqanku: “Yachachikuq, ¿jayk’aqtaq chaykunari kanqa? ¿Ima señalmi kanqa chaykuna pasananña kashaqtin?”,+ nispa. 8 Chaymi Jesusqa nirqan: “Allinta qhawarikuychis, paqtataq pipas pantachisunkichisman,+ askhan sutiywan sutichakuspa jamunqaku, noqan payqa kani nispa; chay señalasqa tiempoqa cercapiñan kashan, nispa. Aman paykunaq qhepantaqa rinkichischu.+ 9 Chaymantapas guerrakunamanta ch’aqwaykunamantawan uyarispaqa aman mancharikunkichischu. Chaykunaraqmi ñaupaqtaqa kanan, tukukuymi ichaqa mana kaq ratuchu kanqa”,+ nispa.
10 Chaymantataq paykunata nirqan: “Juj nacionmi juj nación contra jatarinqa,+ juj llaqtataq juj llaqta contra jatarinqa.+ 11 Kallanqataqmi jatun terremotokunapas, kayneqpi chayneqpitaq kanqa yarqaykuna mast’arikuq millay onqoykuna ima;+ chaymantapas runakunan rikunqaku mancharikunapaq jina kaqkunata, cielomanta jatun señalkunatawan.
12 ”Manaraq chaykuna kashaqtinmi ichaqa qankunata qatikachasunkichis,+ jap’ispataq sinagogakunaman carcelkunaman ima apasunkichis. Chaymantapas sutiyraykun reykunaman kamachikuqkunaman ima apasqa kankichis,+ 13 chhaynapi paykunapas willasqa kanankupaq. 14 Ichaqa aman ñaupaqmantaraqqa piensankichischu imaynatachus favorniykichispi rimawaqchis chaytaqa;+ 15 noqan yachayta qosaykichis, yanapasaykichistaqmi imaynatachus rimanaykichispaqpas, chhaynapin contraykichispi kaqkunaqa mana imaniytapas atisunkichischu.+ 16 Chaymantapas tayta-mamaykichiskuna, wayqeykichiskuna, parienteykichiskuna, amigoykichiskuna imallataqmi juzganaman apasunkichis, chhaynapin wakinniykichis wañuchisqa kankichis,+ 17 sutiyraykutaqmi llapa runakunaq cheqnisqan kankichis.+ 18 Chaywanpas, manan juj chujchallaykichispas umaykichismantaqa chinkanqachu.+ 19 Allinta aguantaspan vidaykichistapas* salvankichis.+
20 ”Jerusalén llaqtata soldadokunawan muyuykusqa kashaqta rikuspaykichisqa,+ yachaychis ch’usaqyachisqa kanan tiempo qayllaykamusqanta.+ 21 Chaypacha Judeapi kaqkunaqa orqokunaman ayqechunku,+ Jerusalén llaqta ukhupi kaqkunapas chaymanta lloqsichunku, campokunapi kaqkunapas amaña chayman jaykuchunkuchu. 22 Chay p’unchaykunapin Diospa phiñakuynin chayamunqa, chhaynapi Diospa simin qelqakunapi lliu qelqasqakuna junt’akunanpaq. 23 ¡Ay chay p’unchaykunapi onqoq warmikunamanta, ñuñuq wawayoq warmikunamantapas!+ Chay p’unchaykunaqa sinchi ñak’ariymi kay jallp’api kanqa, kay llaqtapas castigasqan kanqa. 24 Wakinmi espadawan wañuchisqa kanqaku, wakintaq llapa nacionkunaman preso apasqa kanqaku,+ Jerusalén llaqtapas nacionkunaq saruykachasqanmi kanqa, nacionkunapaq señalasqa tiempo junt’akunankama.+
25 ”Chaymantapas intipi, killapi, ch’askakunapi iman señalkuna kanqa;+ kay pachapitaq nacionkuna ñak’arinqaku, manataq imanakuytapas atinqakuchu lamar-qocha phoqchirispa qaparisqanrayku. 26 Kay pachantinman imakunachus jamunanta reparaspan runakunaqa sinchita mancharikunqaku, yuyayninkuraqmi chinkanqapas; cielopi atiykunapas chhafchirisqan kanqa. 27 Chaykuna qhepatataq runaq Churinta rikunqaku+ atiywan sinchi lliflli kaywan phuyupi jamushaqta.+ 28 Chaykuna qallariqtinqa allinta sayaychis umaykichistapas oqariychis; kacharichisqa kanaykichismi chayamushanña”, nispa.
29 Chaymantataq Jesusqa juj rijch’anachiyta* willarqan: “Qhawariychis higos sach’ata llapa wakin sach’akunatapas.+ 30 Raphichankunaq ch’ijchimusqanta rikuspaykichismi qankunaqa yachankichis q’oñi tiempo cercapiña kashasqanta ¿riki? 31 Chhaynallataq chaykunaq pasasqanta rikuspaykichispas yachaychis Diospa gobiernon qayllaykamushasqanta. 32 Cheqaqtan niykichis: Manapunin kay tiempo runakunaqa wañunqakuchu llapa chaykuna junt’akunankama.+ 33 Cielopas kay pachapas tukukapunqan, imachus nisqaykunan ichaqa manapuni tukukunqachu.+
34 ”Qankuna kikiykichista allinta qhawarikuychis amapuni jayk’aqpas sonqoykichis sinchi mijuykunawan, sinchi ujaykunawan,+ kay kausaypi llakipakuykunawan+ afanasqa kashananpaq; chaytaq chay p’unchay qonqaylla jap’isunkichisman 35 juj trampa jina.+ Chay p’unchayqa kay pachantinpi llapa runakunamanmi chayamunqa. 36 Rijch’asqalla kashaychis+ Diosmanta tukuy tiempo rogakuspa,+ chhaynapi llapa chaykuna pasananmanta salvasqa kanaykichispaq, runaq Churinpa ñaupanpi sayanaykichispaqwan”,+ nispa.
37 Jesusqa p’unchaymi yachachiq templopi, tutataq ripuq Olivos orqopi alojakuq. 38 Tutallamantataq llapa runakuna templota jamuqku payta uyariq.