Chunka muchuchiykuna

QHAWARIY kay dibujokunata. Sapankapin rikunchis huk muchuchiyta, kaykunawanmi Jehová Diosqa ñak’arichiran Egipto suyuta. Qallariypin Aarón Nilo mayuta tawnanwan waqtashan. Chaymi mayu unuqa llapallan yawarman tukuran, challwakunapas wañuranmi, mayutaq millayta asnariran.

Chaymantan Jehová Diosqa Nilo mayumanta k’ayrakunata lloqsichiran. Lliwpin rikhuriran, hornokunapi, puñunakunapi, t’anta ruwanakunapipas. K’ayrakuna wañuqtinmi egipcio runakunaqa tawqaspa huñuranku, suyuntintaq millayta asnariran.

Chaymantan Aaronqa tawnanwan pampata waqtaran chaymi ñut’u allpa ñut’u ch’uspiman tukuran. Kaymi karan kinsa kaq muchuchiy.

Chay qhepaman muchuchiykunaqa egipciokunallatan ñak’arichiran, manan israelitakunataqa. Tawa kaq muchuchiyqa hatun ch’uspikunan karan, Egipto suyupi llapa runaq wasinmanmi haykuran. Pisqa kaq muchuchiyqa animalkunatan wañuchiran. Askhan wakanku, ovejanku, cabrankupas wañuran.

Chaymantan Moiseswan Aaronwan usphata wayraman wikch’uranku, chaymi runapas animalpas lleq-nishaq ch’upuwan onqoranku, chaymi karan soqta kaq muchuchiy.

Chaymantan Moisesqa hanaq pachaman makinta hoqariran, hinaspan Jehová Diosqa kachayamuran chikchita kunununuytawan. Manan hayk’aqpas Egipto suyupiqa chhaynata chikchiranchu.

Pusaq kaq muchuchiyqa langostakunan karan. Manan hayk’aqpas karanchu chhaynaniraq langostakunaqa. Chikchiq puchusqantan llapanta mikhusqaku.

Isqon kaq muchuchiyqa laqhayaymi karan. Kinsa p’unchaymi suyuntinpi laqhayay karan, israelitakunapaqmi ichaqa k’anchay karan.

Diosmi llaqtanta kamachiran cabraq otaq ovejaq yawarninwan punkuq k’aspinkunata ch’aqchunankupaq. Chay qhepamanmi Diospa angelnin Egipto suyuta pasaran. Wasipi yawarta rikuspan angelqa mana pitapas chay wasipi wañuchiranchu. Yawar mana kaqtinmi ichaqa wañuchiran runakunaq phiwi wawanta, animalkunaq ñawpa wachasqantapas. Kaymi karan chunka kaq muchuchiy.

Kay muchuchiy qhepamanmi Faraonqa israelitakunata kachariran ripunankupaq, paykunaqa listoñan kasharanku, chay tutataq Egipto suyumanta ripuranku.