Moisés Aaronwan Faraonpata rinku

EGIPTO suyuman kutispan Moisesqa wayqen Aaronman willaran milagrokuna rikusqanmanta. Moiseswan Aaronwan israelitakunaman milagrokunata rikuchiqtinkutaq, llapanku creeranku Jehová Diospa kachamusqanta.

Chaymantan Moiseswan Aaronwan Faraonpata riranku. Hinaspan niranku: ‘Israelpa Diosnin, Jehová Dios kayta nin: Kinsa p’unchaypaq llaqtayta kachariy, ch’inneq aqo pampapi yupaychawanankupaq,’ nispa. Faraontaq kutichiran: ‘Manan Jehová Diostaqa reqsinichu. Manataqmi Israel runakunatapas kacharisaqchu,’ nispa.

Jehová Diosta yupaychanankupaqmi israelitakunaqa llank’asqankumanta tiempota horqoyta munaranku, chaywanmi Faraonqa sinchita phiñakuran. Chay raykun astawanraq llank’achiran. Israelitakunaqa Moisestan tunparanku astawan llank’asqankumanta, chaymi Moisesqa llakikuran. Jehová Diosmi ichaqa Moisesta niran: ‘Ama llakikuychu. Ñoqan llaqtayta kacharichisaq,’ nispa.

Moiseswan Aaronwanmi hukmanta riranku Faraonpata. Kay kutipiqa milagrotan ruwaranku. Tawnanta pampaman Aarón wikch’uqtinmi hatun mach’aqwayman tukuran. Faraonpa yachayniyoq runankunapas tawnankuta pampaman wikch’uqtinku mach’aqwaykunaman tukuran. Ichaqa ¡qhawariy! Aaronpa mach’aqwayninmi mikhushan yachayniyoq runakunaq mach’aqwayninta. Chaywanpas Faraonqa manan israelitakunaq ripunanta munaranchu.

Chay raykun Jehová Dios Faraonwan reqsichikunan karan pi kasqanta. ¿Imaynatan chayta ruwaran? Chunka muchuchiykunata Egiptoman apamuspa.

Muchuchiykuna chayaqtinmi Faraonqa Moisesta waqyachispa niran: ‘Sayachiy kay muchuchiyta, hinan Israelta kacharisaq,’ nispa. Muchuchiykuna pasaqtintaq manaña kacharichiyta munaranchu. Chunka kaq muchuchiy qhepatan ichaqa niran ripunankupaq.

¿Mayqenkunan karan chunkantin muchuchiykuna? Huk kaq paginapi yachasun mayqenkuna kasqanta.