Ñaupaq kaq kinsa plagakuna

Israel runakunaqa Egiptopin esclavo kasharqanku. Chaymi Jehová Diosqa Moisesta Aarontawan kacharqan faraonman kayta nimunankupaq: “Llaqtayta kachariy ch’inneqman rinankupaq”, nispa. Faraonmi ichaqa jatunchakuspa nirqan: “Manan Israel llaqtataqa kacharisaqchu, ¿pitaq Jehová Diosri?”, nispa. Chay qhepamanmi faraonqa astawanraq Israel runakunata llank’achirqan. Chaymi Diosqa chunka plagakunata Egiptoman apachimurqan. Jehová Diosmi Moisesta nirqan: “Faraonmi tutamanta Nilo mayupi kashanqa, chaypin payta ninki: Kay mayutan yawarman tukuchisaq llaqtayta mana kacharisqaykirayku”, nispa. Chaymi Moisesqa faraonwan tupaq rirqan. Faraón rikushaqtinmi Aaronqa Nilo mayuta taunanwan waqtarqan, jinan unuqa yawarman tukurqan. Mayuqa asnariytan qallarirqan, manan ujaytapas atirqankuchu challwakunapas wañupurqankun. Chaywanpas faraonqa manan Diospa llaqtanta kachariyta munarqanchu.

Qanchis p’unchay qhepamanmi Diosqa Moisesta kamachirqan faraonman kayta nimunanpaq: “Sichus llaqtayta mana kacharinkichu chayqa Egiptomanmi k’ayrakuna junt’aykunqa”, nispa. Faraonqa manan kasukurqanchu, chaymi Aaronqa taunanta oqarirqan, jinan k’ayrakunaqa wasikunaman, puñunakunaman junt’aykurqan. ¡Tukuy ladopin kasharqan! Chaymi faraonqa Moisesta nirqan: “Jehová Diosmanta mañakuy kay plagata chinkachinanpaq, jinaspa llaqtanta kacharipusaq”, nispa. Chaymi Diosqa k’ayrakunata wañuchirqan, jinan Egipto runakunaqa montonkunapi k’ayrakunata juñurqanku. Llaqtantinmi asnarirqan, chaywanpas faraonqa manan Israel llaqtata kacharirqanchu.

Chay qhepamanmi Diosqa Moisesta nirqan: “Aarón taunanwan pampata waqtachun, jinan polvoqa ch’uspikunaman tukunqa”, nispa. Chayta ruwaqtinmi, ch’uspikuna runakunata kanirqan. Wakinmi faraonta nirqanku: “¡Kay plagaqa Diosmantan jamun!”, nispa. Chaywanpas faraonqa manan Israel llaqtata kacharirqanchu.