20 T’AQA
Cristoq wañusqan
Jesusmi kamachirqan wañupusqan p’unchayta yuyarinapaq, huk apostolninmi hap’ichirqan, k’aspipi warkuspataq wañuchirqanku
JESUSQA kinsa wata kuskanñan predicasharqan, yacharqantaqmi wañupunanpaq pisillaña kasqanta. Judío umalliqkunan wañuchiyta munarqanku, ichaqa llaqtapi runakunatan manchakurqanku Jesusta profetankuta hina qhawarisqankurayku. Chay qhepamanmi Satanás Judaspa sonqonta waqllichirqan, chaymi payqa kinsa chunka qolqepaq religionpi umalliqkunaman Jesusta venderqan.
Pascuata yuyarinanku tutan Jesús apostolninkunawan huñukurqan. Huñunakunanku wasimanta Judaspa lloqsisqan qhepamanmi, Jesús apostolninkunata kamachirqan wañupusqan p’unchayta yuyarinankupaq. Chaytan sutichakullantaq Señorpa Cenan nispa. Huk t’antata hap’ispan Diosmanta mañakurqan, chunka hukniyoq apostolninkunaman qospataq nirqan: ‘Kayqa qankunarayku qosqa cuerpoy [hinan], kaytan ruwankichis yuyariwanaykichispaq’, nispa. Vinoyoq vasota hap’ispan nillarqantaq: “Kay vinoyoq vasoqa yawarniywan cheqaqchasqa mosoq rimanakuymi”, nispa (Lucas 22:19, 20).
Chay tutan Jesús apostolninkunaman imaymanata yachachirqan. Chaypin huk mosoq kamachikuyta qorqan: tukuy sonqowan munanakunankupaq. Nirqanmi: “Ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Nillarqantaqmi pay imaymana ñak’ariypi tarikuqtin ama sinchita llakikunankupaq, chay qhepamantaq paykunapaq tukuy sonqowan Diosmanta mañakurqan. Diosta hatunchana takikunata takisqanku qhepamantaq Getsemaní huertaman rirqanku.
Chaypin Jesús qonqorikuspa tukuy sonqowan Diosmanta mañakurqan. Chayllamanmi hamurqanku soldadokuna, k’aspikunantin espadakunantin runakuna, sacerdotekunapas Jesusta presota hap’inankupaq. Judasmi Jesusman asuykuspa much’aykurqan, pay Jesús kasqanta yachaspa hap’inankupaq. Hinan soldadokuna Jesusta aparqanku apostolninkunataq ch’eqerirqanku.
Jesusqa judío juezkunaq ñawpaqenpin sut’ita nirqan Diospa Churin kasqanta. Chayta nisqanraykun juezkunaqa “Dios contran riman” nirqanku, chayta niq runakunataqa wañunankupaqmi huchachaqku. Chay qhepamanmi kamachikuq Pilatoman aparqanku. Payqa manan Jesuspi ima huchatapas tarirqanchu, ichaqa runakunaq mañakusqanta kasuspan Jesusta wañuchinankupaq kamachirqan.
Jesustaqa Gólgota patamanmi aparqanku chaypin Roma soldadokuna k’aspipi warkurqanku. Chawpi p’unchay kashaqtinmi qonqaylla tutayarqan, hinan Jesús wañupuqtin hallp’a sinchita chhaphchikurqan. Jesuspa cuerpontan qaqa t’oqopi p’amparqanku, paqaristintaq sacerdotekuna t’oqota wisq’achirqanku, chaypin soldadokunata saqerqanku cuidanankupaq. ¿Chaypichu wiñaypaq p’ampasqa kanan karqan? Manan, aswanmi hatun milagro rikukunan karqan.
a Jesuspa sacrificakusqanmanta astawan yachanaykipaq qhawariy ¿Imatapunin Biblia yachachin? nisqa librota, 5 capitulopi.