ASTAWAN YACHANAPAQ C
¿Imaynatan Kusisqa kausay librowan yachachisunman?
Kusisqa kausay librota ruwamunankupaqqa tukuy sonqonkuwanmi Diosmanta mañakurqanku, chaymantapas allinta yuyaykuspan chaypi yachachikuykunataqa churamurqanku. Chhaynaqa, chay librowan yachachishaspa allinta yanapachikunaykipaqqa kaykunatan ruwawaq.
Manaraq yachachishaspa
1. Ñaupaqmantañan allinta estudianayki. Yachachisqayki runa imakunapin yanapanata necesitashan, imaynapin tarikushan, imakunapin creen chaykunapin piensanayki. Yaqapaschá imatapas mana entiendeshanchu otaq ima yachasqantapas mana ruwayman churayta atishanchu. “Astawan yachanaykipaq” nisqa partepi kaq qelqakunata videokunatapas tˈaqwiriy, jinaspa yuyaykuy imaynatas yanapanman yachachisqayki runata chaypi. Chayta ruwanki chayqa, atinkin yachachishaspayki chaywan yanapachikuyta.
Yachachishaspa
2. Yachachisqayki runa mañakuspa qallarinaykichista munan chayqa mañakuwaqchismi, tukunaykichispaqpas mañakullawaqchistaqmi.
3. Ama nishuta rimaychu. Imamantachus chay yachachikuypi rimashan chayllamanta rimay, dejallay yachachisqayki runaq rimanantapas.
4. Juj mosoq tˈaqata qallarinaykipaqqa “¿Imamantan willashan?” nisqa parteta leey, leellaytaq chay tˈaqapi kaq wakin yachachikuykunaq titulontapas.
5. Juj tˈaqata tukuspaqa “Yuyarisun” nisqa parteta tˈaqwiriychis, chhaynapi yachachisqayki runa imachus yachasqanta yuyarinanpaq.
6. Sapanka yachachikuypi kaykunata ruway:
Ñaupaq kaq partepi leenapaq kaq parrafokunata kuska leeychis.
“Leeychis” nispa rijuriq textokunata llapanta leeychis.
Chay yachachikuypi rijuriq wakin textokunatapas leellawaqchistaqmi.
Atikuqtinqa qhawanapaq videokunata llapanta qhawaychis.
Chay yachachikuypi rijuriq llapan tapuykunata ruway.
“Astawan yachasunchis” nisqa partepi rijuriq llapan fotokunata dibujokunata qhawaychis, jinaspa chaymanta rimaychis.
“Kayta ruway” nisqa parteta tˈaqwiriychis, chhaynapin reparakunqa imachus ruway munasqanta atishanchus ruwayta icha manachus chayta. Kallpachay chaypi rijuriqta ruwayman churananpaq otaq jujta ruwananpaqpas.
“Astawan yachanaykipaq” nisqa parteta estudiashaqtin mayqen qelqachus otaq mayqen videochus gustarqan chayta tapuy.
Kallpachakuy juj yachachikuyta tukunaykichiskama estudianaykichispaq.
Yachachisqayki qhepaman
7. Piensashallay yachachisqayki runapi. Jehová Diosmanta mañakuy iñiyninpi wiñarinanpaq, qanmanpas yachayta qonasuykipaq, chhaynapi allinta yanapanaykipaq.