Kay revista leeqkunaq tapukuynin

¿Hayk’atan donacionta churanay?

“Diosqa kusisqa qoqtan munakun”, ninmi Biblia (2 Corintios 9:7). Dios sonqo runakunaqa yachankun chay textoq nisqanta, wakin religionkunapi runakunan ichaqa tanqasqa hina kanku askha qolqeta churanankupaq. Arí, wakin religionkunapiqa diezmotan mañanku otaq sapa pachak sol ganasqankumanta chunka solta qonanku.

¿Willanchu Biblia hayk’a qolqe churanatapas? Yaqapaschá qanpas tapukushanki: “¿Hayk’a qolqetan churanay?” nispa.

Kamachikuyman hina qosqanku, tukuy sonqomanta qosqankupiwan

Bibliaqa sut’itan willan ñawpa tiempopi hayk’a churanankutapas israelitakunaman Diospa kamachisqanta (Levítico 27:30-32; Números 18:21, 24; Deuteronomio 12:4-7, 11, 17, 18; 14:22-27). Chay kamachikuykunaqa hunt’anankupaq hinallan karan. Diosmi paykunata prometeran: kamachikusqayta hunt’ankichis chayqa ‘anchatapunin allinyachisqaykichis’, nispa (Deuteronomio 28:1, 2, 11, 12).

Huk kutikunapipas israelitakunaqa tukuy sonqowanmi atisqankuman hina qoqku. Huk kutinmi rey David yupaychana wasita hatarichinanpaq donacionta mañaran, hinan israelitakuna qosqaku “pisqa waranqa talentota [171.000 kilota pesaq qorita]” (1 Crónicas 29:7, NM).a Chayta tupachisun Jesuspa tiemponpi ‘huk wakcha viuda [...] [qolqe churana cajaman] iskay qolqechata churaykusqanwan’. ¿Hayk’an valeran chay qolqe churasqan? Huk runaq jornalninman chay qolqe aypananpaqqa soqta chunka tawayoq kutitawanmi churanan karan. Chaywanpas Jesusmi willaran chay pisichallatapas qosqan Jehová Diospaq ancha valorniyoq kasqanta (Lucas 21:1-4).

¿Kamachisqachu kashanchis hayk’a qolqeta churanapaqpas?

Cristianokunaqa manan Israel llaqtawan rimanakusqanku kamachikuypiñachu kanku chayraykun mana diezmota churankuñachu. Chaywanpas cheqaq cristianokunaqa kusikunkun atisqankuman hina sonqomanta donacionninkuta qospa. Jesuspunin niran: “Aswan kusisamiyoqqa qoqmi chaskiqmantaqa”, nispa (Hechos 20:35).

Jehová Diospa testigonkunaqa tukuy sonqomanta churasqanku qolqewanmi yanapanku teqsimuyuntinpi predicación aparikunanpaq. Chay donacionkuna churasqankuwanmi ruwakullantaq kay hina qelqakunata, yupaychana wasikunatapas. Manan pipas sueldota chaskinchu. Wakin Testigokunan tukuy tiemponkuwan Diospaq llank’asqankurayku gastonkupaq yanapayta chaskinku, ichaqa manan sueldotaqa chaskinkuchu. Wakin Testigokunapas manan ima qolqetapas chaskinkuchu predicanankurayku tukuy gastonkuna ruwasqankumanta. Aswanmi ima gastokuna ruwanankupaqpas sapankanku llank’anku, imaynan apóstol Pablopas gastonpaq karpakunata ruwaspa llank’aran hinata (2 Corintios 11:9; 1 Tesalonicenses 2:9).

¿Hayk’a qolqetan churanman Jehová Diospa testigonkunaq llank’ay aparisqankuta yanapakuy munaqkuna? Pablo niran: “Sapanka imaynatachus sonqonpi yuyaykusqanman hina qochun, ama llakisqachu, amataq kamachisqa hinapaschu. Diosqa kusisqa qoqtan munakun”, nispa (2 Corintios 8:12; 9:7).

[Uranpi willakuy]