¿Imakunatan ruwanqa Diospa gobiernon?

Ñawpaq paginakunapi yachasqanchis hina, Jehová Diospa testigonkunapaqqa ancha importanten Diospa gobiernonqa. Ichaqa chay sumaq kawsaymanta yachaspa yaqapaschá nishanki: “Manachus hina chayqa cheqaqchu kanman”, nispa.

Ima yachachikuytapas creenapaqqa ñawpaqtan allinta t’aqwirinanchis cheqaqchu icha manachus chayta (Proverbios 14:15). Chaytan apostolkunaq tiemponpi Berea llaqtamanta runakuna ruwarqanku.a Paykunaqa Diospa gobiernonmanta uyarispa hinan “chaykunaqa hinapunichus kasqanta” Bibliapi sapa p’unchay t’aqwirqanku (Hechos 17:11). Arí, uyarisqankutan Bibliawan tupachirqanku, chayraqmi creerqanku uyarisqanku cheqaqpuni kasqanta.

Qanpas Berea llaqtamanta runakuna hina ruway. Jehová Diospa testigonkunan gratislla Bibliamanta yachachiyku. Chay estudion yanapasunkiman Diospa gobiernonmanta uyarisqaykita Bibliaq yachachisqanwan tupachinaykipaq.

Bibliamanta estudiota chaskikuspaqa, manan Diospa gobiernollanmantachu yachanki. Chaypiqa kaykunamantawanmi yachanki:

• ¿Imaynapin paqarimurqanchis?

• ¿Imapaqmi kawsashanchis?

• ¿Imaraykun Dios hinallata qhawan ñak’arisqanchista?

• ¿Iman suceden wañupuqtinchis?

• ¿Thunisqachu kanqa kay pacha?

• ¿Imaynapin familianchis kusisqa kanman?

Bibliata estudiasqaykin yanapasunki Diosman asuykunaykipaq (Santiago 4:8). Chay hinapin Diospa gobiernonpi astawan confianki. Jesusmi nirqan: “Chay wiñay kawsayqa kaymi: Qan sapallayki cheqaq Diosta, kachamuwasqayki ñoqa Jesucristotawan reqsiyninku”, nispa (Juan 17:3, Edición 1988).