¿Imaraykun Jesús yachachirqan Diospa gobiernonmanta?

Ñawpaq paginapi yachasqanchis hina, Jesusqa tukuy tiemponwanmi “Diospa qhapaqsuyunmanta allin willakuykunata” willarqan (Lucas 8:1). Israel llaqtapi llapa runakunaman predicananraykun llaqta-llaqtanta purirqan. Askha kutitan Diospa gobiernonmanta rimarqan, chaymi predicasqanmanta willaq tawantin evangelio qelqakunapi 100 kuti masraq gobierno simi rikhurishan. Ichaqa maytaraqchá Jesusqa chay gobiernomanta rimarqan (Juan 21:25).

¿Imaraykun Jesuspaq Diospa gobiernonmanta willay ancha importante karqan? Jesusqa yachanmia chay gobierno Taytanpaq qatikuqninkunapaqwan allinkuna ruwananta. Hinaspapas Jehová Dios kikinmi Jesusta akllarqan chay gobiernopi rey kananpaq (Isaías 9:6; Lucas 22:28-30). Ichaqa manan atiyniyoq nitaq hatunchasqa kananraykuchu predicarqan (Mateo 11:29; Marcos 10:17, 18).

¿IMATAN DIOSPA GOBIERNON RUWANQA JESUSPA TAYTANRAYKU?

Jesusqa anchatan Taytanta munakun (Proverbios 8:30; Juan 14:31). Yachanmi munakuq, khuyapayakuq, chanin Dios kasqanta (Deuteronomio 32:4; Isaías 49:15; 1 Juan 4:8). Huk runakunan ichaqa Diosmanta mana allinta rimanku, ninkun: “Manan Diosmanqa imapas qokunchu runakunaq ñak’arisqan”, otaq “Diosmi huchayoq runakunaq ñak’arisqanmanta”, nispa. Diospa gobiernonmi chay llulla yachachikuykunamanta Diospa sutinta ch’uyanchanqa. Chaymi Jesusqa “Diospa qhapaqsuyunmanta allin willakuykunata” willarqan (Mateo 4:23; 6:9, 10). ¿Imaynatan chay gobierno sutinta ch’uyanchanqa?

Runakunapaq allinkunata ruwaspan. Arí, runakunata waqachiq ñak’ariykunatan Diospa gobiernon chinkachinqa, chay hinapin runakunaq “ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu” (Apocalipsis 21:3, 4). Manañan kay pachapi pipas ñak’arinqachu.b

Arí, Diospa gobiernonmi sut’inchanqa Jehová Dios khuyapayakuq tukuy atiyniyoq kasqanta, chayraykun Jesusqa chay gobiernomanta willarqan (Santiago 5:11). Hinaspapas Diospa gobiernonqa Jesuspa qatikuqninkunaraykun allinkunata ruwanqa.

¿IMATAN DIOSPA GOBIERNON RUWANQA JESUSPA QATIKUQNINKUNARAYKU?

Jesusqa manaraq kay pachaman hamushaspan Taytanwan kuska unaypuni hanaq pachapi tiyarqan. Chaypin payqa Taytanta yanaparqan hanaq pachapi kay pachapipas tukuy imaymana kamayta (Colosenses 1:15, 16). Ichaqa runakunawanmi Jesusqa astawan kusikurqan (Proverbios 8:31).

Runakunata munakusqanraykun Jesusqa Diospa gobiernonmanta willallarqantaq. Payqa predicayta qallarishaspan willarqan ‘allin willakuykunata willananpaq’ hamusqanta (Lucas 4:18). Ichaqa manan willayllachu willarqan aswanmi necesitaq runakunata yanaparqan. Huk kutinmi askha runakuna paypa ñawpaqenman huñukamurqan hinan ‘paykunata khuyapayarqan onqosqa runakunatataq qhaliyachirqan’ (Mateo 14:14). Chaymantapas huk kutipin sinchi millay onqoyniyoq runa nirqan: “Señor, munanki chayqa atinkin qhaliyachiwayta”, nispa. Hinan chay runata khuyapayaspa nirqan: “Munanin, qhali kapuy”, nispa (Lucas 5:12, 13). Chaymantapas amigon Lázaro wañupusqanmanta Mariaq waqasqanta rikuspan Jesuspa ‘sonqon “ch’allaq” nirqan, hinaspan sinchita llakikuspa’ “waqarqan” (Juan 11:32-36). Lazaroqa tawa p’unchayñan wañupusqa, ichaqa milagrota ruwaspan kawsarichirqan (Juan 11:38-44).

Chaywanpas Jesusqa manan milagrota ruwaypichu afanakurqan. Payqa yacharqanmi qhaliyachisqan runakuna qhepaman onqopunankuta, kawsarichisqan runakunapas wañupunankuta. Ichaqa yacharqanmi Diospa gobiernon runakunapaq aswan allinkuna ruwananta, chaykuna pasaqpaq kanantapas. Chaymi payqa “qhapaqsuyunmanta allin willakuykunata” astawanqa runakunaman yachachirqan (Mateo 9:35). Chay milagrokuna ruwasqanmi sut’ita rikuchirqan Diospa gobiernon llapa runakunapaq allinkuna ruwananta. ¿Imakunatan ruwanqa? Biblian yanapawasun chaykunamanta yachanapaq.

• 

  Manan pipas onqonqañachu.

  ‘Ñawsakunan qhawarinqa, roqt’ukunan uyarinqa. Wist’ukunapas taruka hinaraqmi p’itanqa, upakunapas kusikuymantan takinqa’. ‘Manataqmi mayqellanpas: “Onqosqan kani”, ninqachu’ (Isaías 33:24; 35:5, 6).

• 

  Manan pipas wañupunqañachu.

  “Chanin runakunaqa kay hallp’atan hap’ikapunqaku, chaypin wiñaypaq tiyanqaku” (Salmo 37:29).

  “Diosqa wiñaypaqmi wañuytapas chinkachinqa, llapaq ñawinmantan waqaytapas ch’akichinqa” (Isaías 25:8).

• Wañupuqkunan kawsarimpunqaku.

  “Aya p’ampanakunapi lliw kaqkunaq Runaq Churinpa kunkanta uyarinanku tiempon chayamunqa. Hinan [...] kawsarimpunqaku” (Juan 5:28, 29).

  ‘Wañusqakunatan Dios kawsarichimpunqa’ (Hechos 24:15).

• 

  Llapa runakunan wasiyoq llank’anayoq kanqaku.

  “Wasitan wasichanqaku, hinaspan chaykunapi tiyanqaku, uvastan plantanqaku, chaypa rurusqantan mikhunqaku. Manan wakpa tiyananpaqchu wasichanqaku, manan wakpa mikhunanpaqchu mallkinqaku [...], akllakusqaykunaqa llank’asqankuq rurusqantan kusisqa mikhunqaku” (Isaías 65:21, 22).

• 

  Manan guerrakuna kanqachu.

  “Paymi teqsimuyuntinpi awqa-tinkuykunata [otaq guerrakunata] qolluchin” (Salmo 46:9).

  “Manan mayqen suyupas huk suyuwan maqanakunqañachu” (Isaías 2:4).

• 

  Mikhuypas askhan kanqa.

  “Chakrakunaqa rurunqan, ¡Diosninchisqa saminchawasunmi!” (Salmo 67:6).

  “Suyupi askhallaña trigo [otaq mikhuy] kachun, orqo patakunapi askhallaña aytikuchun” (Salmo 72:16).

• Manan wakchayay kanqachu.

  “Wakchakunaqa manan wiñaypaqchu qonqasqa kanqa” (Salmo 9:18).

  “Reymi waqyakuqtin wakchata qespichin, mana pi yanapaykuqniyoq muchuqtan amachan. Mana piniyoqtawan wakchatawanmi khuyapayan, wakchakunaq kawsaynintan qespichin” (Salmo 72:12, 13).

Jesusqa yacharqanmi tukuy chaykunata Diospa gobiernon apamunanta. Chaymi llapa uyarikuy munaqkunaman chay gobiernomanta willarqan.

¡May munaymi kanqa chay kawsayqa! ¿Manachu chay gobiernomanta astawan yachayta munawaq? ¿Imatan ruwanayki chay bendicionkunata chaskikunaykipaq? Qatimuq paginapin chaymanta astawan yachanki.