“¿Maypitaq Diosri kasharan?”
“MAYNINPIQA JUJMANTAN TAPUKUNCHIS: ¿MAYPITAQ DIOSRI KASHARAN? NISPA” (Papa Benedicto XVI visitaran Auschwitz [Polonia] llaqtapi sasa llank’ana campota.)
¿QANPAS CHHAYNATA TAPUKURANKICHU IMA DESGRACIATAPAS RIKUSPA? JAYK’AQLLAPAS NISHU LLAKIKUYPI TARIKUSPA, ¿NIRANKICHU “DIOSMANQA MANAN IMAPAS QOKUNCHU LLAKIKUYNIYQA” NISPA?
Sheilaqa Estados Unidospin tiyan, payqa religionniyoq familiapin wiñaran, paymi nin: “Juch’uyniymantapachan kamawaqninchis Diospiqa creerani, ichaqa manan jayk’aqpas ladoypipas kashanman jinataqa sienteqchu kani. Yacharanin rikuwasqantaqa, ichaqa manan piensaqchu kani ñoqatapuni qhawawanantaqa nitaqmi cheqniwananpaqpas”, nispa. ¿Imaraykun chhaynata piensaran? Paymi nillantaq: “Familiayqa imaymana desgraciakunapin tarikuran, chaypiqa Diosqa manapas yanapawankumanchu jinan karan”, nispa.
Yaqapaschá Sheila jina Diospi creenki, chhaynaña kaqtinpas tapukunkichá “¿Dios noqata qhawarimuwanmanchu?” nispa. Jobpas chhaynapin tarikuran, payqa confiaqmi Diosqa jatun atiyniyoq yachayniyoq kasqanpi (Job 2:3; 9:4). Jobqa imaymana desgraciapin tarikuran, chaypin lliu suyakuyninpas chinkapuran chaymi Diosta tapuran: “¿Imanaqtinmi mana qhawariwankichu? ¿Imanaqtinmi auqaykita jina rikuwanki?”, nispa (Job 13:24).
Ichaqa, ¿ima ninmi Biblia? ¿Dioschu juchayoq tukuy ñak’ariykuna kananpaq? ¿Interesakunmanchu llapa runakunapi, sapanka jujninchispipas? ¿Imaynatan yachasunman Dios sapankanchista reqsiwasqanchista, problemanchiskuna kaqtinpas entiendewasqanchista?
Qatimuq temakunapin yachasun, imaynatan kamasqankuna Bibliapas yachachiwanchis Dios munakuwasqanchista (Romanos 1:20). Chhaynapin astawanraq Kamaqniykita reqsinki, astawan reqsispaqa seguron kanki Dios munakusqasuykimanta (1 Juan 2:3; 1 Pedro 5:7).