Desgraciakuna pasaqtin

“Sinchi unu t’uruntin jaykumusqanwanmi lliu kaqniykuta chinkachipurayku, chaymi sinchi llakikuypi tarikurayku” (Sierra Leona llaqtamanta Andres).

“Jatun wayraq pasasqan pasayta wasiykuman kutipuqtiykuqa manan imaykupas kapuranchu. Sinchi llakisqan kasharayku. Ususiyqa qonqoriykukuspan waqayta qallariran” (Islas Vírgenes nisqamanta David).

¿JAYK’AQLLAPAS chhaynapi tarikurankichu? Chhaynapi tarikuranki chayqa entiendenkichá imaynas sientekunku chayta: sinchi llakisqan sientekunku, manan imatapas ruwayta atinkuchu, wakinkunaqa locomanraqmi tukuytapas munanku. Chhaynapi tarikuqkunaqa manañan kausaytapas munankuñachu.

Desgraciaq kasqanwan tukuy imaykitapas chinkachispaqa sinchi llakisqa mana kallpayoqchá sientekunki. Yaqapaschá piensanki: “Imapaqñan kausayman”, nispa. Biblian ichaqa willawanchis jamuq tiempopi sumaq kausay kananmanta.

BIBLIAQ NISQANTA YACHAYQA YANAPAWANCHISMI KAUSASHANALLANCHISPAQ

Eclesiastés 7:8 texton nin: “Aswan allinmi imakunaqpas tukukuynin qallariyninmantaqa”, nispa. Sichus desgraciapi tarikuranki chayqa yaqapaschá piensanki “jina imapas kapuchun, amaña imatapas ruwasaqñachu” nispa. Ichaqa imapas mejorallanqan sichus kallpachakunki chayqa, pacienciakunki ima chayqa.

Biblian willawanchis: “Manañan [...] waqaypas llakipakuypas uyarikunqachu”, nispa (Isaías 65:19). Bibliaq chay nisqanqa Diospa gobiernon kamachikamuspa kay allpata paraisoman tukuchiqtinmi junt’akunqa (Salmos 37:11, 29). Manañan jayk’aqpas desgraciakunaqa pasanqañachu. Tukuy llakikuykunaqa chinkapunqan. Tukuy atiyniyoq Diosmi prometewanchis: “Ñaupaq sucedesqankunaqa qonqasqan kapunqa, manañan yuyarisqapasñachu kanqa”, nispa (Isaías 65:17).

Kamaqninchisqa tukuytan ruwaran, chaymi nin: “Suyasqaykichis kausaytan ima sumaqta qhepaman qosqaykichis”, nispa. Diosqa gobiernonpi allinta kausananchistan munan (Jeremías 29:11). ¿Kallpachasunkichu chay simikuna kausashanallaykipaq? Ñaupaq articulopi rimamusqanchis Sally nin: “Jamuq tiempopi Diospa gobiernon kamachikamunanta yachayqa yanapawanchismi tukuy imapi tarikusqanchista qonqananchispaq, jinaspa kausashanallanchispaq”, nispa.

¿Imatawanmi Diospa gobiernon ruwanqa? Chaymanta yachashallasun. Diospa gobiernon imatawan ruwananta yachaymi yanapawasun imaña pasaqtinpas kausashanallanchispaq, pisi tiempollamantan tukukapunqa desgraciakunaqa.

Bibliapi textokunan yanapasunkiman

Allintan puñunanchis

“Aswan allinmi pisi kaqllawan kusisqa kausay askha kaqniyoq kaspa llakipakushaymantaqa” (Eclesiastés 4:6).

Estudiosokunaq tarisqanman jinaqa, sinchi llakikuypi tarikuqkunaqa “allintas puñunanku pisita puñuqtinkuqa astawansi llakikuyninkuqa yapanman”. Allintapunis tutaqa puñuna.

Imayna sientekusqaykita willakuy

“Llakipakuyqa runatan ñit’iykun, sumaq simin ichaqa kusichin” (Proverbios 12:25).

Familiaykimanta mayqenmanpas willakuy otaq confiasqayki amigoykiman willakuwaq. Paykunaqa uyarisunkikun jinaspan yanapasunkiku.a

Diospa promesanpi piensay

“[Diospa] prometesqanman jinan mosoq cielo, mosoq pacha ima kanqa, chaypiqa chanin kausayllan kanqa; chaytan noqanchisqa suyakushananchis” (2 Pedro 3:13).

a Sichus pipas estrés onqoywan unaytaña kashan otaq llakiwan ñit’ichikushan chayqa doctormanmi rinan.