Cheqaq yachayta maskhasun

Waranqa-waranqa watakunan chay tapukuypa kutichiynintaqa mana yacharankuchu, chayraykun onqoyqa millonninpi runakunata wañuchiran. Tiempowanñan allinta estudiaq runakuna tariranku imata ruwana kasqanta. Chaypin tariranku mana rikuna juch’uy kuruchakunaq kasqanwan onqoyqa rijurisqanta. Chay tarisqankuraykun jampikuyta atiranku, chhaynapin waranqa-waranqa millón-millón runakuna unayta kausaranku.

¿Imanisunmanmi juj tapukuykunaq kasqanmanta? ¿Kay tapuykunamanta yachay yanapasunkimanchu vidaykita cambiayta?

• ¿Pitaq Diosri?

• ¿Pitaq Jesucristori?

• ¿Imataq Diospa gobiernon?

• ¿Imaynan jamuq tiempopi kausay kanqa?

Millonninpi runakunañan chay tapuykunaq kutichiynintaqa yachankuña, chaymi kusisqa kausashanku. Chay tapukuykunamanta yachayqa qantapas yanapasunkimanmi.

¿KANMANCHU CHEQAQ YACHACHIKUY?

Yaqapaschá tapukunki: “¿Kanmanchu cheqaq yachachikuy?”, nispa. Kay tiempopiqa astawan-astawanmi llullakuyllaña kashan. ¿Imaraykun chay pasashan?

Runakunaqa manañan confiankuñachu gobiernokunapi, empresakunapi otaq noticiakunaq lloqsimusqanpipas. Runakunaqa iskayankun: “Nisqanku cheqaqchu kanman, icha yanqallachu q’otuwashanchispas”, nispa. Kay tiempopi runakunaqa manan iskayallankuchu, aswanpas yachaytan munanku imaynapuni imapas kasqanmanta.

Chhaynaña kaqtinpas tariwaqmi tapukuyniykikunaq kutichiynintaqa. ¿Imaynata? Imaynan juj tapukuyniykikunaq kutichiynintapas tarinki jinatan.

¿IMAYNATAN CHEQAQ YACHACHIKUYTA TARISUNMAN?

Sapa p’unchaymi cheqaq yachachikuytaqa maskhanchis. Jessicamanta rimasunchis, payqa allintan yachanan mijuykunapi ama maní nisqa kananta. Paymi nin: “Ususiyqa manan chhikallantapas manitaqa mijunmanchu, pisillatapas mijujtinqa wañupunmanmi. Chayraykun manaraq rantishaspayqa allinta letrankunata leeni, chhaynapi mana chhikallanpas maní kasqanta yachanaypaq. Chaymantapas mijuykunata ruwaq empresatan wajani, manapuni chhikallanpas mijunapi maní kasqanta yachanaypaq. Chaymantapas jujkunatan tapukuni chay empresa confianapaq jinachus icha manachus chayta yachanaypaq”, nispa.

Yaqapaschá qanqa mana chhaynatapunichu sapa p’unchay allin yachachikuykunataqa maskhanayki, ichaqa yaqapaschá Jessica jina juj tapuykunaq kutichiyninta maskhawaq:

• Allinta tapukuwaq.

• Allinta estudiawaq.

• Maymantan jamun imamanta yachay munasqaykipas chaykunatawan.

Chaykunan yanapasunkiman vidaykipi tapukuyniykikunaq kutichiyninta tariyta. Chaymanta astawan yachasunchis.

JUJ LIBROLLAN CHEQAQTAQA YACHACHIN

Jessicaqa allintan estudianan karan mijuykuna mana maniyniyoq kasqanta yachananpaq, chhaynallatataqmi juj tapuykunamanta yachanaykipaqpas ruwawaq. Paymi nin: “Allinta Bibliata estudiasqaymi yanapawan cheqaq kaqta yachanaypaq”, nispa. Millonninpi runakunapas Jessica jinan Bibliamanta yachanankupaqqa kay tapuykunata tapukuranku:

• ¿Imatan Dios munan runakunapaq?

• ¿Iman pasawanchis wañuqtinchis?

• ¿Imaraykun runakuna sufrinku?

• ¿Imatan Jehová Dios ruwashan ñak’ariykunata tukuchinanpaq?

• ¿Imaynapin familiakuna kusisqa kausankuman?

Qanpas Bibliata leespan tariwaq kay tapuykunaq kutichiyninta, juj tapuykunaq kutichiynintapas, chaymantapas maskhawaqmi internetpi www.jw.org nisqapi.