Tukuy sonqowanmi predicashanallanchis
1 Jehová Diospa testigonkunaqa 1992 watamantapacha sapa wata waranqa millón horata teqsimuyuntinpi predicashanchis, runakunatapas yachachishanchis. ¡Anchatan kusikunchis sapankanchis chhayna sumaq llank’aypi yanapakusqanchismanta! (Mat. 28:19, 20.)
2 Chayqa Jehová Diospa yanapayninwanmi ruwakun, paytan anchata agradecikunchis kay ‘sasa tiempokunapi’ predicananchispaq yanapawasqanchismanta (2 Tim. 3:1). Ichaqa ¿iman yanapawasun tukuy sonqowan chay sumaq llank’aypi yanapakushanallanchispaq?
3 Munakuy: Diosta runamasinchista munakuymi Diosman qokusqanchista hunt’ayta munasqanchispiwanmi kallpachawasun Reinomanta predicashanallanchispaq (Mat. 22:37-39; 1 Juan 5:3). Ima sasachakuypiña tarikusun chaypas munakuymi kallpachawasun predicashanallanchispaq (Luc. 9:23).
4 Imaynata atisunman: Awqanchis otaq enemigonchis Saqraqa imaymanatan ruwashan tukuy sonqowan predicasqanchista pisiyachinanpaq. Payqa kaykunawanmi pisipananchista munan: runakunaq mana uyarikusqankuwan, kay pachapi afanakuykunawan, sapa p’unchay kawsasqanchispi llakikuykunawan, onqosqanchismanta llakikuykunawanpas.
5 Chaymi anchata kallpachakunanchis tukuy sonqowan predicashanallapaq. Qallariypi ‘munakuyninchistaqa’ manan pisiyachinanchischu, chaypaqqa sapa kutilla Diospa Simin Qelqata leespa yuyaymanananchis, ‘allin yuyayniyoq hunt’aq kamachiq’ imaymana qowasqanchistapas chaskikunanchis iñiyninchista kallpachananchispaq (Apo. 2:4; Mat. 24:45; Sal. 119:97).
6 Bibliapi profeciakunaq willasqan hina, Jehová Diospa p’unchayninqa usqhaylla hamushan millay runakunata tukuchinanpaq (2 Ped. 2:3; 3:10). Chaymi kallpachakushanallanchis tukuy sonqowan predicananchispaq runakunata yachachinanchispaqpas.