¿Yanapakuwaqchu Macedoniapi?

1. ¿Imaraykun Pablo puriqmasinkunawan Macedoniaman rirqanku?

¹ 49 wata Jesús hamusqan qhepamanmi, apóstol Pablon iskay kaq viajasqanpi Antioquía de Siria nisqamanta viajarqan Éfeso llaqtaman watukuq, Asia Menor nisqa llaqtakunamanpas. Ichaqa huk rikhuriypin Diospa santo espiritun ‘Macedoniaman [...] yanapakuq’ rinanpaq kamachirqan. Hinan Pablopas puriqmasinkunapas tukuy sonqowan kasukurqanku, chaymi chay llaqtapi huk iñiq t’aqata qallarichirqan (Hech. 16:9, 10; 17:1, 2, 4). Kay tiempopipas teqsimuyuntinpi wakin cheqaskunapi necesitakushan askha llank’aqkunata espiritual cosechapi yanapakunankupaq (Mat. 9:37, 38). ¿Riwaqchu chay cheqaskunaman yanapakuq?

2. ¿Imaraykun wakin mana atinkuchu huk nacionkunaman astakuyta?

² Yaqapaschá qanpas apóstol Pablo hina misionero kayta munashanki, ichaqa mana hayk’aqpas yuyaykurqankichu huk nacionkunaman astakuyta. Manapaschá Escuela de Galaad nisqaman riyta atinkichu watayki mana chayman rinaykipaq hinachu kaqtin, solterallaraq kashanki otaq wawaykikunataraq uywashanki. Yaqapaschá mana yuyaykurqankichu huk nacionman astakuyta sasa rimayniyoq kasqanrayku otaq pisi qolqeyoq kasqaykirayku huk nacionman astakurqanki kunantaq sasachakushanki kutimpuyta. Ichaqa Diosmanta mañakuspa allinta yuyaymanaspapas yaqapaschá maypis necesitakusqanman yanapakuq riwaq.

3. ¿Misionerokunapaq escuelamanraqchu rinanchis huk nacionkunapi predicanapaq?

³ ¿Misionerokunapaq escuelamanraqchu rina? Manan. Pablopas puriqmasinkunapas Jehová Diospi santo espiritunpi hap’ipakusqanku yanaparqan runakunata cristianoman tukupunankupaq (2 Cor. 3:1-5). Manaña misionerokunapaq escuelaman riyta atiwaqchu chaypas, huk llaqtakunapi predicasqaykiqa ancha allinmi kanqa. Chaymantapas Bibliamanta allin Yachachiq Kanapaq Escuela, Predicayta Yachanapaq Huñunakuypas allintan yanapasunki. Sichus huk nacionman astakuspa misionero hina llank’anki chayqa, anchatan yanapasunki Escuela de Galaad otaq huk escuelakunamanpas riqtiyki.

4. ¿Yanapakunkumanchu kuraq iñiqmasinchiskuna huk nacionkunapi?

⁴ Kuraq predicaqkuna. Kuraq iñiqmasinchiskuna, iñiyninkupi allin poqosqakuna, qhali iñiqkuna allintan yanapakunkuman may nacionpichus predicaqkuna necesitakusqanpi. ¿Jubilasqañachu kanki? Wakin iñiqmasinchiskunaqa llank’asqankumanta pisillataña chaskinku chaypas, allintan yanapakushanku huk nacionkunapi yaqapaschá chay llaqtapi lliwpas pisi qolqepaq kan imapas.

5. Huk nacionman astakuq iñiqmasimanta willay.

⁵ Huk iñiqmasinchismi inglés rimay nacionpi tiyarqan, payqa iñiq t’aqapi umalli precursortaq kanpas. Chaymi jubilasqa kasqanrayku huk nacionman astakurqan inglés rimaymanta huch’uy t’aqapi yanapakunanpaq. Chay t’aqapin isqon predicaqkunallan karqan ichaqa 30.000 inglés rimaq runakunatan predicananku karqan. Iskay watallapin huñunakuyman riqkuna 50 hina yapakurqan. Chay iñiqmasinchismi nin. “Chay nacionman predicanaypaq astakusqayqa askha bendicionkunatan chaskirqani, manan tiempo aypawanmanchu llapanmanta willanaypaq”, nispa.

6. ¿Ima allinkunan karqan huk sipas iñiqmasinchis huk nacionman yanapakuq riqtin?

⁶ Soltera iñiqmasinchiskuna. Jehová Diosqa askha warmi iñiqmasinchiskunawanmi allin willakuykunata willachirqan predicaqkunaq necesitakusqan cheqaskunapi (Sal. 68:11). Huk sipas iñiqmasinchismi huk nacionman yanapakuq rinanpaq tanteakurqan chhaynapi astawan predicananpaq. Tayta-mamanmi ichaqa llakikurqan imapas ususinta pasananmanta chaymi, payqa taqyasqa nacionta akllarqan, chay qhepamantaq Betelman qelqarqan hinan sut’ita willarqanku chay nacionmanta. Soqta watan chay nacionpi tiyarqan hinan askha bendicionkunata chaskirqan. Paymi willan: “Tiyasqay nacionpiqa pisi estudiokunallatan tariyman karqan. Huk nacionman risqaypin ichaqa askha estudiokunata tarirqani, chaymi aswan allin yachachiq kapurqani”, nispa.

7. Huk nacionman astakuq familiamanta willay.

⁷ Familiakuna. Wawakunayoq kaspapas atiwaqmi astakuyta predicaqkunaq necesitakusqan nacionman. Iskay wawakunayoq iñiqmasinchismi chayta ruwarqan, huknin wawanmi 8 watayoq karqan huknintaq 10 watayoq. Chay maman willakun: “Maytan kusikuyku wawaykuna kaypi tiyasqankumanta, chaymi yanaparqan precursor especialkunawan misionerokunawan amigota ruwanankupaq. Arí, necesitakusqan nacionpi predicayqa anchatan kawsayniykupi yanapawanku”, nispa.

8. ¿Huk rimaytaraqchu yachana huk nacionpi yanapakunapaq? ¿Imaraykun chay hinata kutichinki?

⁸ Huk rimaykuna. ¿Pisipaqchu qhawarikunki huk rimay sasa yachanapaq kaqtin? Yaqapaschá rimasqayki simipas rimakullantaq predicaqkuna necesitakusqan nacionpi. Inglés rimaq casarasqa iñiqmasinchiskunan español rimaq nacionman astakurqanku chaypin askha inglés rimaq runakuna kasqaku. Beteltaq willarqan, mayqen inglés rimaq iñiq t’aqakunas necesitarqanku predicacionpi yanapakuqkunata. Paykunataq hukninta akllarqanku iskay kutipitaq qhawariq rirqanku. Wasinkuman kutispataq pisiyachirqanku gastonkuta, huk wata hunt’ataq qolqeta huñurqanku. Astakunankupaqña kashaqtinkutaq chay nacionpi tiyaq iñiqmasikuna maypi tiyanankupaq maskhapurqanku.

9, 10. ¿Imatan ruwankuman huk nacionman ripuqkuna, imarayku?

⁹ Huk nacionman ripuqkuna. ¿Diosmanta manaraq yachashaspachu huk nacionman ripurqanki? Yaqapaschá nacesqayki nacionpi necesitakushan askha predicaqkunata. Chhayna kaqtinqa, ¿manachu kutiwaq predicacionpi yanapakunaykipaq? Llank’anatapas, maypi tiyanaykitapas ratullachá tarinki hinaspapas yachankiñan rimasqanku simitapas. Chaymantapas llaqtamasiykikunaqa qanta astawan uyarisunkiku huk llaqtayoqkunata uyarinankumantaqa.

¹⁰ Huk runan Albania nacionmanta Italia nacionman tiyaq ripurqan. Chay nacionpi allin llank’anata tarirqan chaymi familianman qolqeta apachiq. Tiempoq pasasqanman hinataq Bibliata estudiarqan. Italia nacionmanta precursor especialkunan Albaniaman astakunanku karqan predicanankupaq, chaymi payqa albanés simita paykunata yachachiyta qallarirqan. Chay iñiqmasinchismi nin: “Paykunaqa saqesqay naciontan kusisqa rishanku manaña chay rimayta yachankuchu chaypas. Ñoqan ichaqa yachani reqsinitaq chay nacionta chayqa, ¿imatan Italia nacionpi ruwashani?” nispa. Chaymi chay iñiqmasinchis nacesqan nacionman kutinanpaq decidekurqan predicacionpi yanapakunanpaq. Nillantaqmi: “Manan pesapakunichu Italia nacionpi llank’anay saqesqaymanta nitaq qolqe ganasqaymantapas. Nacionniypin aswan allin llank’anata tarini, chay llank’ayqa Jehová Diosta tukuy sonqowan serviymi, chaymi cheqaq kusikuytaqa apamun”, nispa.

11, 12. ¿Imatan ruwananku huk nacionkunaman astakuyta munaqkuna?

¹¹ ¿Imaynatan ruwankuman? Pablowan puriqmasinkunawan manaraq Macedoniaman rishaqtinku paykunaqa inti haykuy ladota riyta munarqanku. Santo espíritu hark’aqtinmi ichaqa wichay ladoman rirqanku (Hech. 16:6). Bitinia llaqtaman qayllaykushaqtinkutaq Jesusmi paykunata hark’arqan (Hech. 16:7). Kunankamapas Jehová Diosmi Churinwan predicacionta pusarishan (Mat. 28:20). Sichus huk nacionman astakunaykipaq yuyaykushanki chayqa, Jehová Diosman mañakunallaykipuni yanapanasuykipaq (Luc. 14:28-30; Sant. 1:5; qhaway: “¿Imaynapin yachayman akllasqay nacionpi yanapay necesitasqankuta?” nisqa recuadrota).

¹² Huk nacionman astakuyta munanki chayqa, iñiq t’aqapi umallikunata otaq poqosqa iñiqmasikunatapas tapukuy allin yanapakuqchus kawaq icha manachus chayta (Pro. 11:14; 15:22). Chaymantapas qelqakunapin chaykunamanta astawan yachawaq hinaspapas allinta t’aqwiy ima cheqasman riy munasqaykimanta. ¿Manachu pisi tiempollapaq chay nacionman riwaq imayna kasqanta qhawarinaykipaq? Decidekunkiña astakunaykipaq chayqa Betelman qelqay yanapasunaykipaq. T’aqwillaytaq kay watapaq Anuario librota. Chay carta qelqasqaykita Betelman apachinaykimantaqa iñiq t’aqapi umallikunamanraq qoy, paykunan manaraq apachishaspa imachus yuyaykusqankuta qelqanqaku (qhawariy Organizados para hacer la voluntad de Jehová librota 111, 112 paginakunata).

13. ¿Imakunallapin Betel wasi yanapasunkiman? ¿Imakunatan qan kikiyki ruwakunayki?

¹³ Betelmi sut’inchasunki chay nación riy munasqayki imayna kasqanmanta chhaynapi allinta decidenaykipaq. Paykunan ichaqa mana ima documentotapas ruwaysisunkikuchu nitaq maypi tiyanaykitapas maskhapusunkichu. Manaraq huk nacionman astakushaspan chaykunata qhawarinayki. Chaymantapas qan kikiykin rimanayki chay nacionpi autoridadkunawan, tapukunaykitaq ima documentokuna necesitakun chaypi tiyanaykipaq llank’anaykipaqpas. Arí, huk nacionman astakuyta munaqkunaqa allintan tanteakunanku imakuna necesitasqankuta (Gál. 6:5).

14. Predicacionta hark’asqan nacionman astakuwaq chayri, ¿imatan ruwanayki?

¹⁴ Predicación hark’asqa kaqtin. Wakin nacionpi hark’asqan predicacionqa kashan chaywanpas iñiqmasinchiskunaqa mana reparachikuspallan predicanku (Mat. 10:16). Mayninpin chay nacionman astakuq iñiqmasinchiskuna mana reparakuspa comunta predicankuman hinan chay nacionpi tiyaq iñiqmasinchiskunata sasachakuypi churachinkuman. Sichus chhayna nacionman astakuyta munanki chayqa huk cartata umallikunaman qoy, paykunan qhawarispanku Betelman apachinqaku.

15. Huk nacionman mana astakuyta atispayki, ¿imaynatan astawan Diosta serviwaq?

¹⁵ Mana astakuyta atispayki. Sichus huk nacionman mana astakuyta atinkichu chayqa ama pisipaychu. Yaqapaschá ‘allinta llank’anaykipaq kusapuni’ huk territoriokuna kashan (1 Cor. 16:8, 9). Ichapaschá iñiq t’aqata watukuq umalli yachanman may iñiq t’aqapi predicaqkuna necesitakusqanta. Yanapakuwaqtaqmi huk rimaykunapi iñiq t’aqata otaq iñiq t’aqaykipi astawan yanapakuwaq. Imaynapiña tarikusqaykipipas tukuy sonqowan Jehová Diosta servisqaykin aswan allinqa (Col. 3:23).

16. ¿Ima ninanchismi pipas huk nacionman astakunanpaq yuyaykusqanta willawaqtinchis?

¹⁶ ¿Reqsinkichu pillatapas huk nacionman astakuy munaqta? Chhaynaqa astawan kallpachay yanapaytaq. Antioquía de Siria llaqtaqa Roma suyuq kinsa kaq hatun llaqtanmi karqan, chaytan Pabloqa saqepurqan. Chaypiqa askha llaqtakunata predicananku karqan, chaymi Pabloq yanapayninta necesitarqankun. Chhaynaña kaqtinpas Bibliaqa manan willanchu chay iñiqmasikuna Pablota hark’asqankuta. Manan imayna tarikunankupichu yuyaykurqanku aswanpas entienderqankun teqsimuyuntinpi predicakunan kasqanta (Mat. 13:38).

17. ¿Imaraykun ‘Macedoniaman [...] yanapakuq’ rinapaq yuyaykunanchis?

¹⁷ Pablon puriqmasinkunawan askha bendicionkunata chaskirqanku Macedonia provinciaman risqankumanta. Filipos llaqtapin Lidia sutiyoq warmita reqsirqanku, Jehová Diosqa “paypa sonqontan [...] kicharirqan Pabloq nisqanta tukuy sonqo uyarinanpaq” (Hech. 16:14). Maytachá Pablopas puriqmasinkunapas kusikurqanku Lidiapas wasinpi kaqkunapas bautizakusqankumanta. Chhaynallataqmi askha llaqtakunapi Lidia hina manaraq Diosta reqsinkuchu. Sichus “Macedoniaman chimpamuspa yanapawayku” nisqa invitacionta chaskikunki chayqa, askha runakunatan yanapanki Diosta reqsinankupaq.

[5 paginapi recuadro]

“¿Imaynapin yachayman akllasqay nacionpi yanapay necesitasqankuta?”

• Chayllaraq lloqsimuq Anuario librota qhawariy hayk’a runakunan kan sapanka predicaqkunapaq chayta.

• Índice nisqapi maskhay ima qelqapin willashan chay llaqtamanta, ima experienciakunan kan chaymantawan.

• Yaqapaschá mayqen iñiqmasipas chay nacionta visitarqan otaq tiyarqan chayqa paykunata tapuy.

• Sichus rimasqayki simipi predicayta munanki chayqa, Internetpi otaq hukkunapipas maskhay hayk’a runakunas chay llaqtapi rimasqayki simita rimanku chayta.