Umalli T’aqaq cartan
Munasqa wawqe-panaykuna:
¡Maytan kusikuyku pachantinpi qanchis millón más Diospa hunt’aq siervonkunaman yapamanta qelqamuspayku! Huk nacionmanta iñiqmasiwan tupaspanchisqa, chayratopachan anchata munakunchis (Juan 13:34, 35). Chay munakuytan reparankichis kay Anuario librota leespa, chaypin willashan huk nacionkunamanta ancha iñiyniyoq hunt’aq iñiqmasikunamanta.
Hallp’antinmanta willakuykunan reparachiwanku Familiantin Dios Yupaychana Ch’isita mana saqespa ruwasqaykichista. Tayta-mamakunaqa huch’uy wawankuq yachananpaq, tukuy yuyaywan uyarinanpaq hinan yachachishanku (Efe. 6:4). Askha casarasqakunapas Bibliata kuska estudiasqankumantan astawan hukllachakushanku (Efe. 5:28-33). Chhaynaqa familiapi otaq sapanchisña Bibliata astawan t’aqwisqanchisqa allinninchispaqmi karqan (Jos. 1:8, 9).
Pacha chhaphchiykuna, lloqllakunarayku ñak’ariypi tarikuq iñiqmasikunawanmi sonqoyku kashan. Hinaspapas chay sasachakuykunapi tarikuqkunata sonqomanta yanapaq iñiqmasikunatan anchata agradecekamuyku (Hech. 11:28-30; Gál. 6:9, 10). Chaymantapas, “ancha allinkunata ruwaq, wakchakunatapas yanapaq” Dorcas hinan wakinniykichisqa huk iñiqmasikunaq necesitasqankuta reparaspa yanapashankichis (Hech. 9:36). Jehová Diosqa manan qonqanqachu tukuy allin ruwasqaykichista, aswan allinkunawantaqmi kutichipusunkichis (Mat. 6:3, 4).
Wakin nacionkunapiqa leykunata q’ewispankun derechoykichista sarunchanku Diospaq llank’anaykichista hark’anankupaq (Sal. 94:20-22). Chaywanpas qatiykachasqa kaymanta Jesuspa nisqanta yuyarispaykichismi tukuy kallpawan aguantashankichis, Jehová Diospitaqmi pakaykushankichis (Juan 15:19, 20). Ñoqaykuqa qankunaraykun Jehová Diosmanta mañakushallaykupuni, mañakullaykutaqmi ‘suyakuyniykichismanta pipas tapuqniykichisman allinta kutichinaykichispaqpas’ (1 Ped. 3:13-15).
Saqraqa millay qhelli ruwaykunamanmi urmachiyta munasunkichis, qankunan ichaqa sapa watan qaqata sayankichis ch’uyatataqmi kawsashankichispas, chayqa anchatan kusichiwanku. Qhelli kawsayqa astawanmi kay tiempopi mast’arikushan, qankunan ichaqa kallpachakushankichis ‘Señorpa [...] atiyniyoq kallpanwan’ (Efe. 6:10). “Diospa qosqan llapallan tupapakuna p’achawan” churakuspan “saqraq q’otukuq yuyayninkuna” contra qaqata sayashankichis (Efe. 6:11-12). Jehová Diosqa allin kawsasqaykichiswanmi Satanaspa lliw k’amisqankunaman kutichishan (Pro. 27:11).
Hinaspapas ancha kusisqan willamuykichis 2011 watapi Jesuspa Wañusqanta Yuyarinapaq huñunakuyman 19.374.737 runakuna hamusqankumanta. Chhayna kananpaqmi yanapakurqankichis abril killapi llapa precursor auxiliarta hap’iqkuna. Hallp’antinpi runakunan Testigokunaq huk nisqalla Jehová Dios hatunchasqankuta uyarirqanku (Rom. 10:18). Chay killapin precursor auxiliarta hap’irqanku 2.657.377 iñiqmasikuna, wakintaq astawan predicanankupaq kallpachakurqanku. Chayta tukuy sonqowan tukuy kallpawan ruwasqaykichismi anchata kusichiwanku (Sal. 110:3; Col. 3:23).
Jehová Diospa yanapayninwanmi qayna wata bautizakurqanku 263.131 mosoq iñiqmasikuna. Anchatan qankunata agradecekamuyku Apocalipsis libropi invitacionta willamusqaykichismanta, chaypin nin: “Santo Espirituwan Corderoq [novianwanmi] ninku: ¡Hamuy! nispa. Pipas uyariqqa nichun: ¡Hamuy! nispa. Pipas ch’akichikuqqa hamuchun, kawsay unuta ukyay munaqqa mana qolqellawan ukyachun”, nispa (Apo. 22:17). Hinaspapas 2011 watapi hatun huñunakuyninchispi Diospa Gobiernonmanta imaymana yachasqanchismi kallpachawanchis “¡Diospa Gobiernon hamuchun!” nispa ninanchispaq. Apóstol Juanmi uyarirqan Jesuspa prometesqanta, nirqanmi: “Cheqaqtapunin yaqaña hamusaq”, nispa, chaymi payqa nirqan: “Amén. ¡Hamuy, Señor Jesús!”, nispa. Chay hinallatataqmi ñoqanchispas ninchis (Apo. 22:20).
Chaykuna chayamunanta suyashanaykichiskamaqa, ama qonqaychischu sapankaykichista ancha munakusqaykuta, qankunaqa Jehová Diosta cheqaq munakusqaykichistan ruwasqaykichiswan sut’ita rikuchishankichis (1 Juan 3:18).
Iñiqmasiykichiskuna,
Jehová Diospa testigonkunamanta Umalliq T’aqa