Llapa runawan thakpi kawsasun
1. ¿Bibliapi ima willakuytan yuyarinanchis runakuna mana allinta chaskiwaqtinchis?
1 Diospa llaqtanqa thakpi kawsaqmi, thak kawsaymanta willakuykunatataqmi willanchispas (Isa. 52:7). Chaywanpas askha runakunan phiñakunku wasinkuta predicaq riqtinchis. ¿Iman yanapawasunman paykunawan thakpi kananchispaq mana phiñakunanchispaqpas? Chaymantan kunan yachasun (Rom. 12:18).
2. ¿Imaraykun allin yuyaywan rimananchis?
2 Allin yuyaywan rimasun. Wakin runakunaqa cheqaq yachayta mana uyariyta munaspan phiñakunku predicaqtinchis, hukkunataq huk sasachakuyniyoq kasqankurayku. Yaqapaschá chayaqtinchis phiñasqaña kasharqanku otaq ima ruwaypipas afanakusharqanku. Wakinqa ñoqanchis contra rimaykunata uyarispan mana uyariyta munawanchischu (2 Cor. 4:4). Allin yuyaywan rimaymi yanapawasun mana phiñakunapaq, manataqmi ñoqanchistapas cheqnikuwasunman hinatachu qhawarisun (Pro. 19:11).
3. ¿Imaynatan rikuchisunman respetowan rimasqanchista?
3 Respetowan rimasun. Askha runakunan creenciankuman hap’ipakunku (2 Cor. 10:4). Sapanka runan libre kashan uyariwananchispaq mana uyariwananchispaqpas. Manan hayk’aqpas runakunaq imapichus iñisqanta pisichanachu, manataqmi mana yachaq runakunata hinachu tratananchis. “¡Ripuychis!” niwasun chayqa respetowan ayqerikapusun.
4. ¿Imaynatan rikuchisunman ‘sumaq’ simiwan rimaq kasqanchista?
4 Sumaqllata rimapayasun. Mana allinkunataña niwasunman chaypas, ñoqanchisqa mana phiñakuspallan ‘sumaq’ simiwan kutichinanchis (Col. 4:6; 1 Ped. 2:23). Hinaspapas imakunapichus rimasqanchis tupan chaykunamantan rimana manan ch’aqwaymanchu haykuna. Reparananchismi imaraykun uyariqninchis rimasqanchista mana allinpaqchu qhawarin chayta. Chaywanpas aswan allinmi kanman ayqerikapuy (Pro. 9:7; 17:14).
5. ¿Ima allinkunan kanqa llapa runawan thakpi kaqtinchis?
5 Thakpi paykunawan kasun chayqa yaqapaschá huk kutipi mayqenninchistapas uyariwasun (Rom. 12:20, 21). Mayninqa nishuta hark’akuqninchiskunan iñiqmasinchisman tukupunku (Gál. 1:13, 14). Iñipunkumanña manaña chaypas, sichus paykunawan thakpi kasun manataq phiñakusunchu ima niwasqanchiswanpas chayqa, Jehová Diosninchistan hatunchasun yachachisqanchistapas allinpaqmi qhawarichisun (2 Cor. 6:3).