Jujkuna munakusqanchista rikuchisun

Llapanchispa taytanchisqa Adanmi karan, chhaynaqa llapanchispas juj familia jinallan kanchis. Maytan munasunman llapanchispas munanakuspa kausayta, chay kausaymi ichaqa mana kanchu. Diosninchismi ichaqa munan sumaqta kausananchista.

¿IMATAN BIBLIAPI NIWANCHIS RUNAMASINCHISTA MUNAKUYMANTA?

“Qan kikiykita jinan runa-masiykitaqa munakunki” (LEVÍTICO 19:18).

“Munakushallaychis enemigoykichiskunataqa” (MATEO 5:44).

¿IMATA RUWASPAN RUNAMASINCHISTA MUNAKUNCHIS?

1 Corintios 13:4-7 textopin Diosqa niwanchis imaynachus munakuq runa kasqanta.

“Munakuqqa pacienciakuqmi, sumaq sonqon”.

Kaypi piensasun. ¿Kusikunkichu pipas qanwan pacienciakuqtin, sumaq sonqo kaqtin, mana allintaña ruwaqtiykipas mana usqhaylla phiñakuqtin?

“Pipas munakuqqa manan envidiakunchu”.

Kaypi piensasun. ¿Kusikunkichu pipas qanpi confiaqtin, qanmanta mana envidiakuqtinpas?

Munakuqqa “manan paypa allinnillantachu maskhan”.

Kaypi piensasun. ¿Kusikunkichu pipas rimasqaykita uyariqtin?

“Munakuqqa manan piqpa mana allin ruwasqantapas yuyashallanchu”

Kaypi piensasun. Diosqa munanmi juchallikuq runata juchanmanta perdonayta juchanmanta pesapakuqtinqa. Payqa “manan sapa kutillachu anyashawanchis, manan sapa kutillachu phiñapayawanchis” (Salmos 103:9). Mana allinkuna ruwasqanchismanta perdonawaqninchis runataqa anchatan munakunchis riki. Chhaynaqa noqanchispas yachananchismi jujkunata perdonayta mana allinta ruwawaqtinchisqa (Salmos 86:5).

“Munakuqqa manan imachus mana allin kaqmantachu kusikun”.

Kaypi piensasun. Ima mana allinpas pasawaqtinchisqa manan munasunmanchu jujkunaq kusikunankutaqa riki. Chhaynaqa noqanchispas manan kusikunanchischu jujkunaq sufrisqankuta rikuspaqa, mana allintaña tratawasunman karan chaypas.

Sichus munanchis Dios bendeciwananchista chayqa, runamasinchistan munakunanchis maymantaña, ima religionniyoqña, jayk’a watayoqña kanman chaypas. Chaytaqa ruwasunman necesitasqanku ratopi paykunata yanapaspan.