¿Jayk’aqmi kay pacha chinkachisqa kanqa?

JESUSMI NIRAN:

“Makilla kashaychis, manan yachankichischu ima p’unchaychus ima horachus chay kananta”, nispa (MATEO 25:13).

“Makilla qhawashaychis, rijch’asqallataq kashaychispas, manan yachankichischu jayk’aqchus Diospa ajllasqan tiempo kasqanta”, nispa (MARCOS 13:33).

Chhaynaqa manan pipas yachanchu jayk’aqchus Diosqa millay runakunata chinkachinantaqa. Diosmi ichaqa yachan ima p’unchaychus ima horaschus kananta (Mateo 24:36). Chhaynaña kaqtinpas yachasunmanmi cercañachus kashan manachus chaytaqa. Jesusmi qatikuqninkunaman willaran millay runakuna chinkachisqa kananpaq cercaña kashaqtin imakunachus pasananta.

¿IMAKUNAN PASANAN KARAN?

Jesusmi willaran kay pacha tukupunanpaqña kashaqtin kaykuna pasananta: “Juj nacionmi juj nación contra jatarinqa, juj llaqtataq juj llaqta contra jatarinqa, kayneqpi chayneqpin kanqa yarqaypas terremotokunapas”, nispa (Mateo 24:3, 7). Chaymantapas willaranmi “mast’arikuq millay onqoykuna” kananmanta (Lucas 21:11). ¿Reparashankichu chaykuna pasashasqanta?

Kay tiempopiqa askha runakunan sufrishanku guerrakuna kasqanwan, yarqay kasqanwan, terremotokuna kasqanwan, onqoykuna kasqanwanpas. 2004 watapin océano Índico ladopi terremoto kasqanwan lamar-qochamanta unu lloqsimuspa 225.000 runakunata wañuchiran. Kinsa watakunallapin coronavirus onqoywan pachantinpi yaqa qanchis millón runakuna wañuranku. Chaykuna pasasqanwanmi sut’ita yachanchis kay pachaq tukukuynin cercapiña kashasqanta.

“TUKUKUY P’UNCHAYKUNA”

Bibliapiqa willashanmi Diospa juzganan p’unchay manaraq chayamushaqtin runakuna imayna kanankumanta (2 Pedro 3:3, 4). 2 Timoteo 3:1-5 textopin willashan tukukuy p’unchaykunapi runakunaqa mana p’enqarikuspa mana allinkunata ruwanankuta (qhaway “¿Imakunan pasanan karan tukukuy p’unchaykunapi?” nisqata). Kay tiempopi runakunaqa paykunallapin piensanku, mana manchakuspan runamasinkuta wañuchinku, qolqellapiñan piensanku, mana khuyapayakuqtaqmi kankupas. Tukuy chaykunan rikuchiwanchis millay runakunaq tukukuynin cercapiña kashasqanta.

¿Unaytachu duranqa tukukuy p’unchaykuna? Manan, Bibliaqa willanmi pisi tiempolla kananta. Chay qhepamantaq Diosqa wañuchipunqa allpanchis qhellichaqkunata (Apocalipsis 11:15-18; 12:12).

PISI TIEMPOLLAMANTAN ALLPANCHIS PARAÍSO KAPUNQA

Diosqa yachanmi ima p’unchaytachus ima horatachus kay pachata chinkachipunanta (Mateo 24:36). Ichaqa manan munanchu pipas wañunantaqa (2 Pedro 3:9). Chaymi llapanchisman tiempota qoshawanchis payta reqsinanchispaq kasukunanchispaq ima. Diosninchisqa munanmi salvakunanchista, kay allpapi sumaqta kausananchistapas.

Diosninchisqa serviqninkunawanmi willachimushan llapa runakuna paymanta yachanankupaq. Jesusqa niranmi Diospa gobiernonmanta allin willakuykuna pachantinpi willasqa kananta (Mateo 24:14). Jehová Diospa testigonkunaqa pachantinpin waranqa-waranqa millón horakunata runamasinkuman Diosmanta yachachinku. Jesusqa willaranñan manaraq tukukuy chayamushaqtin chay pasananta.

Kaypin yacharanchis pisi tiempollamanta kamachikuqkuna chinkachisqa kanankuta. Chaymantapas yachallaranchistaqmi salvakuyta atisqanchista, chhaynapi Diospa prometewasqanchis paraisopi kausananchispaq. Qatimuqpi yachasun imatachus ruwananchis paraisopi kausananchispaq chayta.