¿Imatan ruwananchis mosoq pachapi kausananchispaq?

Yachamusqanchis jina pisi tiempollamantan Diosqa tukuchinqa millay runakunata mana allin ruwaykunatapas. ¿Imaynapin yachanchis chaykuna pasananta? Bibliapin kayta nishan:

“Kay pacha kausayqa pasashanmi”, nispa (1 JUAN 2:17).

Ichaqa manan llapa runakunachu wañuchisqaqa kanqaku, chay textollapitaqmi kayta nin:

“Diospa munayninta ruwaqmi ichaqa wiñaypaq kanqa”, nispa.

Chhaynaqa salvakunanchispaqqa Diostan kasukunanchis. Chaypaqmi ichaqa Diosta allinta reqsinanchis.

DIOSTAN REQSINANCHIS SALVAKUNANCHISPAQ

Señorninchis Jesusmi niran: “Paykuna wiñay kausayta chaskinankupaqqa qan sapallan cheqaq Diostan reqsinanku”, nispa (Juan 17:3). Salvakunanchispaqpas wiñaypaq kausananchispaqpas manan “Diospin creeni, Diosqa kanmi nispallachu” ninanchis, aswanpas tukuy atisqanchistan ruwananchis paywan amigontin kananchispaq. Piwanpas amigontin kananchispaqqa tiempotan orqonanchis paywan parlarinanchispaq. Chhaynallatataqmi Dioswanpas ruwananchis. Pisillapi yachasun imatachus Diosninchis noqanchisrayku ruwashasqanta, chaymi yanapawasun paywan amigontin kananchispaq.

BIBLIATA SAPA P’UNCHAY LEEY

Jesusmi niran: “Manan t’antallawanchu runaqa kausanqa, aswanpas Jehová Diospa llapa nisqankunawan iman”, nispa. Chhaynaqa kausananchispaqqa manan mijunallanchischu, aswanpas Diosmantan allinta yachananchis (Mateo 4:4).

Bibliapin Jehová Diosmanta willawanchis. Chayta leespan pisi-pisimanta yachasun imakunatachus ñaupaq tiempopi ruwasqanmanta, kunan tiempopipas imakunatachus ruwashasqanta, imakunatachus pisi tiempollamanta ruwanqa chaytapas.

DIOSMANTA MAÑAKUY YANAPANASUYKIPAQ

Diospa cheqnisqan ruwaykunata saqepuy sasa kaqtin, ¿imatan ruwawaq payta kasukunaykipaq? Diostan allinta reqsinayki, chaymi yanapasunki.

Kunan yachasun juj warmimanta, payta sutichasunchis Sakura nispa. Chay warmiqa qhelli kausayniyoqmi karan, ichaqa Biblia estudiaytan qallariran, chaypin yacharan Diospa kay kamachisqanta: “¡Ayqeychis qhelli jucha ruwaymanta!”, nispa (1 Corintios 6:18). Chaymi Sakuraqa Diosmanta mañakuran qhelli kausayninta saqepunanpaq, jinan payqa cambiapuran. Ichaqa sapa kutillanmi kallpachakuran chay qhelli ruwaykunaman ama urmananpaq. Paymi nin: “Chay qhelli ruwaykuna umayman jamuqtinmi tukuy sonqoywan Jehová Diosmanta mañakuni yanapawananpaq. Sapallayqa manan atiymanchu karan chay tentacionkuna atipaytaqa. Chaymantapas Diosmanta mañakuspaymi astawan payman achhuykuni”, nispa. Sakura jinan askha runakuna Diosmanta yachashanku, Diostaq paykunata yanapashan munayninman jina kausanankupaq (Filipenses 4:13).

Diosta allinta reqsinanchispaq kallpachakusunchis chayqa paypas reqsiwasunmi, chhaynapin paywan allin amigontin kasunchis (Gálatas 4:9; Salmos 25:14). Chayta ruwaspan salvakusunchis, jinaspa Diospa prometewasqanchis sumaq paraisopi tiyasunchis. Qatimuqpi chaymanta yachasun.