¿IMAYNATAN CHEQNINAKUYTA CHINKACHISUNMAN?
3 | Cheqnipakuyta sonqoykimanta orqoy
Bibliapin nin:
“Yuyayniykichista mosoqyachiychis [...], chhaynapin allinta yachankichis Diospa munayninqa allinpuni, junt’asqapuni, sonqonpaq jinapuni kasqanta”, nispa (ROMANOS 12:2).
¿Imatan chaywan nishan?
Diosqa yachanmi imachus piensasqanchista (Jeremías 17:10). Chaymi qhawarinanchis rimasqanchispas ruwasqanchispas allinchus kashan manachus chayta. Yachasqanchis jina jujkunata cheqnikuyqa sonqonchismantan lloqsimun, chaymi tukuy atisqanchista ruwananchis mana allin piensaykunata umanchismanta orqonanchispaq. Chayta ruwaspallan manaña jujkunata cheqnikusunchu.
Kayta ruway:
Allinta reparay imaynatachus waj llaqtayoqkunata qhawarisqaykita. Jinaspa tapukuy: “¿Cheqnikunichu paykunata? ¿Jujkunaq rimasqanta uyarispallachu millay runapaq qhawarini, icha kallpachakunichu allinta reqsinaypaq?”, nispa. Wakin peliculakunapas jujkunapas jujkunata cheqnikunanchispaqmi tanqawasunman, chaymi chaykunataqa mana qhawananchischu.
Bibliapi nisqanqa yanapasunkin jujkuna cheqnikuyta sonqoykimanta wijch’unaykipaq
Imayna piensashasqanchista reparakuyqa sasan. Biblian ichaqa “sonqoq ima munasqantapas ima piensasqantapas allinta reparan” (Hebreos 4:12). Chaymi imayna piensasqanchista Bibliaq nisqanwan tupanachinanchis. Jinaspa kallpachakunanchis Bibliapi yachasqanchisman jina piensananchispaq. Diospa nisqanta kasukusun chayqa, atisunmi sonqonchismanta ima mana allin piensaytapas wijch’uyta, jujninmi kanman jujkunata cheqnikuy (2 Corintios 10:4, 5).