¿IMAYNATAN CHEQNINAKUYTA CHINKACHISUNMAN?

4 | Diospa yanapayninta mañakuy

Bibliapin nin:

“Santo espiritun ruruchin: munakuyta, kusikuyta, thaj kausayta, pacienciakuyta, sumaq sonqo kayta, allin sonqo kayta, iñiyta, llamp’u sonqo kayta, cuerpo kamachiq kayta ima”, nispa (GÁLATAS 5:22, 23).

¿Imatan chaywan nishan?

Diospa yanapayninwanqa manañan jujkunata cheqnikusunchu. Diosqa santo espiritunwanmi yanapawasunman sumaq sonqoyoq kananchispaq. Noqallanchisqa manan atisunmanchu, chaymi Diospa yanapayninta mañakunanchis. Chayta ruwasunchis chayqa apóstol Pablo jinan nisun: “Tukuy imapaqmi kallpa qowaqniyqa kallpata qowan”, nispa (Filipenses 4:13). Chaymantapas mana iskayaspan nisun: “Señor Diosmi yanapaykuwanqa”, nispa (Salmos 121:2).

Kayta ruway:

“Ñaupaqqa millay runan karani. […] Kunanmi ichaqa Diospa yanapayninwan llamp’u sonqo kapuni” (WALDO)

Jehová Diosta tukuy sonqoykiwan niy: “Santo espirituykita qoykuway allin sonqoyoq kanaypaq”, nispa (Lucas 11:13). Jinan espiritunwan yanapasunki munakuq, llamp’u sonqo, pacienciakuq kanaykipaq, cuerpoykita kamachinaykipaqpas. Chaymantapas Bibliapin leewaq allin sonqoyoq runakunamanta, kallpachakuwaqtaq paykuna jina kanaykipaq. Chaymantapas allin runakunawanmi amigontin kanayki, jinan paykunapas yanapasunkiku allin kaqta ruwanaykipaq (Hebreos 10:24).

WALDO runamanta yachasun

Manañan jujkunata cheqnikuranchu

Payqa wawa kashaspan nishuta sufriran, jinan wiñaspa jujkunata cheqnikuran. Paymi nin: “Sapa kutillanmi droga vendeqkunawan maqanakuq kani. Juj kutinmi juj grupomanta waynakuna juj millay runata contrataranku wañuchiwananpaq. Payqa juj cuchillowanmi sat’iruwaran, ñakaymi escapakurani”, nispa.

Waldoqa phiñakuranmi esposan Jehová Diospa testigonkunawan Biblia estudiayta qallarisqanmanta. Paymi nin: “Noqaqa paykunata cheqnikuspan millayta k’amiq kani, paykunan ichaqa sumaqllata rimapayawaranku”, nispa.

Qhepamanmi ichaqa Waldopas Biblia estudiayta qallariran. Paymi nin: “Noqapaqqa sasan karan yachasqayman jina kausayqa, niranin: Manachus jina jayk’aqpas millay genioytaqa cambiasaqchu”, nispa. Ichaqa juj kutinmi Bibliamanta yachasqan sonqonman chayaran.

Paymi nin: “Yachachiwaqniy hermanon Gálatas 5:22, 23 textota leechiwaran […]. Chay qhepamantaq niwaran: Chaypi nisqan jina allin runa kanaykipaqqa manan kallpallaykiwanqa atiwaqchu, Jehová Dios santo espiritunwan yanapanasuykitan necesitanki, nispa. Chaymi allinta yanapawaran”, nispa.

Jinan Waldoqa Diospa yanapayninwan manaña jujkunata cheqnikuranchu. Paymi nin: “Familiaypas jujkunapas admirasqan kashanku cambiasqaymanta. Ñaupaqqa millay runan karani […]. Kunanmi ichaqa Diospa yanapayninwan llamp’u sonqo kapuni”, nispa.