¿Imaraykun mana ruwankuchu Pascua fiestata?
Runaq rimasqan cheqaq kaq ima
Runaq rimasqan: Wakinmi ninku: “Jehová Diospa testigonkunaqa manan Cristopi creenkuchu, chaymi mana ruwankuchu Pascua fiestata”, nispa.
Cheqaq kaq: Noqaykupaqqa Jesucristollan salvaqqa, chaymi tukuy atisqaykuta kallpachakuyku ‘tukuy yuyaywan yupinta qatikunaykupaq’ (1 Pedro 2:21; Lucas 2:11).
Runaq rimasqan: Wakinmi ninku: “Manan Jesuspa kausarimpusqanpi creenkuchu”, nispa.
Cheqaq kaq: Noqaykuqa creeykun Jesuspa kausarimpusqanpi, manachus chaypi creeykuman chayqa yanqa iñiqchá kaykuman. Chaymantapas, noqaykuqa Jesuspa kausarimpusqanmantan willayku (1 Corintios 15:3, 4, 12-15).
Runaq rimasqan: Wakinmi ninku: “Fiestakunapi wawanku kusirikunantan jark’anku”, nispa.
Cheqaq kaq: Noqaykuqa tukuy atisqaykutan kallpachakuyku wawaykuta allinta yachachinaykupaq, munasqa kusisqa wiñananpaqwan (Tito 2:4).
¿Imaraykun Jehová Diospa testigonkuna mana ruwankuchu Pascua fiestata?
Pascua fiesta ruwasqankuqa manan Bibliaq nisqanman jinachu kashan.
Jesusqa wañusqanta yuyarinapaqmi kamachikuran, manan kausarimpusqanta yuyarinapaqchu. Chaymi noqaykuqa wañusqanta yuyariyku ima p’unchaypi jinachus wañuran chay p’unchaypi (Lucas 22:19, 20).
Kunan tiempo ruwasqanku Pascua fiestaqa ñaupa tiempokunapi millay costumbrekunata ruwasqankuman jinan kashan, manataqmi chay fiestakunataqa allinpaqchu Diosqa qhawarin. Payqa munan tukuy sonqowan payllata servinanchistan, manan ima millay ruwaykunapas ruwananchistachu (Éxodo 20:5; 1 Reyes 18:21).
Noqaykuqa Bibliaq nisqanman jinan imatapas ruwayta munayku, chaymi mana Pascua fiestataqa ruwaykuchu. Biblian yanapawanku runaq ima costumbrentapas ruwashanaykumantaqa ‘allin reparaq’ kanaykupaq, ‘allin yuyayniyoq’ kanaykupaqwan (Proverbios 3:21; Mateo 15:3). Pipas tapuwaqniykutaqa respetowanmi explicayku imapichus creesqaykuta, ichaqa respetaykun sapanka imapichus creenanpaq libre kasqankuta (1 Pedro 3:15).